Tuatua Meitaki i Roto i te 500 Reo

I ROTOPU tikai i te tamakianga a tetai iti tangata i Ruanata, kua oro atu tetai pupu tangata uri reo tokoiti ua mei to ratou au ngutuare, e kua akaruke i ta ratou au apinga. Inara, kua rauka ia ratou i te rave mai i ta ratou au komupiuta laptop, ta ratou i apai atu ki te au puakapa tuitarere. No teaa ra? Kia rauka ia ratou i te uri ua atu rai i ta ratou au puka akatumuia ki runga i te Pipiria ki roto i te reo Kiniaruanata.

Tetai mapu vaine i roto i te tua Apatonga Itinga o Asia, te taipu ra ki runga i tana komupiuta i te roa anga po, i te akakoromaki anga i te roiroi, te vera, e te turanga matemate o te uira e tamanamanata ra i tana angaanga uri reo. Eaa tona akakoroanga? Kia oti i mua ake ka tae ei te taime e neneiia ai.

Ko teia aronga uri reo e tuanga ratou no tetai pupu tauturu, mei te 2,300 e angaanga ra i roto i te 190 tuma au ngai, takapini i teianei ao. To ratou au mataiti, mei te 20, vaitata atu ki te 90, e te angaanga pakari ra kia rauka i te au tangata te pumaana mei te karere a te Pipiria i roto i te 500 reo.​—Apokalupo 7:9.

Itaeanga i te Au Tangata Reo Tukeke

I te au mataiti i topa ua akenei, ko te angaanga uri reo a te Au Kite o Iehova kua taea tetai turanga kare i kiteia ana i mua ana. Ei akaraanga, i te mataiti 1985, kua neneiia Te Punanga Tiaki i roto i te 23 reo i te taime okotai​—e tupuanga umere tikai no taua taime ra. I teia tuatau, ka rauka Te Punanga Tiaki i roto i te 176 reo, e te nenei katoatoaia nei te reira i te taime okotai, kia rauka i te aronga tatau takapini i teianei ao, i te apii i taua tataanga ra i taua taime rai.

Ko Te Punanga Tiaki ua te tianara e nenei putuputuia ana i roto i te 50 tuma au reo. Eaa te tumu? Kare e tumu puapinga no te au kamupani nenei apinga tatau, kia nenei i te au puka i roto i te reo o to ratou ngai. Kareka ra te Au Kite o Iehova i te ao katoa nei, e oronga ua ana ratou ma te kore e tutaki i te akarava i ta ratou au apinga, kia rauka ua rai te Tuatua a te Atua e te au puka no runga i te Pipiria i te au ngai e anoanoia ra.​—2 Korinetia 8:​14.

Te akaperepere ra te tangata i te karere o te Pipiria i roto i to ratou uaorai reo. Ei akaraanga, koi nenei uaia ake nei tetai au puka Pipiria i roto i te reo Miskito, e reo e tuatuaia ana e te au tangata mei te 200,000 i Nikarakua. Kua pati tetai vaine i te puka My Book of Bible Stories * i roto i te reo Miskito, e te reira te orometua o taua ngai ra, i te tae anga mai te puka. I tona kite anga i taua puka manea ra, kua inangaro te orometua i te puka nana. Kare te vaine i oake ana i tana puka, noatu e kua oronga mai  te orometua kiaia, e 50 kiro karama ua kaope no te puka!

I te rau ngauru mataiti i topa, kua uriia te au puka akatumuia ki runga i te Pipiria ki roto i te au tatini e ara reo tumu o Meiko, te kapitiia maira te reo Maya, Nahuatl, e te Tzotzil. I raro ake i te rau ngauru mataiti, kua tupu maata atu te au putuputuanga reo tumu e te reo akairo o te Au Kite o Iehova i roto i taua enua ra mei te 72 ki te 1,200. Penei te tatanu ra te Au Kite o Iehova i te karere o te Pipiria ki roto i te au ngakau tangata, inara te akaruke ra ratou i te reira ki te Atua kia akatupu i taua au ua o te tuatua mou ra.​—1 Korinetia 3:​5-7.

Pipiria Uri Ouia ki Roto i te 80 Reo

I te au mataiti i topa ua akenei, kua angaanga pakari te Au Kite o Iehova kia rauka te katoaanga o te New World Translation of the Holy Scriptures me kore ko tetai tuanga ua, i roto i te 80 reo. Eaa tei tupu? Kua tuatua tetai Kite Aperika Tonga no runga i te Pipiria Tswana e: “E manea tikai teia apinga. Ka tauturu teia iaku kia marama e kia akaperepere maata atu i te Tuatua a te Atua. Te reo i taangaangaia, mama ua i te tatau e te reka tikai.” Tetai tangata tatau reo Tetonga mei Motamapiki mai kua tata e: “Noatu e kua rauka te au puka pouroa tei akatumuia ki runga i te Pipiria, me kare ra e Pipiria, aite rai te reira mei te mangungu e te uira, kare ra e ua! Inara, kua topa mai te ua i te tukunaia mai anga te New World Translation i roto i te reo Tetonga.”

I roto i tetai mataara umere, te akatupuia nei tetai totou taito e te aronga e uri ra e e tua aere ra i te tuatua meitaki ka kitea i roto i te Pipiria. Na Iesu Karaiti uaorai i tuatua e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”​—Mataio 24:⁠14.

[Tataanga Rikiriki i Raro]

[Tutu i te kapi 15]

(No runga i teia, akara i te puka)

TE NEW WORLD TRANSLATION

Ka rauka te katoaanga me kore tetai tuanga ua

1950 1*

1970 7*

1990 13*

2000 36*

2010 80*

AU PUKA KE

1950 88*

1960 125*

1970 165*

1980 190*

1990 200*

2010 500*

*AU REO

[Au Tutu i te kapi 14, 15]

Mei tetai 2,300 aronga tauturu e uri ra i te au puka Pipiria ki roto i te 500 reo

PENINI

TOROVENIA

ETIOPIA

PERITANE