EAA te putuputu me akara koe ia koe uaorai ki roto i te io? Te maataanga ia tatou, e mea matau te rave i teia i te au ra—penei e maata te taime e rave ana tatou i teia i te au ra. Eaa te tumu? No te mea, te manako ra tatou i to tatou tu akaraanga.

Ka rauka i te akaaite atu i te tatauanga Pipiria ki te akara anga ki roto i te io. (Iakobo 1:23-25) E ririnui te karere tei rekotiia i roto i te Tuatua a te Atua ei tauturu ia tatou kia marama e koai tikai tatou. Ka ‘koputa te reira kia mama takiri e taka ke ua atu te vaerua e te ngakau.’ (Ebera 4:12) Koia oki, ka akatakake te reira i to tatou tu i vao mei to tatou tu i roto. Ka akaari mai te reira i te au ngai ka anoanoia te akatanotano, mei ta te io rai e rave ana.

Kare te Pipiria e akakite ua mai i te au ngai ka akatanotanoia, ka tauturu katoa ra ia tatou kia rave i taua au akatanotanoanga ra. Kua tata te apotetoro ko Paulo e: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra.” (2 Timoteo 3:16, 17) Akara e, i te au puapinga e a tei akakiteia mai, e toru ia ratou—te akoanga, te akakiteanga apa, e te akakite i te tuatua tika—ka anoanoia te akatanotano i to tatou tu e te au angaanga. Me anoanoia tatou kia akara ua rai ki roto i te io ei akapapu e te meitaki ua ra to tatou tu, e mea puapinga roa atu i reira kia tatau i te Tuatua a te Atua, te Pipiria i te au ra!

I te iki anga ia Iosua kia arataki i te ngati Iseraela, kua akakite te Atua ko Iehova kiaia e: “Auraka teianei buka ture kia taka ke atu i roto i to vaa; kia akamaara tikai ra koe i te reira i te po e te ao, kia akono koe e kia rave i tei tata katoaia i roto ra: ei reira e meitaki ei toou aerenga, e ei reira koe e manuia aroaʼi.” (Iosua 1:8) Ae, e rauka ai ia Iosua te meitaki, ka anoanoia aia kia tatau putuputu i te Tuatua a te Atua “i te po e te ao.”

Te akaari maira te taramo mua i te puapinga o te tatau putuputu i te Pipiria i te akakite anga e: “E ao to te tangata, kare e aaere i te ako a te akono kore i te Atua, kare e tu i te arataa o te aronga rave ara ra, kare oki e noo i te nooanga o te aronga taitoito ra. Ko tei inangaro ra i te ture a Iehova; e tei tana ture tona manako anga i te po e te ao. E tau aia ki te rakau i tanumia ki te pae kauvai ra, ko tei ua i tona ra tuatau tikai, e ko tei kore roa i mae tona rau; ko tana katoa e rave ra, te meitaki ra ïa.” (Salamo 1:1-3) Papu e ka inangaro tatou kia aite mei taua tangata rai.

Maata te tangata tei akariro ei peu matau i te tatau i te Pipiria. Te uiia anga te tumu i tatau ei aia i te Pipiria i te au ra, kua pau atu tetai tangata Kerititiano e: “Me ka pure putuputu au ki te Atua i te au ra, e te tapapa ra iaia kia akarongo mai kiaku, eaa i reira au ka kore ei e  akarongo atu ki te Atua na te tatau anga i tana Tuatua i te au ra? Me ka inangaro tatou kia riro ei oa meitaki, eaa ra tatou ka rave ei e na tatou ua te tuatua?” E manako meitaki tona. Kua aite rai te tatau anga i te Pipiria ki te akarongo anga ki te Atua no te mea ka rauka ia tatou tona manako puapinga no runga i te au mea.

Penei kua tauta takere koe i te akamata i tetai porokaramu tatauanga Pipiria. Kua tatau ainei koe te katoaanga o te Pipiria mei mua ki muri? E mataara meitaki tikai te reira kia matau meitaki i te au mea i roto. Inara, tetai pae e maata te taime kua akamata i te tatau i te katoaanga o te Pipiria, e oti kua akamutu ua ratou i te tatau anga i muri mai. Kua tupu ainei teia kia koe? Eaa taau ka rave kia taeria te akakoroanga o te tatau anga i te katoaanga o te Pipiria? Eaa kore ei e tamata i nga tamanakoanga e rua e aru maira?

Akanoo i te tatauanga Pipiria ki roto i taau peu matau i te au ra. Iki i tetai taime i te ra te ka rauka ia koe i te tatau i taau Pipiria. Akanoo katoa i tetai ravenga ke mai me rokoia e te manamanata. Mei te mea e kare e rauka ia koe i te rave i taau tatauanga Pipiria i te taime taau i akanoo, e iki i tetai taime ke mai kia kore e topa tetai ra no te tatau anga i te Tuatua a te Atua. Na roto i teia mataara te aru ra koe i te akaraanga a to Perea i taito. No runga ia ratou te akakiteia maira kia tatou e: “Kua āriki ua oki ratou i te tuatua ma te ngakau maora, e te kimi anga i te tuatua i tataia ra, i te tau anga oki i taua tuatua ra, kare e rā i tukua.”−Angaanga 17:11.

Akataka i tetai akakoroanga papu. Ei akaraanga, me tatau koe mei te toru ki te rima pene o te Pipiria i te au ra, ka rauka ia koe te tatau i te katoaanga o te Pipiria i roto i te mataiti okotai ua. Te akaari maira te porokaramu i roto i te au kapi e aru maira e ka akapeea i te rave i teia. Kore koe e tamata i teia porokaramu? I raro i te tumu tuatua “Ra,” akanoo e aea koe e tatau ei i te au pene tei akatakaia. E oti, i roto i te pia tei orongaia mai, tikoti i te au tuanga ia koe e tatau ra. Ka riro teia ei tauturu ia koe kia kite e te peea nei toou kaveinga.

Me oti ana ia koe te tatau i te katoaanga o te Pipiria, eaa koe ka akamutu ei ki reira? Ka rauka ia koe i te taangaanga i taua papaanga rai kia tatau i te katoaanga o te Pipiria i te au mataiti, penei e akamata i tetai ngai ke mai. Me ka inangaro koe kia rave marie ua i taau tatauanga Pipiria, e tuku koe e rua me kore e toru ra kia rave i te au tatauanga tei papaia.

I te au taime ravarai me tatau koe i te Pipiria, e au mea ou taau ka kite tei tau ki toou oraanga—e au mea kare rava koe i kite ana i mua ana. No teaa ra? “Te ngaro ke nei oki te tu o teianei ao,” e te taui putuputu ua nei rai to tatou oraanga e to tatou au turanga katoa. (1 Korinetia 7:31) No reira e akariro ei akakoroanga ngaueue kore noou kia akara ki roto i te io o ta te Atua Tuatua te Pipiria i te au ra. Na roto i teia tu, papu e te akatika ra koe i te Atua kia tuatua kia koe i te au ra.—Salamo 16:8.