Koai te Atua?

AKAPEEA koe me pau i tera uianga? Te manako ra tetai pae e kua kite meitaki ratou i te Atua—e oa piri vaitata aia. Ko tetai pae te manako ra i te Atua e ko tetai kopu tangata e mamao te pirianga. Te irinaki ra ratou e te vai ra aia inara kare ratou i kite meitaki iaia. Me te irinaki ra koe i te Atua, akapeea koe me pau i te au uianga i tataia i raro akenei?

1. E peretana tikai ainei te Atua?

2. E ingoa ainei to te Atua?

3. Ko Iesu ainei te Atua Mana Katoatoa?

4. Te manako maira ainei te Atua iaku?

5. Te ariki ra ainei te Atua i te au tu akamorianga katoatoa?

Me ui koe ki tetai ke kia pau mai i teia au uianga, penei ka poitirere koe i ta ratou au pauanga tukeke. No reira rai e kare i te mea umere e kua tupu te au tua maani ua e te au manako tarevake no runga i te Atua.

Puapinga Tikai te Au Pauanga

Iaia e tuatua ra ki tetai vaine irinaki i te Atua i ko i te ruavai, kua akakite a Iesu Karaiti i te anoano kia kite i te tuatua mou no runga i te Atua. Kua akatika teia vaine Samaria e e peroveta a Iesu. Inara e apinga tetai e manamanata ra aia. E akonoanga tuke rai ta Iesu mei tana. I tona akakite anga i teia manamanata, kua akakite tika atu a Iesu kiaia e: “Kare kotou i kite i ta kotou e akamori nei.” (Ioane 4:19-22) Papu e, kua kite a Iesu e kare te aronga katoatoa e akonoanga ta ratou i kite tikai i te Atua.

 Ko te aiteanga ainei i ta Iesu tuatua e kare tetai ua atu tangata e kite tikai i te Atua? Kare. No te mea kua tuatua atu a Iesu ki teia vaine e: “E akamori ei i te Metua te aronga akamori tika ra, ma te vaerua e te tuatua-mou: ko te tu ïa o te tangata akamori ta te Metua e anoano ra.” (Ioane 4:23) Ko koe ainei tetai i rotopu i te aronga e akamori ra i te Atua “ma te vaerua e te tuatua-mou”?

E puapinga maata tikai noou kia akapapu no runga i te pauanga i tera uianga. No teaa ra? Kua akakite a Iesu i te anoano no te kite tika tikai, i tona pureanga e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Ae, te piri vaitata ra toou au manakonakoanga no te oraanga i te tuatau ki mua ki toou kite anga i te tuatua mou no runga i te Atua!

Ka rauka ainei tikai i te kite i te tuatua mou no runga i te Atua? Ae, ka rauka! Akapeea e rauka ai i reira ia koe? Kua tuatua a Iesu i teia no runga iaia uaorai e: “Ko au te mataara, e te tuatua-mou e te ora; kare ua e tangata e tae ki te Metua ra, mari ra ei iaku.” (Ioane 14:6) Kua akakite katoa aia e: “Kare tetai i kite i te Metua, mari ra ko te Tamaiti, e te tangata ta te Tamaiti e inangaro i te akakite atu.”—Luka 10:22.

No reira ko te taviri i te kite i te Atua ka kiteaia i roto i te au apiianga a Iesu Karaiti, te Tamaiti a te Atua. E tika rai, kua taputou mai a Iesu kia tatou e: “Me mou kotou i taku apiianga, e au pipi tikai kotou naku. E ka kite i reira kotou i te tuatua mou, e na te tuatua mou e akarangatira ia kotou.”—Ioane 8:31, 32, The Holy Bible—New International Version.

Akapeea i reira a Iesu i te pauanga i te au uianga e rima tei uiia i mua atu ana?

[Tutu i te kapi 4]

Te akamori ra ainei koe i tetai Atua kare koe i kite tikai?