1 E Irinaki i te Pipiria

“Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa.”—2 Timoteo 3:16.

EAA TE AKAAPAANGA? E manganui te karanga ra e ko te Pipiria e puka anake uaia no te kite pakari o te tangata. Te irinaki ra tetai pae e kare te au papaanga tuatua enua i roto i te Pipiria e tika ana. Ko tetai pae te karanga ra e ko te akoanga a te Pipiria kare e tau ana e kare no to tatou tuatau.

AKAPEEA KOE E AKAKORE EI I TE AKAAPAANGA? Te maataanga o te taime, ko te aronga kare e irinaki ana i te Pipiria e kare e manako ana e e mea puapinga te reira, kare ratou i kimikimi meitaki ana i te au manako no runga i te reira. Te ripiti ua ra ratou i ta tetai ke e tuatua ra. Inara, te akamatakite maira te Pipiria e: “Te akarongo ra te kite kore i te au tuatua katoa ra: te akara meitaki ra te tangata akono ra i tona takainga.”—Maseli 14:15.

Ma te kore e manako ariki ua i ta tetai ke e tuatua ra, kare ainei koe e aru i te akaraanga a te au Kerititiano i Berea o te anere mataiti mua, i te tua tokerau o Ereni i teianei? Kare ratou i ariki ua i ta tetai ke i akakite mai kia ratou. Kareka ra, kua kite matauia ratou no “te makitoro marie anga i te au Tuatua Tapu i te au ra ravarai me e tika teia au mea nei.” (Angaanga 17:11, NW) Ka akamanako poto ana tatou e rua tumu eaa koe ka irinaki ei e, e Tuatua akauruia te Pipiria na te Atua.

E tika tikai te au papaanga tuatua enua i roto i te Pipiria. I te au mataiti i topa, kua akaapa te aronga ekoko—e te akaapa nei rai—i te tikaanga tikai o te Pipiria no runga i te au ingoa o te tangata e te au ngai tei taikuia mai. Inara, e maata te taime kua rauka mai te akapapuanga e kare e tika ana te manako o te aronga ekoko, e e tika tikai te au papaanga o te Pipiria.

Ei akaraanga, i tetai tuatau kua ekoko te aronga apii kite no runga i te ariki o Asura ko Saragona, tei taikuia i roto ia Isaia 20:1. Inara, i te au mataiti 1840, kua akamata te aronga ko apinga taito i te keri i te are o teia ariki. I teianei, ko Saragona tetai o te au ariki o Asura tei kite meitakiia.

Kua ekoko te aronga akaapa no runga ia Ponotio Pilato, te kavana o Roma tei akaue kia tamateia a Iesu. (Mataio 27:1, 22-24) Inara, i te mataiti 1961, kua kitenaia mai i te pae i te oire o Kaisarea i roto ia Iseraela tetai toka, tei runga i reira te ingoa o Pilato e tona taoonga.

No runga i te tikaanga o te tuatua enua o te Pipiria, te karanga ra te itiu o te U.S.News & World Report o Okotopa 25, 1999, e: “Na roto i te au mataara umere, kua akapapu mai te apinga taito o teia tuatau e e tuanga puapinga te tikaanga o te tuatua enua no te Koreromotu Taito e te Koreromotu Ou—i te turuturu anga i te au tuanga maata o te au tua o te au pateriareka o Iseraela, te Aerenga mei Aiphiti, te uanga ariki o Davida, e te oraanga e te au tuatau o Iesu.” Te irinaki anga i  roto i te Pipiria kare e tei runga i te kimi anga a te aronga ko apinga taito, ko taua tikaanga tuatua enua ra, taau ia ka tapapa atu no runga i tetai puka tei akauruia e te Atua.

Te akapuapinga ra te pakari tau i roto i te Pipiria i te au tangata i te au ngai ravarai. I mua roa ake ka kiteaia mai ei te au manumanu rikiriki e ta ratou tuanga akatotoa anga i te au maki, te akakite ra te Pipiria i te au ravenga tama anga te puapinga ra i teia tuatau. (Levitiku 11:32-40; Deuteronomi 23:12, 13) Ka mataora atu te au mema o te ngutuare tangata te taangaanga ra i te akoanga a te Pipiria no te akonoanga i tetai e tetai. (Ephesia 5:28–6:4) Ko tetai tangata te akono ra i te au kaveinga Pipiria ka riro mai ei tangata angaanga pakari me kore ei pu angaanga tau meitaki. (Ephesia 4:28; 6:5-9) Na te taangaanga anga i te au kaveinga Pipiria ka puapinga katoaia tetai i te pae manako ngakau. (Maseli 14:30; Ephesia 4:31, 32; Kolosa 3:8-10) Ka tapapa atu tatou i taua akoanga tau ra mei Tei Anga mai ia tatou.

EAA RA TE TUTAKI? Ko te pakari tei kiteaia i roto i te Pipiria ka akapakari atu i te tangata kamakura. (Salamo 19:7) Pera katoa, me irinaki tikai tatou i te Pipiria, ka tauturu mai te reira ia tatou te kare i rauka ana i tetai atu puka i te rave i te akono anga i te takainga ka aru mai kia rauka te akarongo ketaketa.

No tetai atu akakiteanga maata, e akara i te pene 2, “Te Pipiria—E Puka mei te Atua Mai,” i roto i te puka Eaa Tikai ta te Pipiria e Apii Maira? *

[Tataanga Rikiriki i Raro]