E Akavaitata Atu ki te Atua

Manako Maira Aia i to Tatou Tu Kotinga

Levitiku 5:2-11

“KUA tauta pakari tikai au, inara kare rava au i manako ana e kua rava te reira.” I karanga ai tetai vaine no tana tautaanga pakari i te akamareka i te Atua. Ka ariki ainei te Atua ko Iehova i te au tautaanga maata a tona aronga akamori? Te akamanako ra ainei aia i to ratou tu karape e te au turanga? E pau ei i teia au uianga, e meitaki i te akamanako eaa tei tuatuaia i roto i te Ture a Mose no runga i tetai au atinga, tei kiteaia i roto ia Levitiku 5:2-11.

I raro ake i te Ture, te umuumu ra te Atua i te au atinga tukeke, ei tapokiangaara. I roto i te au turanga tei taikuia i roto i teia irava, kare te tangata tataki tai i akakoro me kore i manako kore ua i te rave i te ara. (Irava 2-4) Te kite anga aia i tana au ara, ka aaki aia e ka oronga i te atinga tarangaara—‘ei ua punua mamoe, e kare ra, ei ua puakanio.’ (Irava 5, 6) Akapeea me e putaua aia kare e rauka iaia i te oronga i tetai punua mamoe me kore tetai puakanio? Te maro maira ainei te Ture kia pati aia i taua manu ra, te tuku anga iaia ki roto i te kaiou? Ka anoanoia ainei aia kia angaanga ei oko mai i tetai manu, te tavarevare anga i tana atinga tapokiangaara no tana au ara?

I te akamanako anga i to Iehova manako aroa, te tuatua ra te Ture e: “E kia kore e tika iaia kia apai mai i te punua mamoe e te puakanio, ei kukupa tana e apai mai kia Iehova kia rua ake, e kare ra, kia rua ake punua rupe.” (Irava 7) Me e tangata putaua tetai tangata Iseraela no te oko i tetai mamoe, ka ariki mareka ua te Atua i tetai ua atu apinga ka rauka i tera tangata i te oronga—e rua kukupa me kore e rua rupe.

Akapeea me kare e peke i tetai tangata i te oko mai e rua nga manu? “Ei faraoa pueu tana e apai mai i tana apainga, okotai omera [e varu me kore e iva kapu], ei tarangaara,” i akakite mai ei te Ture. (Irava 11) No te aronga putaua, kua ariki ua a Iehova i te reira e te akatika anga i tetai atinga tarangaara ma te kore e toto. * I Iseraela, kare e araiia ana te akameitakianga ki te tangata putaua no te tapokiangaara me kore te tikaanga manea no te akaau anga ki te Atua.

Eaa ta tatou i kite mai no runga ia Iehova mei te ture no runga i te atinga tarangaara? E Atua tangi aroa aia e te marama, te manako maira i te tu kotinga o tona aronga akamori. (Salamo 103:14) Te inangaro ra aia kia akavaitata atu tatou e kia akatupu i tetai pirianga meitaki kiaia, noatu e turanga ngata to tatou, mei te ruaine anga, makimaki te kopapa, no te pamiri me kore no tetai atu au apainga. Ka kite mai tatou i te pumaana i te kite anga e, ka mareka ua te Atua ko Iehova me rave tatou i te au mea ravarai te ka rauka ia tatou i te oronga.

[Tataanga Rikiriki i Raro]