I muri ake i te matenga o te au apotetoro a Iesu, kia tae ki te akamataanga o te rua anere mataiti T.N., kua rongonui te au Ekaretia Metua. I te akataka anga mai i ta ratou au apiianga, te karanga ra te New Catholic Encyclopedia (2003), Voriumu 6, kapi 687, e: “Te apiianga tei matauia koia oki, ka orongaia te turanga mataora i te rangi ki te meta tei akatakakeia mai i muri ua ake i tetai ua atu tamaanga ka anoanoia, i te matenga.”

“E mataora to te aronga maru, e riro oki te enua ia ratou.”​—Mataio 5:5, NW.

Noatu e kua taputou a Iesu ki tana au apotetoro e te aere nei aia i te “akamanea i tetai ngai” no ratou i te rangi, kua akaari aia e kare te aronga tuatua tika pouroa e aere ki reira. (Ioane 3:13; 14:2, 3) Kare ainei e kua pure aia kia akatupuia te anoano o te Atua “mei to te rangi ra, ki runga katoa i te enua nei”? (Mataio 6:9, 10, NW) Te tikaanga tikai, okotai rai o te nga kaveinga e rua, e tapapa maira i te aronga tuatua tika. Tokoiti ua rai te ka tutara i te rangi e Karaiti, ko te maataanga ra ka ora e tuatau ua atu i runga i te enua nei.​—Apokalupo 5:⁠10.

I te tuatau tei aereia, kua taui te ekaretia o mua ana i to ratou manako no runga i to ratou uaorai turanga i te enua nei. Eaa tei tupu mai? “Kua tauta ua atu rai te akaaerenga o te ekaretia i te mono i te Patireia o te Atua ta ratou i tapapa ana,” i akakite ei The New Encyclopædia Britannica. Kua akamata te ekaretia i te akatinamou i tona mana na te piri atu anga ki roto i te angaanga poritiki, te kopae anga i ta Iesu au tuatua taka meitaki ki tana au pipi e “kare kotou i to teianei ao.” (Ioane 15:19; 17:​14-16; 18:36) I raro ake i te mana akakeu o te Emepera o Roma ko Constantine, kua akaoko te ekaretia i tetai au irinakianga a ratou, tetai, te o maira to te Atua tu tikai.

Akaaite atu i teia au irava Pipiria: Salamo 37:​10, 11, 29; Ioane 17:3; 2 Timoteo 2:​11, 12