Ta Tatou i Apii Mai Mei ia Iesu

No Runga i te Oraanga Ngutuare Tangata

Eaa te apiianga no runga i te akaipoipo te ka akariro i te au ngutuare tangata kia mataora?

E tapu te pirianga akaipoipo. I te uiia anga e, me ka tikaia rai te kopaeanga, kua tuatua a Iesu e: “Kare rai kotou i tatau e, ko tei anga ia raua i muatangana, i anga ïa i te tane okotai e te vaine okotai; E kua na ko akera, ‘E akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai?’ E teianei, kare atura raua i te toko rua, kua kopapa okotai ra. E ta te Atua i topiri ra, auraka te tangata e akataka ke atu. . . . Tei kopae i tana vaine, auraka ra no te akaturi, ka akaipoipo ei i tetai, kua akaturi ïa.” (Mataio 19:​4-6, 9) Me aru tetai nga tokorua akaipoipo i te ako a Iesu e ka vai tiratiratu tetai ki tetai, ka rauka i te aronga pouroa i roto i te ngutuare tangata te turanga ponuiaau e te mataora.

Eaa ra te anoano atu anga i te Atua ka akariro ei kia mataora te au ngutuare tangata?

Kua akakite a Iesu e: “‘E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.’ Ko te akauenga mua teia e tei maata.” Eaa te rua o te akauenga maata? Kua akakite a Iesu e: “E aroa atu koe i toou tangata tupu [kapiti mai te aronga piri vaitata mai kia koe​—toou ngutuare tangata] mei te aroa ia koe uaorai.” (Mataio 22:37-​39) No reira ko te taviri no te turanga mataora o te ngutuare tangata koia oki, ko tetai pirianga meitaki ki te Atua no te mea ka riro te anoano atu anga iaia, ei akakeu ia tatou kia aroa atu tetai e tetai.

 Akapeea te au tane e te au vaine i te akamataora anga tetai e tetai?

Ka akamataora te au tane i ta ratou au vaine me aru ratou i te akaraanga o Iesu. E aroa akaatinga tikai tona no tana vaine akatutu, koia te putuputuanga. (Ephesia 5:​25) Kua akakite a Iesu e: “Kare oki te Tamaiti a te tangata i aere mai kia taviniia tona, ei tavini ra.” (Mataio 20:28) Kare rava a Iesu i maro ana ki tana uaorai tika me kore e tuatua riri ana ki te aronga e akono ra aia, inara e akamaroiroi ua ana aia ia ratou. (Mataio 11:28) Ka tau i reira te au tane, kia taangaanga i to ratou turanga ei upoko na roto i te mataara takinga meitaki, kia puapinga te katoatoa i roto i te ngutuare tangata.

Ka rauka katoa i te au vaine te puapinga mei te akaraanga o Iesu. “To te Mesia upoko, ko te Atua,” i karanga ai te Pipiria. Kua akakite katoa te reira e ko “to te vaine ra upoko, ko te tane ïa.” (1 Korinetia 11:3) Kare roa a Iesu i manako ana e ka riro te kauraroanga ki te Atua ei akamoraro takiri i tona turanga. E akangateiteianga oonu tikai tona, no tona Metua. “Kare oki au i tukumoe i te rave i te mea e mareka mai ei aia,” i akakite ei a Iesu. (Ioane 8:​29) Ko te vaine e kauraro ra ki te taoonga upoko o tana tane no tona anoano e te akangateitei i te Atua, te akamaata atura aia i te mataora o tona ngutuare tangata.

Eaa ta te au metua ka apii mai mei to Iesu manako no runga i te tamariki?

Kua akapou a Iesu i te taime ki te tamariki e kua akamanako atu i to ratou anoano e to ratou manako. Kua karanga te Pipiria e: “Kua karanga aturā Iesu kia ratou ra, na ko atura, Ka tuku mai ana i te tamariki mea riki, kia aere ua mai kiaku nei.” (Luka 18:15, 16) I tetai atianga, kua akaapa tetai aronga i tetai au tamariki tamaroa no tei tuatua no runga i to ratou akarongo mou i roto ia Iesu. Inara, kua akameitaki atu a Iesu i te tamariki, e kua karanga atu ki te aronga akaapa e: “Kare kotou i tatau ra, ‘I rauka ia koe te akameitaki no roto i te vaa o te tamariki meangiti e te kai u?’”​—Mataio 21:15, 16

Eaa ta te tamariki ka apii mai mei ia Iesu?

Kua akanoo a Iesu i te akaraanga meitaki e akapeea te tamariki i te akaari anga i te inangaro no te au apinga pae vaerua. E 12 ona mataiti, kua kiteia aia i “roto i te iero, te noo ra i rotopu i te au orometua, te akarongo atura e te ui atura kia ratou.” Eaa tei tupu? “Umere anake iora te aronga katoa i akarongo iaia ra i tona kite e tana tuatua.” (Luka 2:​42, 46, 47) Inara, kare to Iesu kite i akangakau parau. Kua akatupu ra te reira i tona tu akangateitei no tona nga metua. Kua karanga te Pipiria e: “Akarongo atura [aia] ia raua.”​—Luka 2:​51.

No tetai atu akakiteanga, akara i te pene 14 o te puka Eaa Tikai ta te Pipiria e Apii Maira? *

[Tataanga Rikiriki i Raro]