4 Akakore Atu i Toou Manako Ekoko

“E akarongo meangiti ua toou, eaa koe i ekoko ei?”—Mataio 14:31, NW.

EAA TE AKAAPAANGA? I tetai au taime kua ekoko katoa te au pipi a Iesu. (Mataio 14:30; Luka 24:36-39; Ioane 20:24, 25) Te akataka maira te Pipiria e te aite ra te ngere anga i te akarongo ki “te ara e rokoia ngoie ei tatou nei.” (Ebera 12:1) Kua tata te apotetoro ko Paulo e: “Kare oki i ope katoatoa te tangata i te akarongo.” (2 Tesalonia 3:2) Ka rauka i tetai pae i te taangaanga i teia akarongo. E manganui kare e tauta ana kia rauka te reira. Ka akameitaki mai te Atua i te au tautaanga a te aronga e taangaanga ra i te reira.

AKAPEEA KOE E AKAKORE EI I TE AKAAPAANGA? E akataka i te au manako te akaekoko ra ia koe. Ei akatauanga, kua ekoko te pipi ko Toma e kua akatuia mai a Iesu, noatu e kua akakite ana tetai au pipi e kua kite ana ratou iaia. Kua inangaro a Toma i tetai akapapuanga. Eaa tei tupu mai? Kua  oronga atu a Iesu i te akapapuanga kiaia tana e anoano ra kia ketaketa tona akarongo.—Ioane 20:24-29.

Na roto i te Pipiria, kua oronga mai te Atua ko Iehova i te au pauanga ta tatou e anoano ra kia akakore atu i to tatou manako ekoko. Ei akaraanga, e manganui kua kore to ratou akarongo i roto i te Atua, no te mea kua akaapa tika atu me kore kua akaapa manako kore ua ratou iaia no te au tamaki, te kino, e te manamanata te tupu ra ki te au tangata. Eaa ta te Pipiria e karanga ra no runga i teia manako?

Kare te Atua e tutara ana na roto i te au kavamani a te tangata. Kua taiku a Iesu i te vaerua kitea koreia ko Satani e ko “te ariki o teianei ao.” (Ioane 14:30) Kua oronga a Satani kia Iesu te mana ki rungao i te au patireia katoatoa o te enua no tetai akamorianga e tai, i te na ko anga e: “E oronga atu au i te au [me kore, mana], e te inuinu i teianei pa enua, kia koe na; kua tukuia mai oki kiaku, e naku e oronga atu na taku tangata e inangaro.” Kare a Iesu i patoi ana e tei ia Satani taua mana ra. Inara, kua tuatua Aia e: “Kua tataia oki e, ‘Ko toou Atua ra ko Iehova taau e akamori, e koia anake rai taau e akarongo.’” (Luka 4:5-8) Ko Satani, e te au kavamani a te tangata te ka akaapaia no te au mamae i teianei ao, kare ko te Atua.—Apokalupo 12:9, 12.

Kare e roa atu ana ka takore te Atua ko Iehova i te au tumu ravarai no te mamae. Kua akapapa takere aia i tetai Patireia, me kore i tetai kavamani, kia tutara i runga ake i te au tangata, i raro ake i te akatere anga a tana Tamaiti, ko te Karaiti ko Iesu. (Mataio 6:9, 10; 1 Korinetia 15:20-28) I te akatupu anga i te totou Pipiria, te tutu aereia nei te tuatua meitaki no runga i teia Patireia e kako rava ake teianei ao. (Mataio 24:14) Kare e roa atu ana ka takore teia Patireia i te katoatoa te patoi ra i te reira e ka takore i te au tumu mamaeanga o te au tangata.—Daniela 2:44; Mataio 25:31-33, 46; Apokalupo 21:3, 4.

EAA RA TE TUTAKI? Te aite ra te aronga ekoko mei te au ngaru rai, te tauriuriia ra ‘e te matangi, i tera tuatua i tera tuatua, mei te tamariki ra, i te ravenga a te tangata nei.’ (Ephesia 4:14; 2 Petero 2:1) Ei tuke ra, te aronga tei kite mai i te au pauanga meitaki no ta ratou au uianga, ka rauka i te ‘mou piri tikai i te akarongo.’—1 Korinetia 16:13.

Ka inangaro te Au Kite o Iehova, te aronga nenei o teia tianara, i te tauturu ia koe kia rauka mai te au pauanga ki te au uianga te akaekoko ra i toou akarongo. Te pati maira ratou ia koe kia taokotai mai kia ratou e te makitoro marie anga i ta ratou au apiianga. Me rave koe i teia ka akaketaketa maataia toou akarongo i roto i te Atua.

No tetai atu akakiteanga maata, e akara i te pene 8, “Eaa te Patireia o te Atua?,” e te pene 11, “No Teaa ra te Atua i Akatika ua ai i te Mamae?,” i roto i te puka Eaa Tikai ta te Pipiria e Apii Maira? *

[Tataanga Rikiriki i Raro]

[Tutu i te kapi 9]

Te aronga tei kite mai i te au pauanga meitaki no ta ratou au uianga e tumuanga ketaketa ia no to ratou akarongo