2 Rauka Anga te Kite Tika Tikai i te Atua

“Teia oki te ora mutu kore, kia kite ratou ia koe i te Atua mou ra.”—Ioane 17:3.

EAA TE AKAAPAANGA? Te karanga ra tetai e kare te Atua i te mea tika tikai. Te manako ra tetai pae e kare te Atua i te tangata, e mana ririnui ua aia. Te aronga e irinaki ra e e tangata aia te apii ra i te au apiianga tukeke e koai aia e te au tu tana e akaari maira.

AKAPEEA KOE E AKAKORE EI I TE AKAAPAANGA? E tai mataara kia rauka te kite i te Atua koia oki, e akara i te au mea tana i anga mai. Te karanga ra te apotetoro ko Paulo e: “Te au mea oki [o te Atua] tei kore e tau kia akara ra, tei kitea puia nei ïa, i te au mea katoa i angaia nei, mei te maani anga mai i teianei ao; koia oki, tona ra mana mutu kore anga, e te Atua anga.” (Roma 1:20) Na te akamanako meitaki anga i te au mea i angaia i teianei ao, maata atu taau ka kite no runga i te pakari e te mana o Tei Anga mai ia tatou.—Salamo 104:24; Isaia 40:26.

 Inara, e rauka ai te kite tika tikai i te tu o te Atua, ka anoanoia te tangata tataki tai kia eeu i te Tuatua a te Atua, te Pipiria, e kia akara meitaki i te reira. Auraka e akatika i tetai ke kia iki e eaa taau ka akamanako. Inara, e aru i te akoanga a te Pipiria: “E eiaa e akatau atu i teianei ao: ei tu ke ra to kotou i te akaou anga o to kotou ngakau, kia taka tikai ia kotou i to te Atua ra anoano, tei meitaki, e te tau, e te apa kore oki.” (Roma 12:2) Ei akaraanga, e akamanako ana i te au tikaanga ka aru mai ta te Pipiria ka akaari mai no runga i te Atua.

E ingoa to te Atua. E tauatini ua atu taime kua taikuia mai te ingoa o te Atua i roto i te Pipiria. Te karanga ra a Salamo 83:18 e: “Kia kite ratou e, ko Iehova toou ingoa, e ko koe anake Tei Teitei i te enua katoa nei.”

E manako ngakau to te Atua ko Iehova e te kinokino ra no te au angaanga a te au tangata. I muri ake i to Iehova akamatara mai anga i te iti tangata Iseraela mei te tuikaa i Aiphiti, tetai au taime kare ratou e akarongo ana ki tana akoanga meitaki. Kua ‘tamamae to ratou tu meameaau iaia.’ No ta ratou au angaanga ‘kua tamamae tikai i Tei Tapu Rava o Iseraela.’—Salamo 78:40, 41, NW.

Te manako maira a Iehova ia tatou ei au tangata tataki tai. Te tuatua anga ki tana au pipi, kua karanga a Iesu e: “Kare aina e taki rua mea manu rikiriki e okoia i te asario okotai nei? kare oki tetai o ratou ra e ngaro i to kotou Metua kia topa ki raro i te enua. Te rauru oki o to kotou na upoko, kua ope ïa i te tatauia. Auraka mari kotou e mataku, e maata to kotou meitaki i to te au manu rikiriki e manganui.”—Mataio 10:29-31.

Kare te Atua e akaperepere ana i tetai iti tangata me kore i tetai peu i runga ake i tetai. Kua akakite te apotetoro ko Paulo ki te au tangata Ereni i Atene e kua “anga [te Atua] i te tangata i te pa enua katoa nei i te toto okotai ra, ei noo i te pa enua katoatoa nei.” Kua akakite katoa aia e “kare ra [te Atua] i atea ke atu ia tatou katoa nei.” (Angaanga 17:26, 27) Kua tuatua te apotetoro ko Petero e: “Kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”—Angaanga 10:34, 35.

EAA RA TE TUTAKI? Ko tetai pae “e maroiroi to ratou i ta te Atua, kare ra i te maroiroi kite.” (Roma 10:2) Me kua kite koe e eaa tikai ta te Pipiria e apii ra no runga i te Atua kare koe e akavareia, ka rauka ra ia koe i te “akavaitata atu ki te Atua.”—Iakobo 4:8.

No tetai atu akakiteanga maata, e akara i te pene 1, “Eaa te Tika no Runga i te Atua?,” i roto i te puka Eaa Tikai ta te Pipiria e Apii Maira? *

[Tataanga Rikiriki i Raro]

[Tutu i te kapi 6]

E tai mataara kia rauka te kite i te Atua koia oki, e akara i te au mea tana i anga mai