Apinga Nui no ko i te Atua

ME E akarongo mou toou i te Atua, ka akameitaki ainei aia ia koe ki te apinga nui? Penei, inara kare ko te apinga nui taau e manako ra. Akamanako ana ia Maria, te metua vaine o Iesu. Kua mama atu te angera ko Gaberiela kiaia e kua karanga e koia “tei akaperepere ravaia” e te Atua e ka anau mai aia i te Tamaiti a te Atua. (Luka 1:28, 30-32) E oti akera kare aia i te vaine apinga maata. I te oronga anga a Maria i te atinga i muri ake i to Iesu anau mai anga, kua oronga aia “e rua kukupa, e kare ra, e rua punua rupe,” ko te atinga matauia ia ta te aronga putaua e oronga ana kia Iehova.—Luka 2:24; Levitiku 12:8.

I te mea e e turanga putaua to Maria, ko te aiteanga ainei e kare te Atua e akameitaki mai ana iaia? Kare, i tona aere anga i te atoro ia Elisabeta, tona taeake, ‘ki akerā Elisabeta i te vaerua tapu; E kua kapiki ua maira te reo, na ko maira, Ko koe e Maria tei meitaki i te au vaine nei, e e meitaki oki te uanga o toou kopu.’ (Luka 1:41, 42) Kua rauka ia Maria te tikaanga ngateitei kia riro ei metua vaine no te Tamaiti akaperepere a te Atua i te enua nei.

Kare a Iesu uaorai i te tangata apinga nui. Kare anake ua aia i anauia mai e i utuutuia mai i roto i tetai turanga akaaka ua mari ra e oraanga putaua katoa tona i te enua nei. Kua akakite ana aia ki tetai tangata e inangaro ra kia riro mai ei pipi nana e: “E ana to te suoli; e toanga to te manu o te reva; kareka te Tamaiti a te tangata nei, kare ona e urunga upoko.” (Luka 9:57, 58) Noatu ra, kua riro ta Iesu Karaiti i rave i te aere mai anga ki te enua nei ei akatuera i te mataara no tana au pipi kia rauka te apinga nui maata. Kua tata te apotetoro ko Paulo e: “Riro mai nei aia ei apinga kore, kia maata to kotou apinga i taua apinga kore nona ra.” (2 Korinetia 8:9) Eaa te tu o te apinga nui ta Iesu i oronga no tana au pipi? E eaa te tu o te apinga nui tei rauka ia tatou i teia tuatau?

Eaa te Tu o te Apinga Nui?

E riro ua ana te apinga o te pae kopapa ei arairaianga i te akarongo, no te mea penei ka irinaki ua te tangata apinga nui ki tana moni kare ki te Atua. Kua akakite a Iesu e: ‘Akao ngata te aronga apinga nui, ki te basileia o te Atua!’ (Mareko 10:23) Te papu ua ra e, ko te apinga nui ta Iesu i oronga no tana au pipi kare no te pae kopapa.

Ko te tika ra, ko te manganuianga o te au Kerititiano i te anere mataiti mua, e aronga putaua ratou. I te pati anga tetai tangata tei anau pirikokiia mai, i tetai moni, kua na ko atura a Petero e: “Kare aku ario e te auro; ko taku ra e vai nei, ko taku ïa e oronga atu naau: Ka tu koe ki runga, ka aere, i te ingoa o Iesu Mesia no Nazareta ra!”—Angaanga 3:6.

Te akaari katoa maira te au tuatua a te pipi ko Iakobo e ko te putuputuanga Kerititiano, e aronga putaua to roto. Kua tata aia e: “Ka akarongo mai ana, e aku au taeake akaperepere e: Kare aina ko te aronga apinga kore o teianei ao ta te Atua i iki, ei aronga apinga maata i te akarongo ra, e ei aronga tuanga i te basileia tana i karanga e e oronga mai i te aronga i anoano iaia ra?” (Iakobo 2:5) Tetai, kua akakite katoa te apotetoro ko Paulo e kare e maata ana “te tangata pakari i te akonoanga i te kopapa nei” me kore “te tangata mana” me kore “te tangata ngateitei” i  te anau mai anga i kapikiia kia riro mai ei tuanga no te putuputuanga Kerititiano.—1 Korinetia 1:26.

Me kare te apinga nui ta Iesu i oronga no tana au pipi i te au apinga pae kopapa, eaa i reira te tu apinga nui tana i oronga kia ratou? I roto i tetai reta ta Iesu i tuku atu ki te putuputuanga i Semurina, kua akakite aia e: “Kua kite au i taau angaanga, e toou tumatetenga, e toou ngere, e apinga maata ra toou.” (Apokalupo 2:8, 9) Te au Kerititiano i Semurina, noatu to ratou putaua, e apinga nui puapinga maata rava atu ta ratou i rauka i to te ario e te auro. I apinga nuiia ratou no to ratou akarongo e te tu apa kore ki te Atua. E mea puapinga maata tikai te akarongo no te mea “kare oki i ope katoatoa te tangata” i rauka ia ratou te reira. (2 Tesalonia 3:2) Te aronga ra kare o ratou akarongo e putaua ratou i roto i te mata o te Atua.—Apokalupo 3:17, 18.

No te Akarongo i Apinga Nui Ei

Na roto ra i teea au mataara i puapinga maata ai te akarongo? Te aronga e akarongo to ratou i te Atua e puapingaia ana ratou mei te “takinga-meitaki maata e te akamouriri kore, e te akakoromaki roa.” (Roma 2:4) Rekareka katoa ratou “i te akakore anga i [ta ratou] ara nei” no to ratou akarongo i roto i te atinga oko a Iesu. (Ephesia 1:7) Tetai katoa, tei ia ratou te pakari ta “te tuatua a te Mesia” e apai maira ki te aronga e akarongo to ratou. (Kolosa 3:16) Ia ratou e pure ra ki te Atua ma te akarongo, ka paruru “te au o te Atua, ko tei maata ua atu i te kite tangata,” i to ratou ngakau e to ratou manako, te apai mai anga i te tu mareka ua e te mataora kia ratou.—Philipi 4:7.

Kapiti mai ki teia au akameitakianga pouroa, ko te aronga tei akarongo i te Atua na roto i tana Tamaiti ko Iesu Karaiti, tei ia ratou te manakonakoanga umere tikai o te  ora mutu kore. Kua kite meitaki uaia te au tuatua a Iesu Karaiti e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Ka akamatutuia taua manakonakoanga puapinga maata ra, me rauka i tetai te kite tika tikai no runga i te Metua e te Tamaiti, no te mea kua karanga katoa a Iesu e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”—Ioane 17:3.

I te mea e ko te au akameitakianga a te Atua e au mea pae vaerua te reira, e au akameitakianga pae manako e te pae kopapa katoa tetai. Ei akaraanga, ko Dalídio i Paratiri. I mua ake ka rauka ai iaia te kite tika tikai no runga i to te Atua akakoroanga, e tangata kona kava aia. Kua riro teia ei akatupu i te kino maata ki tona pirianga ki te ngutuare tangata. Pera katoa, kare tona turanga i te pae moni e meitaki ana. I reira kua akamata aia i te apii i te Pipiria ki te Au Kite o Iehova e kua rauka iaia i te rave i tetai tauianga umere tikai.

Kua riro te kite ou tei rauka ia Dalídio ei tauturu iaia kia akaruke i tona au tu kino. No te meitaki i tona turanga i te pae vaerua kua karanga aia e, “I mua ana e aere ana au mei tetai are kava ki tetai; teianei te aere nei au mei tetai ngutuare ki tetai i te tutu evangeria.” Kua riro mai aia ei orometua tamou no te Tuatua a te Atua. Kua akameitaki roa atu taua tauianga ra i tona turanga pae kopapa, pera katoa i tona turanga pae moni. Kua akakite a Dalídio, “Ko te moni taku i akapou ana ki runga i te kava, te akapou nei au ki runga i te anoano o etai ke me kore ei oko mai i te au apinga tei anoanoia noku.” E maata katoa rai tona au oa mou tikai i rauka mai na roto i tona pirianga ki te aronga aiteite rai to ratou manakonakoanga. I teianei kua rauka ia Dalídio te turanga au e te tu mareka ua kare rava aia i manako ana e ka rauka iaia i mua ake ka kite ei aia no runga i te Atua.

Tetai akaraanga akaou mai no runga i tetai tangata tei akapuapingaia tona oraanga na roto i te akatupu anga i te akarongo ki roto i te Atua ko Iehova, ka akamanako ana ia Renato. Me kite koe i tona mata mataora e te katakata i teia ra, e ngata tikai kia irinaki e e au tumuanga tau tikai tona kia manako e kua takinga kinoia ana aia. I tona anauia mai anga, kua akarukeia aia e tona metua vaine. Kua akaruke uaia aia ki roto i tetai kiri i raro ake i tetai paata, kua motumotu e kua uriuri kerekere e kare tona pito i pakotiia. Kua na reira mai tetai nga vaine, kua kite i te kiri i raro i te paata e oriori ra. I te akamataanga kua manako raua e e kiore ngiao tei akarukeia ki reira. I to raua kite anga e e pepe anau ou ua te reira, kua apai viviki atu raua ki ko i te are maki kia akaraia e te taote.

Tetai o taua nga vaine ra, e Kite aia no Iehova, kua akakite aia kia Rita, tetai Kite ke mai, no runga i te pepe. E maata ta Rita au pepe tei anau mate mai, e e tai rai ana tamaine. Inangaro maata tikai tona i tetai tamaroa, no reira manako aia kia angai ia Renato.

Kua akakite a Rita kia Renato i tona meangiti anga rai e kare koia tona mama anau tikai. Inara kua akono aia iaia ma te aroa e te inangaro maata e kua tauta pakari i te apii iaia ki te au kaveinga Pipiria. Iaia e maata maira, kua akamata aia i te akaari i te inangaro no te Pipiria. Kua maata katoa  rai te rekareka o tona ngakau no te tu umeremere tikai i ora mai ei aia. E pururu ua ana tona roimata i te au taime pouroa me tatau aia i te au tuatua a te tata taramo ko Davida e: “Akaruke ua toku metua tane e toku metua vaine iaku, ei reirā Iehova e rave mai ei iaku.”—Salamo 27:10.

Ei akakite i tona ngakau akameitaki e te ariki anga i te au mea pouroa ta Iehova i rave nona, kua papetitoia a Renato i te mataiti 2002, e i tera mai mataiti kua riro mai aia ei orometua tamou Kerititiano. Kare rai aia i kite e koai tikai tona metua tane e tona metua vaine e penei e kare rava aia e kite. Tera ra, kua kite a Renato e ko tetai o te au apinga aroa puapinga roa atu tei rauka iaia koia oki te rauka anga te kite e te akarongo ia Iehova ei Metua aroa e te akaperepere.

Penei te inangaro ra koe kia rauka tetai pirianga vaitata e te aroa ki te Atua, te ka akapuapinga i toou oraanga. Te tuera ua ra taua pirianga ra ki te Atua ko Iehova e tana Tamaiti ko Iesu Karaiti, ki te katoatoa—te aronga apinga nui e te putaua. Penei kare te reira e apai mai i te au apinga pae kopapa, inara ka apai mai te reira i te au e te tu mareka ua o te ngakau te kare rava e rauka i te moni pouroa o teianei ao i te oko. E tika tikai i reira te au tuatua e kiteaia ra i roto ia Maseli 10:22: “Na Iehova te meitaki i apingaʼi te apinga, kare oki e kapiti katoaia mai te kino i te reira.”

Te inangaro ua maira te Atua ko Iehova i te tangata tei aere mai kiaia: “Angairi koe i akarongo mai ki te au akauenga naku! kua riro ïa toou au mei te vai taʼe ra; e taau tuatua-tika mei te ngaru moana ra.” (Isaia 48:18) E te taputou maira aia e ko te aronga tei aere mai kiaia ma te akakoroanga e te tu tau tikai, ka akameitaki maataia: “Te tutaki o te taakaaka e te mataku ia Iehova, ko te apinga nui ïa, ko te ngateitei ïa, ko te ora ïa.”—Maseli 22:4.

[Tataanga i te kapi 6]

Apai mai te akarongo i te Atua i te au, te mareka ua, e te mataora

[Tutu i te kapi 5]

Noatu te putaua pae kopapa, kua akameitaki maata te Atua i te ngutuare tangata o Iesu i te enua nei