PENEI i pati ana koe i tetai Are Patireia o te Au Kite o Iehova i te ngai e noo ra koe e kua manako koe e eaa ra te raveia ra i roto i tera are. Kua kite koe e ka akatika uaia tetai tangata i te aere ki ta ratou au uipaanga i te au epetoma? Ka ariki akaaka uaia te au manuiri.

Inara, penei e au uianga taau. Eaa te Au Kite o Iehova i uipa kapiti ei? Eaa te raveia ana i ko i taua au uipaanga ra? E eaa ta te au manuiri kare i te Au Kite o Iehova e tuatua ra no runga i te au uipaanga?

Mei te tuatau taito mai, e akaputuputu mai ana te au tangata i te akamori e te apii no runga i te Atua. E vaitata ki te 3,500 mataiti i topa, kua akakiteia ki te ngati Iseraela e: “E akaputuputu mai i te au tangata, i te tane, e te vaine, e te tamariki, e to tangata ke i roto i to au oire ra, kia akarongo ratou, e kia apii, e kia mataku i to kotou Atua ra ia Iehova, kia akamako, e kia rave oki i te au tuatua ravarai o teianei ture.” (Deuteronomi 31:12) No reira, i roto ia Iseraela e apiiia ana te au tamariki e te aronga mamaata kia akamori e kia akarongo ki te Atua ko Iehova.

I te au anere mataiti i muri mai, i te akanooia anga te putuputuanga Kerititiano, kua rave uaia atu rai te au uipaanga ei au tuanga puapinga no te akamorianga mou. Kua tata te apotetoro ko Paulo e: “Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi.” (Ebera 10:24, 25) Mei te pirianga rai o te ngutuare tangata e akaketaketaia ra me taokotai mai te au mema o te ngutuare tangata, ka akaketaketa katoaia te pirianga aroa i rotopu i te aronga e inangaro ra i te tavini i te Atua me uipa taokotai mai te au Kerititiano no te akamorianga.

Kia rotai ki teia au Tuatua Tapu i mua akenei, e uipa taokotai ana te Au Kite o Iehova i ko i to ratou Are Uipaanga Patireia e rua taime i te epetoma. E tauturu ana teia au uipaanga i te aronga tei tae mai kia kite i te puapinga, kia marama, e kia taangaanga i te au kaveinga Pipiria. I te au tuanga ka tau, aiteite ua te porokaramu i roto i te ao katoa, e ko te au uipaanga tataki tai e au akakoroanga pae vaerua rai tona. I mua ake e i muri ake i te au uipaanga, te mataora ra te aronga tei tae mai i te ‘akapumaana’ no te au pukapukaanga akamaroiroi. (Roma 1:12) Eaa te tupu ana i ko i teia au uipaanga tataki tai?

Ko te uipaanga mua ta te maataanga o te tangata e aere mai ana ko te akoanga Pipiria tei akanooia no te katoatoa rava, e raveia ana i te openga epetoma. Kua oronga putuputu a Iesu Karaiti i te au akoanga ki te katoatoa rava—ko tetai o teia ko te Tuatua rongonui i runga i te Maunga. (Mataio 5:1; 7:28, 29) Kua tuatua te apotetoro ko Paulo ki te au tangata o Atene. (Angaanga 17:22-34) Na te aru anga i ta Iesu raua ko Paulo i rave, te akaari maira te au uipaanga a te Au Kite o Iehova i tetai akoanga tei akanoo tikaiia na te katoatoa, penei tetai ia ratou ka tai nei ka tae mai ki te uipaanga.

E akamata ana te uipaanga ki te imene no roto mai i te puka imene Sing Praises to Jehovah. * Ko te aronga katoatoa e inangaro ra i te tu ki runga e kia kapiti mai i te imene anga i taua imene ra, ka ariki uaia. I muri ake i tetai pure poto, ka tuatua mai tetai vaa tuatua tau i tetai ako e 30 miniti. (Akara i te pia “ Au Akoanga Puapinga na te Katoatoa Rava.”) Te akatumu pakariia ra tana akoanga ki runga i te Pipiria. Ka pati putuputu mai te vaa tuatua ki te katoatoa kia akara mai i te au irava e kia aru i te au irava e tatauia maira. No reira, penei ka inangaro koe i te apai mai i taau uaorai Pipiria, me kore penei ka pati atu koe ki tetai o te Au Kite o Iehova no tetai Pipiria i mua ake i te uipaanga.

I roto i te maataanga o te au putuputuanga o  te Au Kite o Iehova, i muri ake i te akoanga, ko te Apii Punanga Tiaki, e uriuri anga okotai ora no te au uianga e te au pauanga no runga i tetai tumu manako o te Pipiria. Te akamaroiroi ra teia uipaanga i te aronga tei tae mai kia aru i te akaraanga o te au tangata o Berea i te tuatau o Paulo, kua “āriki ua oki ratou i te tuatua ma te ngakau maora, e te kimi anga i te tuatua i tataia ra.”—Angaanga 17:11.

E akamata ana te Apii Punanga Tiaki ki tetai imene. Ko te akakiteanga e uriuriia ra e te au uianga e uiia ra e te tangata akaaere tei roto te reira i te tuanga apii o teia makatini. Penei ka rauka mai tetai kopi o te tuanga apii naau mei ko mai i tetai o te Au Kite o Iehova. Te au tumu manako tei uriuriia i topa ua akenei te o maira: “E te Au Metua—Tereni i ta Kotou Tamariki i Roto i te Aroa,” “Auraka te Kino e Tutakiia Atu ki te Kino i te Tangata Ravarai Nei,” e e “Eaa te Mamae Anga Katoatoa ka Ope ei Kare e Roa Atu Ana.” Noatu e e raveia ana te uipaanga na roto i te uianga e te pauanga, ka ariki uaia te paupau anga a te aronga e akarongo maira, e e orongaia mai ana te pauanga e te aronga tei tatau ana e tei akamanako ana i te au atikara e te au irava turuturu i mua ake i te apiianga. Ka taopenga te uipaanga ma tetai imene e te pure.—Mataio 26:30; Ephesia 5:19.

E tai aiai i te au epetoma tataki tai, e uipa ana te Au Kite o Iehova i ko i te Are Uipaanga Patireia no tetai porokaramu e toru tuanga e 1 ora e te 45 miniti te roa. Ko te tuanga mua ko te Apii Pipiria a te Putuputuanga, e 25 miniti te roa. Ka tauturu te reira i te aronga tei tae mai kia kite i ta ratou Pipiria, e kia akatanotano i to ratou manako e to ratou tu, e kia meitaki atu ei au pipi na te Karaiti. (2 Timoteo 3:16, 17) Mei te Apii Punanga Tiaki rai, e uriuri anga teia uipaanga i tetai uianga e te pauanga no runga i tetai tumu manako o te Pipiria. Ka ariki uaia tetai tangata  kia tuatua mai. Te tauturu no teia apii Pipiria, e puka me kore e poroutia neneiia e te Au Kite o Iehova.

Eaa te au puka tei akatumuia ki runga i te Pipiria i taangaangaia ai i ko i te uipaanga? I te tuatau o te Pipiria, kare e rava ua i te tatau i te Tuatua a te Atua. “E kua akakite i te ariteanga, e [kua] kite akera ratou i tei tatauia ra.” (Nehemia 8:8) I teia au mataiti ua akenei, ko te au puka te uriuri ra i te au puka o Isaiah, o Daniel, e Revelation, kua tauturu i te aronga tei tae mai ki te uipaanga kia marama i teia au tuanga o te Pipiria.

Aru mai i te Apii Pipiria a te Putuputuanga ko te Apii Orometua Teokaratiki. Ko teia uipaanga e 30 miniti, kua akanooia ei tauturu i te au Kerititiano kia ‘rave karape i te apiianga.’ (2 Timoteo 4:2, NW) Ei akaraanga, kua ui atu ainei taau tamaiti me kore tetai oa i tetai uianga no runga i te Atua me kore i te Pipiria e kua ngata ia koe i te pau meitaki atu? Ka rauka i te Apii Orometua Teokaratiki i te apii ia koe akapeea i te oronga i te au akamaroiroianga, te au pauanga akatumuia ki runga i te Pipiria no te au uianga ngata. No reira ka tau tatou kia tuatua i te tuatua a te peroveta ko Isaia, tei akakite e: “Kua oronga mai te Atu ra ko Iehova kiaku i te arero o te aronga i apiiia; kia tika iaku kia tauturu atu i tei roiroi ki te tuatua.”—Isaia 50:4.

E akamata ana te Apii Orometua Teokaratiki ki tetai tuatua akatumuia ki runga i tetai tuanga o te Pipiria, e ko te aronga tei tae mai kua akamaroiroiia ana kia tatau i te reira i te epetoma i mua ake. Aru mai i te tuatua, ka pati te vaa tuatua i te katoatoa kia tuatua poto mai no runga i te au manako tei akanooia no te tatauanga ta ratou i kite mai e e mea puapinga. I muri ake i teia uriurianga, ka aere atu te aronga apii e tuanga ta ratou i te oronga i ta ratou au tuanga tei akanooia.

E akanooia ana te aronga apii kia tatau mai i tetai tuanga o te Pipiria mei runga mai i te paata me kore i te akatutu mai e akapeea i te apii i tetai tumu manako Tuatua Tapu ki tetai tangata ke. I muri ake i te tuatua tataki tai, ka akameitaki tetai tangata ako tukatau i te tangata apii no tana i rave meitaki, na te akatumu anga i tana au tuatua ki runga i te puka Benefit From Theocratic  Ministry School Education. I muri ake, ko raua ua, ka oronga aia i tetai akamaroiroianga e akapeea te tangata apii e meitaki atu ei.

Ka riro teia tuanga tere viviki o te porokaramu tei akanooia i te tauturu i te tangata apii pera katoa i te katoatoa tei tae mai e te inangaro ra kia meitaki atu ta ratou tatau anga, tuatua anga, e te kite karape i te apii. I muri ake te oti anga te Apii Orometua Teokaratiki, na tetai imene akatumuia ki runga i tetai irava mei roto mai i te Pipiria e akamata mai i te Uipaanga Tavini Anga.

Ko te tuanga openga o te porokaramu ko te Uipaanga Tavini Anga. Na te au tuatua, te akatutuanga, te au uiuianga, e te paupau anga a te katoatoa, ka kite mai te aronga tei tae mai e akapeea i te apii meitaki tikai i te tuatua mou o te Pipiria. I mua ake ka tono ei i tana au pipi kia aere kia tutu aere, kua akaputu mai a Iesu ia ratou e kua oronga atu i te au ikuikuanga taka meitaki. (Luka 10:1-16) I teianei kua akapapa meitakiia tikai ratou no te angaanga evangeria, e kua mataora ratou i te au tupuanga e manganui. I muri mai, kua ripoti mai te au pipi a Iesu kiaia. (Luka 10:17) Kua akakitekite putuputu ana te au pipi i te au tupuanga ki tetai e tetai.—Angaanga 4:23; 15:4.

Ko te porokaramu e 35 miniti no te Uipaanga Tavini Anga, kua tataia ki roto i tetai nuti reta o te marama tataki tai, tei kapikiia e ko Ta Tatou Angaanga Patireia. Te au tumu manako tei akamanakoia ana te kapiti maira i te: “Akamorianga ia Iehova ei Pamiri,” “Eaa Tatou ka Oki ua Ai,” e “E Aru ia Karaiti i Roto i Taau Angaanga Orometua.” Te taopenga ra te porokaramu ki te imene, e na tetai mema o te putuputuanga tei akanooia e oronga i te pure openga.

E tauta ana te au putuputuanga i te ariki i te katoatoa rava. Ei akaraanga, kua akarongo ana a Andrew i tetai au tua kino e manganui no runga i te Au Kite o Iehova. Inara i tona aere anga mai ki tana uipaanga mua, kua poitirere aia i te turou oaoa tei akaariia mai kiaia. “E ngai mataora tikai te reira,” i tuatua ai a Andrew. “Kua poitirere tikai au i te tu oaoa o te tangata e to ratou manako mai anga iaku.” Kua akatika a Ashel, e mapu no Kanata mai e. “E reka tikai te uipaanga! Mama ua i te aru i te reira.”

Ko José, e noo ana i Paratiri, e tu marokiakia tikai tona tei kiteaia i te ngai e noo ra aia. Noatu rai, kua patiia aia kia aere mai ki tetai uipaanga i ko i te Are Uipaanga Patireia i te ngai e noo ra aia. “Kua ariki akaakaia mai au e te aronga i ko i te Are Uipaanga Patireia, noatu e kua kite ratou i toku tu i mua ana,” i karanga ai aia. Kua maara ia Atsushi, e noo ana i Tiapani, e: “Ka karanga au e i toku aere anga ki taku uipaanga mua ma te Au Kite o Iehova, manga emiemi rai au. Noatu rai, kua kite mai au e aiteite ua rai au ki teia aronga. Kua tauta tikai ratou i te akapumaana mai iaku.”

Mei ta te au tuatua i runga akenei e akaari maira, ko te aere anga ki te au uipaanga i ko i te Are Uipaanga Patireia ka riro ei tupuanga meitaki tikai. Ka apii koe no runga i te Atua, e na roto i te au ikuikuanga tei akatumuia ki runga i te Pipiria te ka rauka ia koe no reira mai, ka apii mai te Atua ko Iehova ia koe “i te mea e puapingaʼi koe.”—Isaia 48:17.

Kare te au uipaanga a te Au Kite o Iehova e tutakiia ana, e kare e raveia ana te koi moni. Ka inangaro ainei koe kia tae mai ki tetai uipaanga i ko i te Are Uipaanga Patireia i ko i te ngai e noo ra koe? Te pati akaakaia atu nei koe kia rave i te reira.