Taui te Pipiria i te Oraanga

Eaa ra tetai tangata tei akapou ua i tona oraanga ki runga i te patikara matini, te au mea akakona e te angaanga tarekareka, i iki ei kia riro mai ei orometua tamou? Eaa tei akakeu i tetai tangata, tana angaanga e pere moni kia akaruke i tana angaanga inangaro maata rava atu, e kia akono i tona ngutuare tangata na te rave anga i tetai ngai angaanga tau? Eaa tei akakeu i tetai mapu vaine tei utuutuia ei Kite no Iehova, tei akaruke i te au turanga o te Pipiria, kia akamanako akaou atu i te tu o tona oraanga? Akamanako ana i te tuatua a teia au tangata.

PAPAANGA

INGOA: TERRENCE J. O’BRIEN

MATAITI: 57

ENUA ANAU: AUTIRERIA

ORAANGA: TAMATAMATA ANA I TE AU APINGA AKAKONA, REKA UA AKE I TE PATIKARA MATINI

TOKU ORAANGA I MUA ANA: I toku tamarikianga e noo ana au ki roto i te oire ko Brisbane, te oire maata o Queensland. E akonoanga Katorika ta toku ngutuare tangata, inara i muri ake i te tae anga toku mataiti ki te varu, kare matou e oki akaou ana ki te pure e kare rava matou e tuatua ana no runga i te akonoanga. E tai ngauru oku mataiti, i neke atu ei to matou ngutuare tangata ki te Gold Coast i Autireria. Kua noo matou ki te pae tai, e kua akapou au i te tuatau o toku mapu tamariki anga i te pai tai e te tupaororo ngaru.

Noatu ra, kare te tuatau o toku tamarikianga i te mea mataora. E varu oku mataiti i akaruke ei toku papa i to matou ngutuare tangata. Kua akaipoipo akaou toku mama, e i roto i to matou ngutuare, kua riro te kava e te karo ei mea putuputu i roto i to matou oraanga. I tetai po, i muri ake i tetai karoanga kino i rotopu i toku nga metua, kua taputou au, iaku e noo ra ki runga i toku roi e me ka akaipoipo ake au, kare rava au e taumaro atu ki taku vaine. Noatu ra te au manamanata, to matou ngutuare tangata​—e ono tamariki, mama e te papa angai​—kua vai rai matou ei ngutuare tangata okotai.

I te mapu mai anga au, e maata toku au oa tei meameaau i te mana akaaere. E tamatamata ana ratou i te kai maruana, te avaava, e tetai atu au apinga akakona, e te inu maata i te kava. Kua aru rai au i te tu oraanga o toku au oa. E mataora katoa ana au i te akaorooro patikara matini. Noatu e kua o atu ana au ki roto i tetai nga u anga kino, kare rai i kore toku inangaro i te patikara matini e kua iki au i te akaoro i toku patikara ki tetai tua mai ia Autireria.

 Noatu e tei iaku rai te tika i toku oraanga, e maromaroa ua ana au me akamanako atu au i te turanga o teianei ao e te tu manako kore o te maata anga o te tangata no runga i te au manamanata o te tangata. Inangaro tikai au kia kite i te tuatua mou no runga i te Atua, i te akonoanga, e te au turanga o teianei ao. Inara, i toku ui anga atu i tetai au uianga ki tetai nga orometua Katorika, kare au i marama ana i ta raua au pauanga. Kua uriuri au i taua au tumu manako ra ki etai au orometua Porotetani inara kua mareka kore katoa au i ta ratou pauanga. I reira kua akanoo tetai oa kia aravei atu au ia Eddie, e Kite no Iehova. E a oku taime i te uriurianga kia Eddie, e i te au taime pouroa kua taangaanga aia i te Pipiria i te pau i taku au uianga. Mei te uriurianga mua mai, kua kite au e kua kiteaia e au tetai apinga puapinga. Inara i taua taime ra, kare au i manako ana e kia taui au i te tu o toku oraanga i roto i tetai ua atu mataara.

KUA TAUI TE PIPIRIA I TOKU ORAANGA: I te aere anga au i toku tere ki tetai tua mai ia Autireria, kua uriuri manako atu au ki tetai Kite ke mai, taku i aravei. Inara i toku oki anga ki Queensland, kare au i aravei akaou ana i te Au Kite no tetai ono marama.

Ina, i tetai ra, iaku e oki atura ki te kainga no te angaanga, kua kite atu au e rua nga tangata akamanea meitaki e apai aere ra i ta raua nga kiri, e aaere ra i runga i te mataara, e kua nakiro mai au e e nga Kite raua no Iehova. Kua aravei atu au ia raua, i te akapapu e e nga Kite rai raua no Iehova, e i reira, kua pati atu kia apii raua i te Pipiria kiaku. Kua akamata rai au i te aere atu ki te au uipaanga e raveia ana e te Au Kite e kua tae atu ki tetai uruoaanga maata tei raveia ki Sydney i te mataiti 1973. Inara, i te kite anga toku ngutuare tangata​—toku mama tikai​—e eaa taku e rave ra, kua taitaia tikai ratou. No teia e tetai atu au tumu, kua akamutu au i te piri atu ki te Au Kite. No tetai mataiti katoa, kua varenga ua au ki tetai o taku angaanga reka, e pa poro kiriketi.

I te openga ra oki, kua kite mai au e ko te taime ua rai i mataora tikai ei au, koia oki ko te taime e apii ra au i te Pipiria e te Au Kite o Iehova. Kua aravei akaou atu au ia ratou e kua akamata i te aere atu ki te au uipaanga. Kua akamutu katoa au i te piri akaou atu ki toku au oa kai apinga akakona.

Ko te akakeuanga tikai tei rauka iaku kia rave i teia au tauianga koia oki ko taku i apii mai mei te tangata Pipiria ko Iobu. E uriuri ua mai ana tetai Kite pakarikari takinga meitaki e te ngaueue kore, ko Bill te ingoa, i te Pipiria kiaku. I muri ake i to maua apii anga i te tua o Iobu, kua ui mai a Bill kiaku e, koai atu tetai ta Satani i tapepe e te tavini ua nei i te Atua ma te ngakau tae kore. (Iobu 2:​3-5) Kua akakite atu au i te au tangata Pipiria pouroa taku i kite, e kua pau mai a Bill ma te tu akakoromaki tikai e, “Ae, ae, e ratou katoa.” E oti kua akara tika mai aia ki toku mata e kua tuatua mai e, “Te tuatua katoa maira a Satani i te reira no runga ia koe!” Poitirere tikai au. I mua ake i taua apii ra, kua kite au e te au apiianga taku e apii ra e tika pouroa. Inara i teia taime kua marama au e eaa au ka rave ei i taku e apii ra. E a marama i muri mai, kua papetitoia au ei Kite no Iehova.

KUA PUAPINGA AU: E taitaia ana au i te manako e mei teaa rai toku oraanga i teianei, naringa au kare i apii kia aru i te au turanga Pipiria. Kare e kore e, kua mate ke ana au. Kua mate te maata anga o te aronga e piri ana au i mua ana, no te kai i te au apinga akakona me kore i te kava. Kare katoa to ratou au akaipoipo i mataora ana. Te irinaki nei au e naringa kare, kua aite rai toku oraanga mei te reira.

Kua akaipoipo au i teianei, e e mataora ana maua ko taku vaine ko Margaret, i te tavini i roto i te opati manga o te Au Kite o Iehova i Autireria. Kare okotai i roto i toku ngutuare  tangata i aru mai iaku i te akamori ia Iehova. Inara, i te au mataiti i aereia mai, kua mataora tikai maua ko Margaret i te apii i te Pipiria ki te au tangata tatakitai e te au tokorua tei taui i to ratou oraanga mei taku tikai i rave. I roto i teia au tupuanga kua rauka mai ia maua te au oa manea tikai e manganui. Pera katoa, kua riro a Margaret, tei utuutuia ei Kite, ei tauturu mai iaku kia akono i taku i tia i tetai 40 mataiti i topa akenei. No tetai 25 tuma mataiti, kua mataora tikai to maua akaipoipo. Kare e aiteite ana to maua manako i tetai taime, inara kare ake rai maua i karo ake. Te akameitaki nei maua roa ai i te Pipiria no te reira.

PAPAANGA

INGOA: MASAHIRO OKABAYASHI

MATAITI: 39

ENUA ANAU: TIAPANI

ORAANGA: TANGATA PERE MONI

TOKU ORAANGA I MUA ANA: Kua utuutuia au ki Iwakura, e ngai meangiti ua mei tetai apa ora me aere na runga i te rerue mei Nagoya mai. Te maara nei iaku e e nga tangata takinga meitaki toku mama e toku papa. Inara, i muri mai, kua kite mai au e e yakuza, me kore e mema toku papa no tetai gang, e no tetai taime, e rauka mai ana tana moni na roto i te angaanga pikikaa ei akono i to matou ngutuare tangata tokorima. E inu maata ana aia i te kava i te au ra ravarai, e e 20 oku mataiti, kua mate aia i te maki kai ate.

E tangata Korea toku papa, no reira kua akavaavaa putuputuia to matou ngutuare tangata e te oire tangata. Kua riro teia e tetai atu au manamanata ei akataitaia iaku i te au mataiti e mapu maira au. Kua akamata au i te apii tuarua, inara kare ra oki au e aere putuputu ana ki te apii, e e tai mataiti i muri mai, kua akaruke au. Tei roto takere toku ingoa i te rekoti a te akava, e i te mea e e apa Korea au, kua ngata roa atu i reira i te kimi i tetai ngai angaanga. I te openga, kua rauka mai taku angaanga, inara i te kino anga toku turi, kare au e meitaki akaou i te rave angaanga.

Kua akamata au i te kimi moni na roto i te pachinko, e angaanga pere moni e o maira te taangaanga anga i tetai apinga mei te matini pinball rai. I te reira taime, te noo ra maua ko tetai tamaine tei inangaro iaku kia kimi i tetai ngai angaanga moni tikai, e kia akaipoipo iaia. Inara e maata taku moni e rauka maira mei te angaanga pere moni, e kare au i inangaro ana i te taui i toku tu oraanga.

KUA TAUI TE PIPIRIA I TOKU ORAANGA: I tetai ra, kua aere mai tetai o te Au Kite o Iehova ki to maua ngutupa e kua akaruke mai i te puka Life​—How Did It Get Here? By Evolution or by Creation? Kare rava au i manako atu ana i teia uianga i mua ana. Inara, i muri ake i te tatau anga i te puka, kua akatika au kia apii maata atu no runga i te Pipiria. E manako ua ana au e eaa ra te tupu ana i muri ake i te mate anga te tangata. No te au pauanga taka meitaki taku i kite mai mei roto i te Pipiria no teia e etai atu au tumu manako, kiaku uaorai, mei te mea atura e e unai ika tei topa mai mei runga i toku nga mata.

Kua kite au e ka anoanoia au kia taangaanga i  taku i apii mei te Pipiria. No reira, kua akaipoipo au, kua akaruke i te kai avaava, kua pakoti i toku rouru roaroa tei takaraia ki te kara keukeu, e kua tama iaku. Kua akaruke katoa au i te pere moni.

Kare teia au tauianga i te mea ngoie i te rave. Ei akaraanga, kare i rauka iaku te akaruke i te kai avaava i roto i toku uaorai maroiroi. Inara na te pure akatenga e te irinaki ki runga i te Atua, ko Iehova, kua rauka iaku te akaruke i te reira. Pera katoa, i muri ake i te akaruke anga i te pachinko, kua riro taku angaanga mua i rauka mai, ei akaaoanga tikai kiaku. Taku i rauka mai no teia angaanga, apa ua rai i tei rauka ana iaku mei te angaanga pere moni, e e ngata tikai te angaanga e te pakari. Tetai nga irava Pipiria tei tauturu iaku i taua taime ngata ra, tei roto ia Philipi 4:6, 7. Te karanga ra e: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” E maata ua atu te au atianga tei riro teia taputou ei mea tika kiaku.

KUA PUAPINGA AU: I toku akamataanga mua i te apii i te Pipiria e te Au Kite o Iehova, kare taku vaine i rekareka ana. Inara i tona kite anga i te au tauianga maata taku e rave ra no toku tu, kua piri mai aia ki taku au apii e kua akamata i te aru mai iaku ki te au uipaanga a te Au Kite o Iehova. I teianei e Kite maua roa ai no Iehova. E akameitakianga tikai i te tavini kapiti i te Atua!

I mua ake ka apii ei au i te Pipiria, manako tikai au e te mataora ua ra au. I teianei ra, kua kite tikai au e eaa te mataora tika tikai. Kare te akarotai anga i te oraanga ki te au turanga Pipiria i te mea ngoie, inara kua papu iaku e ko te oraanga meitaki rava atu te reira.

PAPAANGA

INGOA: ELIZABETH JANE SCHOFIELD

MATAITI: 35

ENUA ANAU: PERITANE

ORAANGA: TAMATAORA UA I TE OPENGA EPETOMA

TOKU ORAANGA I MUA ANA: I tupu mai au i Hardgate, e taoni meangiti ua i vao mai ia Glasgow, i Tekotia. E itu oku mataiti kua akamata toku mama, tei riro mai ei Kite no Iehova, i te apii mai iaku no runga i te Pipiria. Inara, i te tae anga toku mataiti ki te 17, e maata atu toku inangaro i te piri ki toku au oa apii​—i te aere ki te au are tamataora i te po, te akarongorongo i te au akatangi imene heavy metal, e te kai kava. Kare roa au e manako atu ana no runga i te Atua e te Pipiria. Toku akakoroanga ko te tamataora ua i te openga epetoma. Inara, kua taui pouroa te reira, i te tae anga toku mataiti ki te 21.

Kua aere au i te atoro i tetai o toku kopu tangata i Airerani i te Apatokerau. Iaku i reira kua  kite au i te Orange Walk, e matianga na te Porotetani. Kua poitirere tikai au i te kite i te tu makitakita e te akavaavaa i rotopu i te Porotetani e te Katorika i taua taime ra. Ko te tika, kua tauturu te reira iaku kia akamanako no runga i teia au apinga. Kua maara iaku te au apinga ta toku mama i apii mai iaku no runga i te Pipiria, e kua kite au e kare rava te Atua e ariki i te aronga tei kopae i tona au turanga aroa. I reira kua kite mai au e, kua varenga ua ana au i te aruaru i toku uaorai au anoano, i te kopae anga i ta te Atua e inangaro maira. Kua manako au e me oki au ki te enua anau i Tekotia, ka kimi matatio tikai au i ta te Pipiria e apii maira.

KUA TAUI TE PIPIRIA I TOKU ORAANGA: Te taime mua i oki atu ei au ki tetai uipaanga a te Au Kite o Iehova i roto i toku oire, noo ngata tikai au e te apiapi. Inara, kua turouia mai au e te katoatoa. I te akamata anga au i te taangaanga i te au apinga taku e apii maira mei te Pipiria, kua akara aroaia mai au e tetai mema o te putuputuanga. Kua tauturu mai tikai aia iaku kia riro ei tuanga akaou no te putuputuanga. Kua pati ua mai rai te au oa e piri ana au i te taime mua kia aere atu matou ki te au ngai tamataora i te po, inara kua akakite atu au kia ratou e e pakari rai toku inangaro i te aru i te au turanga o te Pipiria. I te openga, kua akamutu ratou i te pati mai iaku.

I mua ana, e manako ana au i te Pipiria e e puka ture ua. Teianei, kua taui toku manako. Kua akamata au i te kite i te au tangata i roto i te Pipiria ei au tangata tika tikai, ma to ratou manako e te tu paruparu mei toku rai. Kua tarevake katoa ana rai ratou, inara kua akakore te Atua ko Iehova i to ratou tarevake i to ratou tataraara anga ma te tae tikai o te ngakau. Kua irinaki tikai au e noatu e kua akaruke au i te Atua i toku tamariki anga, ka akakore katoa mai aia i taku ara e ka akangaropoina i toku au tarevake i mua ana, me tauta pakari au i te akamareka iaia.

Kua riro katoa te tu o toku mama i te akamaroiroi maata iaku. Noatu e kua akaruke au i te Atua, kare rava ra a mama i pera ana. Kua riro tana akaraanga ngaueue kore no te tu tiratiratu ei tauturu iaku kia kite e ko te tavinianga ia Iehova ka pauna meitakiia te taime. I toku tamarikianga e te aere anga i te tutu aere e toku mama mei tera ngutupa ki tera ngutupa, kare rava au i mataora ana i te reira, e kare rava au e inangaro ana i te akapou i toku taime i te tutu aere ki te tangata. I teianei ra, kua manako au i te tamata i te taputou a Iesu ia Mataio 6:​31-​33. Kua tuatua aia e: “Auraka kotou e apiapi ua, ka na ko ei ra, Eaa ua ta matou kia kai? e, Eaa oki ta matou kia inu? e, Eaa to matou kakau kia kakau? . . . Kua kite oki to kotou Metua i te ao ra e, kia rauka taua au mea katoa ra ia kotou e tikaʼi. E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” I muri poto ua mai kua papetitoia au ei Kite no Iehova, kua akaruke au i taku angaanga tinamou, kua angaanga no tetai au taime ua, e kua riro mai ei orometua tamou.

KUA PUAPINGA AU: I toku mapu anga e te tamataora ua ra i te openga epetoma, kare rava au i kite ana i te tu merengo. Kua puapinga kore tikai toku oraanga. I teianei ra e te piri pu tikai nei au ki te tavinianga ia Iehova, te kite nei au i te tu merengo tikai. Kua rauka te puapinga e te akakoroanga i roto i toku oraanga. Kua akaipoipo au i teianei, e e aere ana maua ko taku tane ki te au putuputuanga tukeke o te Au Kite o Iehova i te au epetoma, i te akamaroiroi ia ratou. Kiaku, ko te akameitakianga maata tikai teia i roto i toku oraanga. Te akameitaki nei au ia Iehova no tei oronga akaou mai i tetai tikaanga noku!

[Tataanga i te kapi 27]

“Mei te uriurianga mua mai, kua kite au e kua kiteaia e au tetai apinga puapinga. Inara i taua taime ra, kare au i manako ana e kia taui au i te tu o toku oraanga i roto i tetai ua atu mataara.”

[Tataanga i te kapi 29]

“Kare i rauka iaku te akaruke i te kai avaava i roto i toku uaorai maroiroi. Inara na te pure akatenga e te irinaki ki runga i te Atua, ko Iehova, kua rauka iaku te akaruke i te reira”

[Tataanga i te kapi 30]

“I mua ana, e manako ana au i te Pipiria e e puka ture ua. Teianei, kua taui toku manako. Kua akamata au i te kite i te au tangata i roto i te Pipiria ei au tangata tika tikai, ma to ratou manako e te tu paruparu mei toku rai”