Taputou Mai te Atua te Apinga Nui Naau?

‘Inangaro te Atua ia koe kia riro ei tangata apinga nui—kia maata te motoka, e tetai pitiniti puapingaia. Irinaki iaia, vaiia mai to kiri moni, oronga pouroaia to moni kiaia.’

TE TUATUA akamaroiroi te reira a tetai au pupu akonoanga i Paratiri, i tata ai tetai nuti pepa. Irinaki tikai te manganui i teia tuatua. No runga i tetai kimikimianga i raveia i Marike no te aronga e karanga ra e e au Kerititiano ratou, te ripoti maira te makatini Time e: “E 61 patene tei irinaki e te inangaro ra te Atua i te tangata kia puapingaia. E e 31 patene . . . tei ariki e me oronga koe i taau moni ki te Atua, ka akameitaki mai aia kia maata atu taau moni.”

Te au aerenga manako mei teia te tu, tei matauia i te kapiki e ko te irinakianga akonoanga kia puapingaia i te pae moni, te totoa viviki ra i roto tikai i te au enua o Marike Ratino, mei ia Paratiri, e e maata te tangata e aere ra ki te au akonoanga tei taputou mai i te au akameitakianga pae kopapa mei ko mai i te Atua. Inara, te taputou maira ainei te Atua i te apinga nui ki te aronga i tavini iaia? Kua apingaia ainei te au tavini pouroa o te Atua i te tuatau i topa?

E tika e, e tatau putuputu ana tatou i te au Tuatua Tapu Epera, e ko te aronga ta te Atua e akameitaki ana, e aronga puapinga i te pae kopapa. Ei akaraanga, i roto ia Deuteronomi 8:18, ka tatau tatou e: “E akamaara ra koe i to Atua ra ia Iehova: nana oki i oronga mai i toou maroiroi e raukaʼi taau apinga.” Kua akapapu teia ki te ngati Iseraela e me akarongo ratou ki te Atua, ka akariro aia ia ratou ei pa enua puapinga tikai.

Akapeea ra te aronga tataki tai? E tangata apinga maata tikai te tangata akarongo mou ko Iobu, e i muri ake i to Satani akangere anga iaia, “kua tataki rua” akaou a Iehova i ta Iobu apinga. (Iobu 1:3; 42:10) E tangata apinga nui katoa a Aberahama. Te akakite maira a Genese 13:2 e “e apinga maata roa ta Aberama i te puaka, i te ario, e te auro.” Te opu anga te au vaeau o te au ariki tokoa no te tua Itinga ia Lota, ka akatamariki a Aberahama iaia, “kua akaputuputu iora [a Aberahama] i tona au tangata i apiiia ra, i tei anau i tona uaorai ngutuare, e toru anere okotai ngauru e varu ara.” (Genese 14:14) I te mea e e 318 ana “au tangata i apiiia ra” tei tau i te taangaanga i te au apinga tamaki, kare e kore e e pupu maata te ngutuare o Aberahama. No te mea kua rauka iaia i te akono i tetai ngutuare tangata maata, e akaari anga te reira e e tangata apinga maata tikai aia, e e maata tana mamoe e te puakatoro.

Ae, e maata te au tavini akarongo mou o te Atua i te tuatau i topa—ko Aberahama, Isaaka, Iakoba, Davida, Solomona, kia taiku ua atu i etai—e apinga nui to ratou. Inara, ko te aiteanga ainei e ka akariro te Atua i te tangata katoatoa e tavini ra iaia kia apinga nuiia? Tetai tua, i te mea e e putaua tetai tangata, te aiteanga ainei e kare te Atua e mareka ana iaia? Na te atikara e aru maira e uriuri i teia au uianga.