E Akavaitata Atu ki te Atua

Te Inangaro ra Aia ia Tatou kia Puapinga

Iosua 1:​6 -9

TE INANGARO ra te au metua akono kia puapinga ta ratou tamariki, kia noo i tetai oraanga meitaki e te merengo tikai. Te inangaro katoa ra to tatou Metua i te rangi, ko Iehova, kia puapinga tana tamariki i te enua nei. Ei akaari i tana akono anga akaperepere, te akakite maira aia kia tatou e akapeea e puapinga ai. Ei akaraanga, e akamanako ana i te au tuatua tana i tuatua atu kia Iosua, tei rekotiia i roto ia Iosua 1:​6-9.

Akamanako ana i teia ngai, e akaariia maira i te tua katau. I muri ake i te matenga o Mose, ko Iosua te arataki ou o Iseraela, e mirioni ua atu ratou. Te akapapa ra te ngati Iseraela i te tomo ki roto i te enua ta te Atua i taputou ki to ratou ai metua. E au akoanga ta te Atua kia Iosua. Me aruia, ka tauturu te reira iaia kia puapinga. Inara, kare teia akoanga i orongaia kia puapinga uaia a Iosua. Me taangaangaia te reira, ka puapinga katoa tatou.​—Roma 15:4.

Kua akakite a Iehova kia Iosua kia matutu e kia maroiroi​—kare e tai mari ra e toru taime. (Irava 6, 7, 9) Papu meitaki e, ka anoanoia a Iosua kia matutu e kia maroiroi i te arataki i te iti tangata ki roto i te Enua Taputouia, ma te puapinga. Akapeea ra aia i reira, e riro mai ei kia matutu e kia maroiroi?

Ka rauka ia Iosua te akamatutu anga e te akamaroiroi anga mei te au tata akauruia. “Kia akono koe e kia rave i te ture katoa ta taku tavini ta Mose i akaue ia koe ra,” i karanga ai a Iehova. (Irava 7) I taua taime ra, kare i maata roa te au puka Pipiria tei tataia, ka rauka ia Iosua. * Inara, me tei ia koe te Tuatua a te Atua, kare mei te mea e ka rauka ua mai te puapinga. Kia puapingaia mei te reira, ka anoanoia a Iosua kia rave e rua apinga.

Te mea mua, ka inangaroia a Iosua kia akaki putuputu i tona ngakau ki te tuatua a te Atua. Kua karanga a Iehova e: “Kia akamaara tikai ra koe i te reira i te po e te ao.” (Irava 8) Te akakite maira tetai tataanga e: “Te akaue ra te Atua ia Iosua kia akamaara i Tana Ture na te ‘koumuumu anga’ i te reira kiaia uaorai, te ‘manako oonu anga’ i te reira, me kore i te ‘akamanako anga no runga’ i te reira.” Te tatau anga e te manako oonu anga ki runga i te Tuatua a te Atua i te au ra tatakitai, ka tauturu ia Iosua i te rave i te au akaaoanga e vai maira i mua iaia.

Te rua, ka anoanoia a Iosua kia taangaanga i tana e apii maira mei te Tuatua a te Atua. Kua akakite a Iehova kiaia e: “Kia akono koe e kia rave i tei tata katoaia i roto ra: ei reira e meitaki ei toou aerenga.” (Irava 8) Te kapitiia maira te puapinga o Iosua ki tana rave anga i te anoano o te Atua. Akapeea atu ei e tuke ei te reira? Ka puapinga ua rai te anoano o te Atua.​—Isaia 55:10, 11

Kua akarongo a Iosua i te ako a Iehova. Tei tupu mai, kua noo aia i tetai oraanga roa e te merengo ei tangata akamori tiratiratu ia Iehova.​—Iosua 23:14; 24:15.

Ka inangaro ainei koe i te noo i tetai oraanga ki pu tikai, mei to Iosua rai? Te inangaro ra a Iehova ia koe kia puapinga. Inara, kare e rava ua me tei ia koe tana Tuatua, ko te Pipiria. Kua akakite tetai taeake Kerititiano akarongo mou e: “Tatauia te Pipiria e e tuku i te reira ki roto i toou ngakau.” Me akaki putuputu koe i toou ngakau ki te tuatua a te Atua e e taangaanga i taau e apii ra i roto i toou oraanga, “ei reira e meitaki ei toou aerenga,” mei to Iosua rai.

[Tataanga Rikiriki i Raro]