E Akavaitata Atu ki te Atua

Akaperepere a Iehova i te Aronga Maru

Numero 12:1-15

TE PARAU, te vareae, te anoano noinoi. E mea noa ua taua au tu i rotopu i te aronga tei rauka te puapinga i roto i teia ao. Inara ka akavaitata atu ainei taua au tu ia tatou ki te Atua ko Iehova? Kare, e mea puapinga kia Iehova te tu maru i roto i tona aronga akamori. Te kiteaia ra teia i roto i te papaanga o Numero pene 12. Te ngai, ko te metepara o Sinai, muri ake i te akaoraia anga to Iseraela mei Aiphiti.

Kua “tuatua kino iora” a Miriama raua ko Aarona ia Mose, to ratou openga. (Irava 1) Kare raua i aere i te tuatua kia Mose, kua tuatua akakino ra oki raua iaia, kare e kore e na te akaapa anga iaia ki etai ke atu i roto i te puakapa. Ko Miriama, tei taikuia mai na mua, nana i akamata i teia koumuumuanga. Te tumu koia oki no te vaine Kusa a Mose i akaipoipo. Kua vareae ainei a Miriama e ka pou te manako o te iti tangata ki teia vaine—kare ua rai aia i te ngati Iseraela?

E au tumu ke atu rai tetai no te akaapaanga. E tuatua ua ana a Miriama raua ko Aarona e: “Ia Mose anake ra ainei ta Iehova tuatua anga mai? Kare aina aia i tuatua ia taua katoa nei?” (Irava 2) Ko te anoano maata ainei i te turanga mana akaaere e te papanunui te tumu tikai i koumuumu ei raua?

I roto i te papaanga, kare a Mose i ariu atu ana ki taua au akaapaanga ra. Te akaraanga, kua akakoromaki ua aia i te akakino. Kua riro tona tu akakoromaki ei akapapu mai i te akatakaanga a te Pipiria iaia ei tangata ‘maru maata i to te tangata ravarai’ i te enua nei. * (Irava 3) Kare e anoanoia kia akamarama a Mose i te tumu i iki ei a Iehova iaia. Te akarongo maira a Iehova, e kua turu aia ia Mose.

Kia Iehova, koia rai ta raua i koumuumu ei. No te mea nana oki i akamana ia Mose. I te akaapa anga ia raua, kua akamaara atu te Atua kia raua e e pirianga takake rava tona kia Mose: “Te tuatua vaa ua nei au kiaia.” I reira kua ui a Iehova kia Miriama raua ko Aarona e: ‘Eaa i kore ei korua i mataku i te tuatua kino . . . ia Mose?’ (Irava 8) Na te tuatua akakino anga ia Mose, kua apa rai raua i te tuatua akakino i te Atua. No taua tu akangateitei kore ra, ka kite raua e mei teaa tikai te tu o to te Atua riri.

Kua tu iora a Miriama i te repera, nana oki i akatupu i te akakoko. I reira rai kua raurau atura a Aarona ia Mose kia pati tauturu nona. Ka akamanako ua ana—tei runga ua to Miriama ora i te tauturu a te tangata tikai tana i akaapa! Kua rave rai a Mose ma te maru i tei patiia kiaia. I te tuatua anga no te taime mua i roto i teia papaanga, kua pati akatenga atura a Mose kia Iehova no tona tuaine. Kua ora iora a Miriama, tera ra kua kite tikai aia i te akama i te akaateaia anga ki vao mai i te puakapa e itu ra.

Te oronga maira teia papaanga i te marama oonu kia tatou no runga i te au tu ta Iehova e akaperepere ana, e te au peu tana e patoi ana. Me ka inangaro tatou i te akapiri vaitata atu ki te Atua, ka anoanoia tatou kia uritumu ki vao, i tetai ua atu au tu o te ngakau parau, te vareae, e te anoano noinoi e vai nei i roto ia tatou. Ko te aronga maru ta Iehova e inangaro ana. Te taputou maira aia e “Kareka te aronga maru ra, ka noo ïa i te enua, e ka rekareka ratou i te maata o te au.”—Salamo 37:11; Iakobo 4:6.

[Tataanga Rikiriki i Raro]