Arataki ra Ainei te Akonoanga Katoatoa ki te Atua Okotai?

“E akonoanga rai taku, kare au e taui. Kare e kino ana eaa taau akonoanga no te mea e tai rai Atua ta te akonoanga katoatoa e akamori nei.”

KUA rongo ana koe i tetai tangata i te tuatua anga i tera manako? E manganui te au tangata te manako ra e ka rauka i tetai ua atu akonoanga i te tauturu ia koe i te kimi i te Atua e te marama i te aiteanga o te oraanga. Te aiteite ra te au irinakianga e tei roto i te au akonoanga ravarai te meitaki e te kino, e e manganui te karanga katoa ra e auraka tetai e karanga mai e na ratou ua te tuatua mou e ko ta ratou akonoanga ua te mataara ki te Atua.

E rekaia ana taua au manako ra i rotopu i te au tangata i to tatou tuatau, te karanga ra e te ariki ua ra ratou i te reira e te manako ra e ko te au irinakianga tukeke, aiteite ua to ratou puapinga. Ko te tikaanga, ko te aronga kare e manako akapera ana e manako putuputuia ana e e aronga papakitai, e e aronga akavaavaa katoa. Eaa toou manako? Te manako ra ainei koe e te arataki tikai ra te akonoanga katoatoa ki te Atua okotai? E puapinga ainei e ko teea akonoanga ta tetai tangata ka piri atu?

Tuke Anga Ainei Tikai Tetai?

Kia tau ki ta tetai enetaikoropitia, e 9,900 akonoanga i teianei i roto i te ao katoa e pini ua ake, tei roto i te au tuanga maata o teianei ao tetai e e mirioni ua atu o ratou au mema. Kua tamanakoia mei tetai 70 patene o te au tangata tei roto i te au akonoanga mamaata e rima—te Akonoanga Buda, Initu, Itirama, ngati Iuda, e te Kerititiano. Me te arataki ra te akonoanga katoatoa ki te Atua okotai, tano tikai ka aiteite pouroa te au apiianga a teia au akonoanga e rima, ta ratou akataka anga i te Atua, e ta ratou  akamarama anga i te akakoroanga o te Atua. Eaa ta te au akakiteanga e akaari maira?

Te karanga ra te tangata apii Katorika Roma ko Hans Küng e aiteite ua tetai au irinakianga a te au akonoanga mamaata i roto i ta ratou akono anga i tetai e tetai. Ei akatauanga, te maataanga ia ratou kare e ariki ana i te ta, te pikikaa, te keia, te pirianga ainga kopu tangata, e te apii ra ratou i te akangateitei i te au metua pera katoa i te inangaro i te au tamariki. Inara, i roto i tetai atu au akakiteanga, e i roto tikai i ta ratou akataka anga mai i te Atua, tukeke tikai teia au akonoanga mamaata.

Ei akaraanga, e manganui te au atua ta te au Initu e akamori ana, inara te karangaia ra e kare te aronga akamori ia Buda e papu roa ana no runga i tetai Atua. Te apii ra te akonoanga Itirama e e okotai rai Atua. Pera katoa rai te au akonoanga te karanga ra e e Kerititiano ratou, inara te maataanga te karanga katoa ra e e Toru Tai te Atua. I roto katoa i te au akonoanga, e maata te au irinakianga tukeke. Kua riro a Maria, te metua vaine o Iesu, ei akamorianga na te Katorika, inara kare te au Porotetani e akamori ana iaia. Kua patoi te Katorika i te paruru anga kia kore e nui, inara kare te maataanga o te Porotetani e patoi ana i te reira. E i rotopu i te au Porotetani kare ratou e ariki ana i te tumu manako no te pirianga te tane e te tane.

Ka tau ainei i te manako e ko te au akonoanga te ariki ra i taua au irinakianga tukeke te akamori katoatoa ra ratou i te Atua okotai? Kare rava. Inara, ka tupu mai te manako kononinoni e koai te Atua e eaa tana e tapapa maira no te aronga e akamori ra iaia.

Te Taokotai ra me te Akavee Ra?

Me te arataki ra te akonoanga katoatoa ki te Atua okotai, papu e ka kite tatou i te au akonoanga i te tauta anga i te taokotai i te au tangata kia akatupu i te au. Te akapapu maira ainei te au akakiteanga e te rave ra ratou i teia? Te akakite maira te tuatua enua e kare te akonoanga e taokotai ana i te au tangata, inara te akatupu ra i te veeanga e te ta anga i te tangata. Ka akara ana tatou i tetai au akaraanga tokoiti ua.

Mei te 11 ki te 13 anere mataiti, kua o atu te au enua Kerititome te karanga ra e e Kerititiano ratou, ki roto i te tamaki i raro ake i te mana tutara o Itirama i roto i te Au Tamakianga Tapu. I roto i te 17 anere mataiti i Europa, kua o atu te Katorika e te Porotetani ki roto i tetai Tamakianga e Toru Ngauru Mataiti. I te mataiti 1947, te akakite vaveia anga te takake mai anga a Initia mei ia Peritane, kua tamaki atu te Akonoanga Initu i te Akonoanga Muslim. Kua roa te au mataiti i te tamaki anga te Katorika e te Porotetani i te Pae Tokerau o Airerani. I roto i te au enua i te Itinga o te Tai Metiterenia, kare te ngati Iuda e te Muslim e au ana ki tetai e tetai. E ko te akaraanga maata rava atu ko te Tamaki II o te Ao, kua tonoia te au mema o te au akonoanga mamaata e rima ki te tamakianga, te piri atu anga te au mema o taua au akonoanga ra i te tamakianga ia ratou uaorai.

Papu tikai te taopenga anga. Kare te au akonoanga o teianei ao i akatupu ana i te au e te taokotaianga, kare katoa te reira e arataki atu ana ki te Atua okotai. Ei tuke ra, kua akavee ratou i te au tangata ravarai e kua akakononinoni i te manako o te au tangata e koai te Atua e akapeea i te akamorianga iaia. No reira, ko tetai ua atu tangata e inangaro ra i te kite i te Atua mou kia matakite i te iki i tana e aru ra. Te rotai ra teia ki  ta te Pipiria e akamaroiroi maira, ko te puka akonoanga taito roa atu tei kiteaia e te au tangata.

E Akataka Ana Kotou i ta Kotou e Akamori

Te akaari meitaki maira te Pipiria e te rauka anga te mataara te arataki atura ki te Atua mou te umuumuia ra te manako meitaki e te ikianga papu tikai. Kua tuatua a Iosua, e tavini no te Atua ko Iehova, ki te iti tangata taito o Iseraela e: “E akataka ana kotou i teianei rā i ta kotou e akamori; e ko te au atua ainei ta to kotou ai metua i akamori i tetai pae vai ra, e te au atua ainei o te ngati Amori nei, no ratou te enua ta kotou e noo nei? Kareka au e toku ra ngutuare, e akamori ïa matou ia Iehova.” I te au mataiti i muri mai, kua raurau te peroveta ko Elia i te au tangata kia rave i taua ikianga katoa ra: “Mei te aa te roa o tenana ekoko rua anga? ko Iehova te Atua ra, e aru iaia: ko Baala ra [atua no te ngati Kanaana], e aru iaia. Kare akerai te tangata i ki mai kiaia.”—Iosua 24:15, 16; 1 Ariki 18:21.

Te akaari tikai maira teia au tuatua e tetai atu au irava o te Pipiria e ko te aronga te inangaro ra i te akamori i te Atua mou kia rave i tetai ikianga papu tikai. Aiteite ua te turanga i teia tuatau. Me inangaro tatou i te akamori i te Atua mou, e rave katoa tatou i te ikianga tika. Inara eaa te ka tauturu ia tatou i te rave anga i te reira ikianga i roto i te au tumu no te akamorianga? Akapeea tatou e kite ei e koai ma te aronga akamori mou?

Kiteaia te Aronga Akamori Mou i ta Ratou e Ua Maira

No runga i te aronga akamori mou e te pikikaa, kua akakite a Iesu Karaiti ki tana au pipi e: “No runga aina te vine i te tataramoa i te aki anga mai; e te suke no runga aina i te rakau taratara? E ua mai te au rakau meitaki katoa i te ua meitaki; e te au rakau kikino ra, e ua mai ïa i te ua kino. . . . Ka kite kotou ia ratou i ta ratou e ua maira.” Pera katoa, ka kiteaia te aronga akamori mou i ta ratou e ua maira, me kore no ta ratou au angaanga. Eaa ra teia au ua?—Mataio 7:16-20.

Te mea mua, te taokotai ra te akamorianga mou i te aronga irinaki i roto i te aroa. Kua akamarama atu a Iesu ki tana au pipi e: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” E mea tau kia akaari te au pipi mou a Karaiti i te aroa ki tetai e tetai, te akatakaanga ia ratou ei aronga akamori mou ki te aronga katoatoa e akara maira.—Ioane 13:34, 35.

No teia tumu kare e tau no te au Kerititiano mou kia tamaki atu i tetai e tetai i roto i te tamaki. Te akono ra ainei te au mema o te akonoanga i teia turanga? I roto i te Tamaki II o te Ao, ko te akonoanga mamaata anake ua tei patoi pakari e tei patoi ngaueue kore i te turuturu i te tamaki, ko te Au Kite o Iehova. Kua tata te  Dr. Hanns Lilje, e epitikopo no mua ana no te Akonoanga Porotetani i Hannover, Tiamani, no runga i te Au Kite e: “Ka rauka tikai ia ratou i te karanga e ko ratou anake ua te aronga patoi akava ngakau i te tuatau o te Toru o te Patireia o Tiamani.” I te tuatau o taua tamakianga ra, kua iki te Au Kite i roto i te au enua e manganui i te tamamae anga kare i turuturu atu i te tamaki.

Eaa tetai atu au ua ta Iesu e manako ra te ka akataka mai i te au pipi tika tikai? I roto i te pure tei matauia e ko te Pure a te Atu, kua akamata a Iesu i te tuatua e: “Na ko kotou kia pure: E to matou Metua i te ao ra, Kia tapu toou ingoa. Kia tae toou basileia. Kia akonoia toou anoano i te enua nei, mei tei te ao katoa na.” Kua taiku mua mai a Iesu i te akatapuanga i to te Atua uaorai ingoa, ko Iehova. Kua akakite aia i te anoano e na roto i te Patireia o te Atua, ka akonoia to Iehova anoano i te enua nei. Koai ra te akonoanga te kiteaia ra e te akakitekite aere ra i te ingoa o Iehova, e te akakitekite aere anga e ko te Patireia o te Atua te manakonakoanga anake ua o te au tangata no te au i runga nei i te enua? Kua tutu aere te Au Kite o Iehova i te tuatua meitaki o te Patireia i roto i te au enua e te au ngai e 236, te tua anga i te au puka i roto i te au reo e 470 tuma.—Mataio 6:9, 10.

Tei maata atu, te aru ra te Au Kite o Iehova i te akaraanga o Iesu kia kore e o atu ki roto i te au angaanga poritiki e te au manamanata i rotopu i te au tangata. “No te mea kare ratou no teianei ao, mei iaku nei rai oki kare i to teianei ao,” i karanga ai a Iesu ki tana au pipi. Pera katoa, kua ariki te Au Kite i te Pipiria e ko te Tuatua a te Atua e kua papu e ko “te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra. Kia apa kore te tangata o te Atua, ma te tau tikai i te au angaanga memeitaki katoa ra.”—Ioane 17:14, 17; 2 Timoteo 3:16, 17.

Tuke te Akonoanga Mou

Ko teia au ua—te aroa akaatinga uaorai, te anoano i te akatapu i to Iehova ingoa, te akakitekite anga i te Patireia o te Atua, te takake anga mai mei teianei ao, e te irinaki anga i roto i te Pipiria—e au akatakaanga ravarai no te aronga akamori mou. Te akatakake katoa nei taua au ua ra i te aronga akamori ngakau tae mei tetai au akonoanga ke. Ko tetai vaine tei rekareka maata i te pukapuka ki te Au Kite o Iehova kua manako aia e kua karanga e: “E manganui taku au akonoanga i kite, aiteite ua ratou katoatoa. Ko kotou anake ua te akonoanga tuke ake rai i te au akonoanga ke.”

Te taka ua ra e kare te akonoanga katoatoa e arataki ra ki te Atua okotai. Inara te vai ra e tai pupu tuke rai mei te akonoanga katoatoa—ko te Au Kite o Iehova, e itu mirioni tuma takapini i teianei ao. Na te akamaroiroi anga e te aru anga i te Tuatua a te Atua, te Pipiria, kua rauka ia ratou i te rave tei kare rava i rauka ana i tetai pupu ke me kore tetai akaaerenga ke i te rave, koia oki, te taokotaianga i te au tangata mei te au enua tukeke, te au reo tukeke, te au turanga eteniki tukeke, te iti tangata tukeke i te akamorianga i te Atua mou okotai, ko Iehova. Ka mataora ratou i te tauturu ia koe kia kite i te Atua mou, kia kimi i tana e umuumu maira, e kia rekareka i te au e te tinamou te aere maira no te akamorianga i te Atua na roto i te tu e mareka ra aia. Kare ainei tera ei akakoroanga puapinga tikai?

[Tutu i te kapi 22]

Te akameitaki ra te orometua Otototi i te pupu vaeau ou i Ukarania i te mataiti 2004

[Akameitakianga]

GENIA SAVILOV/AFP/Getty Images

[Tutu i te kapi 23]

Te tauturu ra te Au Kite o Iehova i te au tangata i te au ngai ravarai kia kite i te Atua e tona Patireia

[Au Akameitakianga no te Tutu i te kapi 20]

Page 20: Buddhist woman: © Yan Liao/Alamy; Hindu holy man: © imagebroker/Alamy; page 21: Man reading Koran: Mohamed Amin/Camerapix; Jewish man: Todd Bolen/Bible Places.com