Taui te Pipiria i te Oraanga

Akapeea tetai tangata tei akamata i te kai maruana e te avaava i te tamarikianga, i rauka ai te maroiroi kia akamutu i taua peu ra? Eaa tei tauturu i te mema kino o tetai gang, kia akakoromaki i tona riri e kia akakore i te tu makitakita i tetai iti tangata ke? Ka akamanako ana eaa ta raua ka akakite mai.

PAPAANGA

INGOA: HEINRICH MAAR

MATAITI: 38

ENUA ANAU: KATAKATANI

ORAANGA: KAI MARUANA E TE AVAAVA

TOKU ORAANGA I MUA ANA: Anauia au ki te tua tonga o Katakatani, mei te 120 kiromita te mamao mei te oire maata ko Tashkent. E ngai maro e te vera i te tuatau maana, taeria te vaito ki te 45 tikiri celsius, e i te tuatau anu topa te vaito ki te 10 tikiri celsius—e turanga tau tikai no te akatupu vine e te maruana.

Toku nga metua no Tiamani. E nga Kerititiano irinaki i te evangeria, kare ra e akono ana i ta raua akonoanga. Inara kua apii mai raua iaku kia tamou ngakau i te pure a te Atu. E 14 oku mataiti, kua akamata toku mama e tona tuakana i te apii i te Pipiria ma te Au Kite o Iehova no tetai taime. Kua rongo atu au i nga Kite e apii ra ki toku mama, e akaari ra kiaia i te ingoa o te Atua, ko Iehova, i roto i tana uaorai Pipiria takere. Kua umere tikai au. Kua akamutu a Mama i te apii i te Pipiria, e kare aku apinga akaou i kite no runga i te Atua. Noatu ra, tetai taime i muri mai i te apii, kua akakite mai to matou puapii i tetai au tuatua pikikaa no runga i te pupu tei karangaia e ko te Au Kite o Iehova. I te mea kua aere ana au e toku tuaine ki tetai au uipaanga a te Au Kite o Iehova, kua akakite atu au ki toku puapii e e pikikaa ua rai tana au mea e tuatua ra.

E 15 oku mataiti, kua tukuia atu au ki Leningrad, teianei ko St. Petersburg, i Rutia, kia tereni no tetai ngai angaanga. Te manga taku i kite no runga ia Iehova kua akakite au ki toku au oa e tai o matou pia moe. Inara, kua akamata au i te kai avaava. Te oki anga ki toku kainga i Katakatani, mama ua iaku te oko i te maruana noatu kua tureia. Maata katoa taku inu vodka e te uaina maaniia i te kainga.

Oti taku terenianga no tetai ngai angaanga kua piri au ki roto i te vaeau o te Toviete e rua mataiti. Noatu ra, kua vai rai tetai au mea taku i apii mei te Pipiria i te tamarikianga. Te au atianga ka rauka iaku e tuatua ana au ki toku au  oa vaeau no runga ia Iehova e te paruru i te Au Kite me rongo au i tetai tuatua pikikaa no runga ia ratou.

Muri ake i te angaanga vaeau, kua neke atu au ki Tiamani. I roto i te puakapa o te tuitarere, kua rauka mai iaku tetai puka apii Pipiria na te Au Kite i nenei. Kua tatau au i te reira ma te rekareka e kua irinaki tikai au e e tuatua mou ta te reira e akakite ra. Tera ra, kare i rauka iaku i te takore i taku kai avaava e te maruana. Tetai taime i muri mai, kua neke au ki tetai ngai vaitata ki Karlsruhe te oire maata. I reira kua aravei au i tetai o te Au Kite o Iehova, e kua akamata aia i te apii i te Pipiria kiaku.

KUA TAUI TE PIPIRIA I TOKU ORAANGA: Kua roa te tuatau iaku i te manako anga e e Tuatua te Pipiria na te Atua. Muri ake i te tatau anga i te puka apii Pipiria i rauka iaku, kua papu iaku e e pauanga ta te Pipiria no te au uianga puapinga o te oraanga. Noatu rai kua roa te tuatau i rauka ai iaku te taui i toku au tu. I te openga, kua akakeuia au e te ako a te Pipiria i roto ia 2 Korinetia 7:1, e kua iki kia tama iaku uaorai i “te au viivii katoa o te kopapa e te vaerua,” koia oki kia takore i te kai maruana e te avaava.

Vaitata e i taua taime rai, kua rauka iaku te takore i te kai maruana. Inara kua pou e ono marama i akamutu ei au i te kai avaava. Tetai ra kua ui mai te Kite e apii ra maua i te Pipiria e, “Eaa ra te akakoroanga o toou oraanga?” Kua akatukia tikai tera iaku kia akamanako meitaki no runga i taku kai avaava. Maata te taime kua tauta ana au te takore i te kai avaava. Teianei ra, kua manako au e pure i mua ake ka rave mai ei au i tetai avaava, i to te tiaki e i muri ake ka pati ei kia akakore mai te Atua i taku ara. I te 1993, kua akanoo au tetai ra no te akamutu. Ma te tauturu a Iehova, kare roa au i amiri ana i tetai avaava mei reira mai.

KUA PUAPINGA AU: Teianei kua akamutu au i taua tu kaimoumou moni e te tu kino o te kai maruana e te avaava, kua meitaki roa atu te tu o toku oraanga. Teianei, e tangata angaanga tauturu au i te opati manga o te Au Kite o Iehova i Tiamani. Rekareka tikai au e kua kite au i te akono i te ako a te Pipiria i roto i toku oraanga! Kua riro te kite i te apiianga a te Pipiria ei oronga mai tetai akakoroanga tikai i roto i toku oraanga.

PAPAANGA

INGOA: TITUS SHANGADI

MATAITI: 43

ENUA ANAU: NAMIBIA

ORAANGA: MEMA KINO O TETAI GANG

TOKU ORAANGA I MUA ANA: Maata mai au i roto i tetai oire i vao mai i Ohangwena te tua tokerau o Namibia. Kua taia aereia te tangata i toku oire e kua tamateia i te tuatau o te tamaki i roto i teia tuanga i te au mataiti o te 1980. I roto i toku oire, e karangaia ana tetai tamaiti e e toa, me kite aia i te to, e te ta tamariki. No reira kua apii au i te to!

Te oti anga taku apii, kua noo au ki ko i te tungane o toku mama i te oire i te pae tai o  Swakopmund. Muri ua ake i toku tae anga atu, kua piri au ki roto i te gang o tetai au mapu akatupu pekapeka. E aere ana matou ki te au ngai o te oire kare e arikiia ana te kerekere, mei te au otera e te au are kava, te akatupu ta. Maata te taime i to ana matou ki te au tiaki e te au akava. I te au po ravarai e apai ana au i tetai matipi maatamaata, roroa e te koi, kia papa ua i te ta i tetai ua atu tangata ka tamanamanata mai.

Tetai po ia matou e to ra ki tetai gang ke mai, mei mate rai au. Kua na muri mai tetai mema o ratou iaku ka tipu takiri i toku katu inara kua akauia mai aia e tetai mema o to matou gang e kua ngaro tona ao. Noatu e mei mate rai au, kua vai atu rai toku tu kino. Me o au ki roto i tetai taumaro ki tetai ua atu tangata, me kore e vaine, ko au ua rai te na mua ana i te ta atu.

KUA TAUI TE PIPIRIA I TOKU ORAANGA: Te taime mua i toku aravei anga i tetai Kite o Iehova, kua tatau mai taua vaine ra i te au irava mei ia Salamo 37 kiaku e oti kua akakite mai e tei roto i te puka Pipiria o Apokalupo tetai au taputou manea no te tuatau ki mua. I te mea ra, e kare aia i akakite mai e iea i roto i te puka teia au taputou nei, kua tiki mai au i tetai Pipiria e kua tatau katoatoa i te puka o Apokalupo i taua po ra. Reka tikai au i te taputou taku i tatau i roto ia Apokalupo 21:3, 4 e ka “kore rava te mate, e te aue, e te mii; e te mamae oki, e kore katoa ïa.” Te oki mai anga te nga Kite, kua ariki au i tetai apii Pipiria.

Ngata tikai te taui i toku aerenga manako e toku tu. Kua kite ra oki au i roto ia Angaanga 10:34, 35 e “kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.” Kua tauta pakari katoa au i te taangaanga ia Roma 12:18 e na ko ra e: “Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei.”

Kapiti mai ki te apii anga kia akakoromaki i toku riri, kua anoano katoaia au kia takore i te kai avaava. Putuputu au te pure kia Iehova ma te aue kia tauturu mai iaku. I te akamataanga ra, e tarevake ana au i te manako e te kai nei au i taku avaava “openga” e oti ka pure ei i muri ake. Te vaine tei apii i te Pipiria kiaku, kua tauturu aia iaku kia kite i te puapinga o te pure i mua ake ka mou ei au i tetai avaava. Kua anoano katoaia au kia kopae i te piri atu ki te aronga kai avaava. Tetai, kua aru au i te manako kia tuatua atu ki toku au oa angaanga no runga i te kino o te kai avaava. Kua riro tikai teia ei tauturu, no te mea kare e rauka tetai avaava naku—kare te aronga kai avaava e oronga akaou mai tetai naku.

I te openga, kua rauka iaku i te takore i te kai avaava e kua akaruke i toku tu oraanga i mua ana. E ono marama i muri ake i te apiianga e te akonoanga i te au kaveinga Pipiria, kua tau au kia papetitoia ei Kite no Iehova.

KUA PUAPINGA AU: Papu tikai iaku e te akono ra te Au Kite o Iehova i te akonoanga mou tikai toku kite anga i te aroa i rotopu ia ratou, noatu eaa te iti tangata e te kara. I mua ake ka papetitoia ai au ei Kite, kua pati mai tetai mema papaa o te putuputuanga iaku ki tona ngutuare i te kaikai. Mei te moemoea rai. Kare rava au i noo au ua ana e tetai tangata papaa i mua ana, e kare katoa i kaikai ana i tona kainga. Teianei ra, kua riro au ei tuanga no tetai taokotaianga taeake i te pa enua katoa.

I mua ana, kua tauta ana te au tiaki e te akava i te maro iaku kia taui i toku aerenga manako e toku tu, kare ra ratou i puapingaia ana. Na te Pipiria ua rai i akakeu iaku kia taui i toku tu e kia riro mai ei tangata mataora tikai.

[Tataanga i te kapi 29]

“Putuputu au te pure kia Iehova ma te aue kia tauturu mai iaku”