Te Manako Maira Ainei te Atua Iaku?

Au pauanga matauia:

▪ “E puapinga maata rava te Atua i te manako mai i toku au manamanata.”

▪ “Kare au e manako ana e te manako maira aia iaku.”

Eaa ta Iesu i tuatua?

▪ “Kare aina taki rima manu rikiriki i okoia i nga asario e rua nei? e kare rai tetai i ngaro i te Atua. E kua ope oki te rauru o to kotou mimiti na i te tatauia. Auraka mari kotou e mataku: e maata to kotou meitaki i to te au manu rikiriki e manganui.” (Luka 12:6, 7) E mea papu tikai e, kua apii a Iesu e te manako maira te Atua ia tatou.

▪ “E teianei, auraka kotou e apiapi ua, ka na ko ei ra, Eaa ua ta matou kia kai? e, Eaa oki ta matou kia inu? e, Eaa to matou kakau kia kakau? (Te kimi ra oki te au etene i taua au mea katoa ra:) kua kite oki to kotou Metua i te ao ra e, kia rauka taua au mea katoa ra ia kotou e tikaʼi.” (Mataio 6:31, 32) Kua papu ia Iesu e te kite maira te Atua i ta tatou uaorai e anoano ra.

TE AKAKITE taka meitaki maira te Pipiria e te manako maira te Atua ia tatou. (Salamo 55:22; 1 Petero 5:7) Me koia ia, eaa i reira tatou e mamae maata nei i teia tuatau? Me e aroa e e mana ririnui te Atua, eaa i reira aia i kore ei e akakore atu i te mamae?

Te kapitiia maira te pauanga ki tetai tikaanga kare te maataanga o te tangata i kite—e ko te tutara o teianei ao kino, ko Satani te Tiaporo. I te timataanga ia Iesu, kua oronga a Satani i te au patireia katoatoa o te ao nei, i te karanga anga e: “E oronga atu au i te au, e te inuinu i teianei pa enua, kia koe na; kua tukuia mai oki kiaku, e naku e oronga atu na taku tangata e inangaro.”—Luka 4:5-7.

Naai i akariro ia Satani ei tutara no teianei ao? I te akarongo anga to tatou nga metua mua, ko Adamu raua ko Eva, kia Satani e kua kopae raua i te akauenga a te Atua, kua iki raua ia Satani ei tutara no raua. Mei tera meameaau anga mai, kua akakoromaki ua te Atua ko Iehova na te oronga anga mai i te tuatau i te akaari mai e ka puapinga kore ua te tutaraanga a Satani. Kare a Iehova i maro ana i te tangata kia tavini iaia, inara te akatuera ra aia i te mataara no tatou kia oki atu kiaia.—Roma 5:10.

No te mea te manako maira te Atua ia tatou, kua akanoonoo aia ia Iesu kia akaora ia tatou mei te tutaraanga a Satani. Kare e roa atu ana, ka “akangere [a Iesu] iaia nona te mate ra, koia oki te diabolo.” (Ebera 2:14) Na te rave anga i te reira, ka “akakore aia i te angaanga a te diabolo.”—1 Ioane 3:8.

Ka akaoki akaouia mai te Parataito ki te enua nei. I taua tuatau ra, ka “orei [te Atua] i te roi-mata katoatoa [o te au tangata]; e e kore rava te mate, e te aue, e te mii; e te mamae oki, e kore katoa ïa; no te mea [ka] kore te au mea taito.”—Apokalupo 21:4, 5. *

[Tataanga Rikiriki i Raro]

[Tataanga i te kapi 8]

Ka akaoki akaouia mai te Parataito ki te enua nei