“Kua ariki te aronga tuatua pakari Kerititiano o mua ana i te manako o te Ereni, no runga i te turanga mate kore o te meta, e kua manako e na te Atua i anga e i tuku i te meta ki roto i te kopapa i te tuatau i to ei.”​—The New Encyclopædia Britannica (1988), Voriumu 11, kapi 25.

“E te tangata [meta] ravarai e kore e akarongo i taua peroveta ra, e pou rava ïa i rotopu i te tangata katoa.”​—Angaanga 3:⁠23.

No runga i te angaia anga te tangata mua, te na ko ra te Pipiria e: “Kua anga iora te Atua ra ko Iehova i te tangata i te one-pueu o te enua nei, kua akapuangi iora aia i te aʼo ora ki roto i tona putaiu; riro akera te tangata ei tangata ora [Epera, neʹphesh].”​—Genese 2:⁠7.

Te tuatua Epera neʹphesh, tei uriia e “tangata,” te aiteanga ‘e mea ora e akaea ra.’ Te anga mai anga te Atua i te tangata mua, ia Adamu, kare Aia i tuku ana i tetai meta mate kore ki roto iaia, mari ra ko te ao ora e tauturu ra iaia kia akaea. No reira, ko te aiteanga o te “tangata” ta te Pipiria e tuatua ra koia oki, e tangata ora. Me akatakakeia mai mei te ao ora tei orongaia mai e te Atua i te akamataanga, ka mate te meta koia oki te tangata.​—Genese 3:⁠19.

Kua akatupu mai te apiianga o te meta mate kore i tetai au uianga: E aere ana te meta koia oki, te tangata kiea, i muri ake i te matenga? Eaa te ka tupu ki te meta o te aronga rave kino? Te ariki anga te au Kerititiano akatutu ua i te apiianga pikikaa no runga i te meta mate kore, kua taki atu teia ia ratou kia ariki i tetai apiianga pikikaa ke mai​—te apiianga no runga i te ai era.

Akaaite atu i teia nga irava Pipiria: Koheleta 3:19; Mareko 10:⁠45.