Mama ua i te akapiri vaitata atu ki te Atua. Mei tetai metua aroa rai te mataora ra i tana tamariki i te tuatua maoraora anga mai kiaia, te inangaro maira te Atua ko Iehova kia pure tatou kiaia. I taua taime rai, mei tetai ua atu metua tu pakari, e au tumuanga tau tetai i kore ei te Atua i pau mai i tetai au patianga. E au tumuanga muna ainei tana, me kore ka rauka ainei i te au akaraanga Pipiria i te tauturu ia tatou kia marama e eaa aia i kore ei i pau mai i tetai au pure?

Te akamarama maira te apotetoro ko Ioane e: “Teia taua taitaia kore no tatou i rauka iaia ra, kia pati ua atu tatou i te au mea ravarai i tau iaia ra, te akarongo maira aia ia tatou.” (1 Ioane 5:14) E mea tau kia rotai ta tatou au patianga ki to te Atua anoano. Te pure ra tetai aronga no tetai au apinga kare e aru ana ki te anoano o te Atua—ei akaraanga, kia re i tetai roteri me kore i tetai peti. Te pure ra tetai pae no runga i tetai au akakoroanga tau kore. Te akamatakite maira te pipi ko Iakobo i te taangaanga kino anga i te pure, na te tuatua anga e: “Te pati ra oki kotou, e kare a kotou i rauka, no te mea te apa na ta kotou pati anga, kia pou i te kaimoumouia e kotou i to kotou anoano tika kore ra.”—Iakobo 4:3.

Ei akaraanga, e akamanako ana i nga tua roa ai i roto i tetai tueporo tarape e pure ra kia re. Kare e tau kia tapapa atu e ka pau mai te Atua i taua au pure akataemoemo. Te aite katoa ra te reira ki te au tamakianga i teia tuatau no tetai nga pupu e pure ra kia autu raua.

Ko te aronga e patoi ra i te ture a te Atua kare e pauia mai ta ratou pure. Kua akakeuia a Iehova e tai taime i te tuatua ki te aronga akamori pikikaa e: “E kia akamaata kotou i te au pure, kare au e akarongo atu; kua ki oki to kotou rima i te toto.” (Isaia 1:15) Te karanga ra te Pipiria e: “Ko tei ariu ke, i tona taringa kia kore e kite i te ture, e riro tana pure ei mea viivii.”—Maseli 28:9.

I tetai tua ra, ka akarongo ua mai rai a Iehova ki te au pure ngakau tae a te aronga akamori, te rave maroiroi ra i te tavini iaia kia tau ki tona anoano. Inara, ko te aiteanga ainei e te oronga maira aia i tetai ua atu au mea ta ratou ka pati atu? Kare. E akamanako ana i tetai au akaraanga Tuatua Tapu.

E pirianga vaitata tikai to Mose ki te Atua; inara, ka pati katoa aia kia “tau” ki te anoano o te Atua. Ei tuke ki to te Atua akakoroanga tei akakiteia mai, kua pati akatenga a Mose i te tikaanga kia tomo ki roto i te enua o Kanaana: “E tuku akena koe iaku ki tera pae, taku ïa tuatua ia koe, kia kite au i tenana enua meitaki i tera pae Ioridana.” Inara i mua atu ana, no tana ara, kua akakiteia kia Mose e kare rava aia e tomo atu ki roto i tera enua. I teianei, kare ra i oronga atu i ta Mose i pati mai, kua akakite a Iehova kiaia e: “Oti ra ua; auraka koe e tuatua akaou mai kiaku i tena.”—Deuteronomi 3:25, 26; 32:51.

Kua pure te apotetoro ko Paulo no te akamaru anga, i tana e kapiki ra e ko tona ‘tara i roto i te kopapa.’ (2 Korinetia 12:7) Penei ko teia “tara” te taiku ra ki te mamae o tona maki mata me kore ki te tamanamanata anga putuputu a te aronga patoi e a te “au taeake pikikaa.” (2 Korinetia 11:26; Galatia 4:14, 15) Kua tata a Paulo e: “E toru oki aku pati anga atu i te Atu i taua mea ra, kia akataka keia iaku.” Inara, kua kite te Atua e me rave ua atu a Paulo i tana tutu anga noatu te manamanata o teia ‘tara i roto i te kopapa,’ ka akatutu taka meitaki mai te reira i te mana o te Atua e to Paulo irinaki pu tikai anga ki roto Iaia. Kare i pau i ta Paulo patianga, kua akakite mai ra te Atua kiaia e: “Ei te apikepike e taka meitaki ravaʼi toku maroiroi.”—2 Korinetia 12:8, 9.

Ae, e maata atu te kite o te Atua ia tatou me pau mai aia i tetai au patianga ei meitaki rai no tatou. E pau ua mai ana a Iehova ei meitaki no to tatou, kia rotai ki tona au akakoroanga aroa tei rekotiia i roto i te Pipiria.