E Moni Ainei te Tumu o te Mataora Mou?

KUA anauia a Sonia i Paniora. Iaia e tamariki ra, kua aere ana aia ki te au uipaanga a te Au Kite o Iehova e tona mama. Te mapu mai anga ra aia, kua neke atu aia ki London, i Engarani, e oti i muri mai kua angaanga i roto i te pitiniti o te kimi moni, ei tangata oko mai e te oko atu i te au tuanga a te pitiniti.

Inangaro tikai a Sonia i tana angaanga. E maata tana moni e koi ana e e maata te moni e rauka maira iaia no te au pitiniti tana e akono ra. E reka tikai te angaanga, e e meitaki katoa aia i tana angaanga. E angaanga putuputu ana a Sonia e 18 ora i te ra, e i tetai au po e rua me kore e toru rai ora e moe ana aia. Ko tana angaanga ko tona oraanga ia. Poitirere ua ake, kua taui takiri tona oraanga. Kua rokoia a Sonia e te maki akangoru—penei no te tu o tona oraanga e te maata o te taomianga o te ngai angaanga. E 30 ua rai ona mataiti.

Kua akamate tetai tua o te kopapa o Sonia e kare te au taote i papu ana e me ka rauka akaou iaia i te tuatua. Kua aere viviki atu tona mama ki Engarani i te akono iaia. Te akamataanga a Sonia i te aere, kua akakite tona mama kiaia e, “Ka aere au ki te au uipaanga a te putuputuanga, e aru mai koe iaku no te mea kare e rauka iaku i te akaruke ia koe ko koe anake ua.” Kua akatika a Sonia i te aru atu. Eaa tei tupu mai?

“Te tika ua ra te au mea taku i akarongo. E mea umere tikai,” i karanga ai a Sonia. “Kua mataora au i te ariki i tetai apii Pipiria ki tetai o te aronga tei aravei mai iaku no te taime mua i aere ei au ki te Are Uipaanga Patireia. Kua akamutu toku au taeake o mua ana i te atoro mai iaku, kareka toku au oa ou e takinga meitaki tikai ratou e te akono iaku.”

Aere ua rai, kua rauka ia Sonia i te tuatua, e kua tupu viviki katoa tona kite no runga i te Pipiria. Kare i pou te mataiti, kua papetitoia aia. Te maataanga o tona au oa ou, tei roto ratou i te angaanga orometua Kerititiano tamou, e te kite ra aia i to ratou tu mataora. ‘Inangaro au kia pera rai au,’ i manako ei a Sonia. ‘Te inangaro nei au i te oronga ki te Atua ko Iehova i te ka rauka iaku!’ Teianei te tavini tamou nei a Sonia i roto i te angaanga orometua.

Eaa ta Sonia i kite mei tei tupu kiaia? “Noatu e maata taku moni e koi ana, kua riro te taitaia e te papu kore o te ngai angaanga ei akatupu i te manamanata e te mataora kore kiaku. Kua kite mai au e ko te apinga puapinga roa atu i roto i toku oraanga koia oki kia rauka tetai pirianga meitaki ki toku Metua i te rangi, ko Iehova. I teianei, mataora tikai au.”

“Ko te anoano maata oki i te moni te tumu o te au kino katoa nei,” i tata ei te apotetoro ko Paulo. “Kua taka ke rava oki tetai aronga i te akarongo nei, i te umuumu anga i te reira, e kua ko mama rava ia ratou uaorai i te iriea e manganui.” (1 Timoteo 6:10) Ka rauka ia Sonia i te akapapu mai mei tana rai i kite e e tika tikai teia au tuatua.