3 Apii i te Tuatua Mou no Runga ia Iesu

“I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”—Ioane 3:16.

EAA TE AKAAPANGA? Te inangaro ra tetai pae e kia irinaki koe e kare a Iesu i te tangata tika tikai. Kua ariki tetai pae e i ora ana aia, inara te irinaki ua ra e e tangata noa ua aia, kua roa te mate anga.

AKAPEEA KOE E AKAKORE EI I TE AKAAPAANGA? E aru i te pipi ko Natanaela. * Kua akakite tona oa ko Philipa kiaia e kua manako aia e kua kitea e ia te Mesia—“ko Iesu i Nazareta, e tamaiti na Iosepha.” Inara, kare a Natanaela i irinaki ua i ta Philipa tuatua. Kua pau atu aia e: “E meitaki ainei to Nazareta mai?” Noatu ra, kua ariki aia i ta Philipa patianga e “ka aere mai ka akara.” (Ioane 1:43-51) Ka puapinga katoaia koe i te akara meitaki i te akapapuanga no runga ia Iesu. Eaa ra taau ka rave?

E kimikimi meitaki i te akapapuanga tuatua enua e e tangata tika tikai a Iesu. E nga tangata tuatua enua akangateiteia a Josephus raua ko Tacitus, tei ora ana i te anere mataiti mua, kare raua i te Kerititiano. Kua taiku mai raua ia Iesu Karaiti ei tangata tika tikai tei ora ana. Te akataka anga e akapeea te Emepera Roma ko Nero, i te akaapa anga i te au Kerititiano no te ai i ka i roto ia Roma i te mataiti 64 T.N., kua tata a Tacitus e: “Kua akaapa a Nero e kua rave i te takinokinoanga pakari ki runga i tetai pupu tei rikarikaia no to ratou tu ariki koreia, tei kapikiia e te maataanga e e au Kerititiano. Ko Karaitu [Karaiti], te ngai i akamata mai ei te ingoa, tei mamae i te akavaanga maata i roto i te nga rima o to tatou kavana ko Ponotio Pilato i te tuatau i tutara ai a Tiberio.”

Te au tataanga tei taikuia e te aronga tuatua enua o te anere mataiti mua e te rua anere mataiti no runga ia Iesu e te au Kerititiano mua, te karanga ra te Encyclopædia Britannica, 2002 Tataanga, e: “Te akapapu maira teia au tataanga takake e i te au tuatau taito kare roa te au enemi o te Akonoanga Kerititiano i ekoko ana i te tu tikaanga o te tuatua enua no runga ia Iesu, tei taumaroia no te taime mua e kare e rava ana te akapapuanga no runga i te reira i te openga o te 18 anere mataiti, e i te 19 anere mataiti, e i te akamataanga o te 20 anere mataiti.” I te mataiti 2002, kua akakite mai tetai atikara i roto i te makatini The Wall Street Journal e: “Kua ariki takere te maataanga o te aronga apii kite e e tangata tika tikai a Iesu o Nazareta, kare ra tetai aronga irinaki kore i te Atua i ariki ana.”

E akamanako ana i te akapapuanga e kua akatuia mai a Iesu. To Iesu opuia anga e tona  au enemi, kua akaruke tona au oa piri vaitata iaia, e kua pikikaa tona oa mataku ko Petero e kare aia i kite iaia. (Mataio 26:55, 56, 69-75) I muri ake i to Iesu opuia anga, kua pueurikiriki ke atura tana au pipi. (Mataio 26:31) Kare i roa ana kua maroiroi akaou mai tana au pipi. Kua aravei mataku kore atu a Petero raua ko Ioane i te aronga tikai tei parani i to Iesu mate. Kua akakeu tikaiia te au pipi a Iesu e kua akatotoa ratou i tana apiianga na roto i te Patireia o Roma, te iki anga i te mate ma te kore e inangaro i te akaruke i to ratou irinakianga.

Eaa ra tetai tumu no teia tauianga maata i roto i to ratou tu? Kua akamarama mai te apotetoro ko Paulo e kua akatuia mai a Iesu mei te mate e kua ‘kiteaia aia e Kepha [Petero], e te ngauru ma rua.’ Kua tuatua katoa mai a Paulo e: “E muri akera oki, i kitea aia e te au taeake e rima katoa anere e e ara, okotai rai kite anga.” Te maataanga o te aronga kite mata te ora ra rai i te tuatau i tata mai ei a Paulo i taua au tuatua ra. (1 Korinetia 15:3-7) Te akakiteanga a tetai me kore a nga kite mata e rua, mama ua i te aronga ekoko i te akakore atu. (Luka 24:1-11) Inara, te akakiteanga a te au kite mata e rima anere e ara atu, te akapapu maira e kua akatuia mai a Iesu mei te mate.

EAA RA TE TUTAKI? Te aronga e irinaki ra ia Iesu e te akarongo ra iaia ka akakoreia ta ratou ara e ka rauka ia ratou tetai akava ngakau ma. (Mareko 2:5-12; 1 Timoteo 1:19; 1 Petero 3:16-22) Me mate ratou, te taputou maira a Iesu e ka akatuia mai ratou i “te rā openga.”—Ioane 6:40.

No tetai atu akakiteanga maata, e akara i te pene 4, “Koai a Iesu Karaiti?,” e te pene 5, “Te Oko—Ta te Atua Apinga Aroa Maata Rava Atu,” i roto i te puka Eaa Tikai ta te Pipiria e Apii Maira? *

[Au Tataanga Rikiriki i Raro]

[Tutu i te kapi 7]

Mei ia Natanaela rai, e kimikimi meitaki i te akapapuanga no runga ia Iesu