Kimi te Vatikana i te Takore i te Ingoa o te Atua

TE KIMI nei te pupu orometua o te Katorika i te takore i te ingoa o te Atua i roto i ta ratou angaanga pure raa. I te mataiti i topa akenei, kua tuku atu te Ekaretia Vatikana no te Akamorianga Atua e te Akoanga no te Au Oroa i te au ikuikuanga no runga i teia manako ki te uipaanga maata o te au epitikopo Katorika i te ao katoa. Kua raveia te takainga “na roto i te akauenga” a te pope.

Kua akaapa pakari tikai teia tataanga, tei tataia i roto ia Tiunu 29, 2008, i te tikaanga e noatu te au ikuikuanga tei akakiteia mai, “i te au mataiti i topa akenei kua o mai te peu no te taikuanga tikai i te ingoa o te Atua o Iseraela, tei kiteaia ko te tetarakaramatona tapu me kore te ingoa o te Atua, tei tataia i roto i te ara reta Epera e a koniteniti i roto i te tu tataanga יהוה, YHWH.” Te akakite maira te tataanga e kua uriia te ingoa o te Atua i roto i te au mataara tukeke. * Inara, te kimi ra te aronga arataki Vatikana i te akanoo akaou i te turanga peu taito a te Katorika. Koia oki, kia monoia te Tetarakaramatona ki te tuatua te “Atu.” Tei maata atu, i roto i te au angaanga akonoanga a te Katorika, te au imene, te au pure, te ingoa o te Atua “kare te YHWH e taangaangaia me kore e taikuia.”

I te turuturu anga i teia turanga, te akakite maira te tataanga Vatikana i te “au peu taito” a te Akonoanga Katorika. Te karanga ra te aronga arataki e i roto katoa i te urianga Septuagint o te au Tuatua Tapu Epera, i mua ake i te tuatau o te au Kerititiano, kua uri putuputuia te ingoa o te Atua ko Kyʹri·os, e tuatua Ereni no te “Atu.” No reira, te maro maira te aronga arataki e, “kare katoa te au Kerititiano mei te akamataanga mai i taiku ana i te ingoa tetarakaramatona o te Atua.” Inara, te kopae ra teia tuatua i te akapapuanga taka meitaki tei akakiteia mai. Tei roto i te au kopi mua o te Septuagint te ingoa o te Atua i roto i te tu יהוה, kare ko Kyʹri·os. Kua kite e kua taiku mai te au pipi a Karaiti o te anere mataiti mua i te ingoa o te Atua. Kua tuatua a Iesu i roto i te pure ki tona Metua e: “E kua akakite atu oki au kia ratou, e e akakite atu rai au, i toou ingoa.” (Ioane 17:26) E i roto i te pure tana i oronga mai ei akaraanga no te au pure, kua apii mai a Iesu ia tatou kia pure e: “E to matou Metua i te ao ra, Kia tapu toou ingoa.”—Mataio 6:9.

Te inangaro ra te au Kerititiano katoatoa kia akatapuia te ingoa o te Atua. Te au tautaanga a te Vatikana i te takore i te reira te akangateitei kore ra ia Iehova, ko tei karanga e: “Ko toku ingoa teia no te au tuatau ravarai; na roto i teia ingoa e akakiteia ai au ki te au uki katoatoa e aere maira.”—Exodo 3:15, The Jerusalem Bible.

[Tataanga Rikiriki i Raro]

[Tataanga i te kapi 30]

“Ko toku ingoa teia no te au tuatau ravarai.”—Exodo 3:15, JB

[Tutu i te kapi 30]

Potonga papa tuatua o te “Septuagint” no te anere mataiti mua T.N. Te ingoa o te Atua, akaariia maira te au reta Epera e a tei uriia ko te YHWH, i roto i te tutu akaira punupunuia

[Akameitakianga]

Courtesy of the Egypt Exploration Society