Eaa ra te Akarongo?

AKAPEEA koe i te akataka anga i te akarongo? E akaaite ana tetai pae i te reira ki te akarongo manako ua. I tuatua ana tetai tangata tata tua e te tata tianara rongonui i Marike, ko H. L. Mencken i te akarongo e “e irinakianga papu kore no tetai apinga kare e tupu mai.”

Te akataka maira ra te Pipiria i te akarongo e kare i te manako ua e te manako papu kore. Te karanga ra te Tuatua a te Atua e: “Ko te akarongo nei, ko te tumu tikai ïa i te au mea i tatariia nei, e te kite ïa i te au mea kare i akaraia nei.”—Ebera 11:1.

I te mea e e tukeke te manako o te tangata no runga i te akarongo, ka akamanako ra tatou i te au pauanga ki te au uianga ka aru mai:

• Eaa i tuke ei te akatakaanga a te Pipiria i ta te manganui e taiku ra me tuatua ratou no runga i te akarongo?

• Eaa i puapinga ai kia akatupu tatou i te tu akarongo ta te Pipiria e akataka maira?

• Akapeea koe i te akaketaketa anga i toou akarongo?

Pepa Tikaanga e te Akapapuanga Tinamou

I te tuatau i tataia ai te puka Pipiria o Ebera, kua taangaanga maataia te tuatua Ereni tei uriia “ko te tumu tikai ïa.” E kite putuputuia ana te reira i roto i te au pepa tikaanga no te pitiniti e te akapapu anga no tetai apinga te ka rauka mai i te tuatau ki mua. No reira, te akakite maira tetai tataanga e ka rauka a Ebera 11:1 i te uriia e: “Ko te akarongo te pepa tikaanga no te au mea e manakonakoia ra.”

Me oko mai koe i tetai apinga mei tetai kamupani te irinaki ra koe, e te tiaki anga kia apainaia mai te reira, te akaari ra koe i te tu irinakianga. Te riro ra te pepa retiti i roto i toou rima ei tumu anga no te irinakianga i te reira kamupani. I roto i taua tu, ko tera pepa retiti taau pepa tikaanga, e akapapuanga e ka rauka mai taau apinga. Me ngaro ra taau pepa retiti me kore kua peiia, kare aau akapapuanga e naau taua apinga ra. Pera katoa, ko te aronga e akarongo to ratou e ka akatupu te Atua i tana au taputou, kua papu e ka orongaia mai ta ratou e manakonako ra. I tetai tua ra, ko te aronga kare o ratou akarongo, kare e rauka mai ia ratou te au mea ta te Atua i taputou mai.—Iakobo 1:5-8.

Te rua o te tuatua i roto ia Ebera 11:1, tei uriia e ko tei “kite ïa,” te oronga maira i te manako no te akatupuanga i tetai akapapuanga te patoi ra i tei manakoia e e mea tika tikai. Ei akatauanga, i te akaraanga, te takapini ra te ra i te enua—te iti anga mai mei te itinga, te neke anga na roto i te tiao, e te opu anga i te opunga. Inara, te akaari maira te akapapuanga a te aronga akara etu e te aronga tare numero e, kare te ra e takapini ana i te enua, inara te takapini ua ra te enua koia anake ua. Me marama tikai koe i taua akapapuanga e kua ariki i te reira ei mea tika tikai, kua irinaki koe e te takapini ra te enua i te ra—noatu eaa ta toou mata e kite ra. Kare toou akarongo i te mea manako ua. Ei tuke ra, te oronga maira te reira i te tu karape kia akara koe i te au mea ei mea tika tikai, kare ei mea manako ua.

Mei Teaa ra te Puapinga o te Akarongo Ketaketa?

Ko teia te tu akarongo ta te Pipiria e akamaroiroi maira—e akarongo ketaketa tei akanooia ki runga i te akapapuanga tinamou, noatu te umuumuia ra kia akatikatika tatou i to tatou au irinakianga. E puapinga tikai taua akarongo ra. Kua tata te apotetoro ko Paulo e: “Kare ra e akarongo ra kare rava aia e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.”—Ebera 11:6.

E manganui te au akaaoanga te ka arairai ia koe i te akatupu anga i te akarongo ketaketa. Inara me taangaanga koe i te takainga e a, te ka uriuriia i roto i te au kapi e aru mai nei, ka puapingaia koe.