E TAITAIA ana rai koe e kua manako e ka akamutu koe?​— * Maata te pera ana. Akapera ana te mapu a Ieremia. Kare ra aia i akariro ana i ta etai ke tuatua e ta ratou i rave ei akanauru iaia kia akamutu. Ka tuatua ana tatou e eaa a Ieremia i puapinga maata ai ki te Atua, e oti akera kua manako aia e ka akamutu aia.

I mua ake ka anau mai ei a Ieremia, kua iki te Atua mou ko Iehova iaia, kia riro ei peroveta i te akamatakite i te tangata e kare te Atua e mareka ana ia ratou. Kua kite koe e eaa ta Ieremia i akakite kia Iehova i te au mataiti i muri mai?​— “Kare au i kite te tuatua: e tamaiti ua oki au nei.”

Toou manako e i akapeea a Iehova i te pau anga atu ia Ieremia?​— Na roto i te tu aroa e te papu tikai, kua tuatua atu Aia e: “Aua koe e karanga, E tamaiti ua au: e aere ra koe ia ratou katoa e tonokia koe e au ra; e ko te au mea katoa taku e akaue kia koe, ko taau ïa e tuatua. Auraka e mataku.” No teaa ra? “Ei vaitata katoao au ia koe ei akaora, ia koe,” i tuatua atura a Iehova.​—Ieremia 1:​4-8.

Noatu rai, mei tei kiteaia i mua ake, kua rokoia a Ieremia e te taitaia i muri mai. No te mea kua aviriia mai aia no te tavini ra aia i te Atua. ‘Kua riro au ei kataanga na te tangata i te au rā katoa e te aviri maira te tangata iaku,’ i akakite ei aia. No reira kua manako aia e ka akamutu aia. “Kare au e akaiki [ia Iehova], e kare au e tuatua akaou i tona ingoa,” i tuatua ai aia. Inara kua akamutu tika tikai ainei aia?

“I roto i toku ngakau,” i akakite ei a Ieremia, ‘kua riro atura te tuatua a Iehova mei te ai ka kua popaniia ki roto i toku au ivi; roiroi akera au i te akatupua ua.’ (Ieremia 20:​7-9) Noatu e e rokoia ana a Ieremia e te mataku i tetai au taime, kare ra tona aroa no Iehova e tuku ua iaia kia akamutu. Ka akara ana tatou e i akapeea a Ieremia i te paruruia anga no tei kore aia i akamutu.

Kua akakite a Iehova kia Ieremia kia akamatakite i te tangata e ka akapouia a Ierusalema me kare ratou e taui i to ratou au arataa kino. I te oronga anga a Ieremia i te akamatakiteanga, kua riri te tangata e kua tuatua mai e: “E tau teianei tangata i te mate.” Inara kua pati akatenga a Ieremia kia ratou kia  ‘akarongo i te reo o Iehova.’ I reira kua akakite atu aia e: ‘Kia kite pu tikai kotou, e me mate au ia kotou, e tangata ara kore ta kotou i tamate, na Iehova au i tono mai kia tuatua kia kotou.’ Kua kite koe e eaa tei tupu mai?​—

Te na ko ra te Pipiria e: “Kua karanga atura te ui ariki, ma te tangata katoa, ki taua kau taunga ra, e te au peroveta, Kare teianei tangata e tau i te mate; kua tuatua mai oki aia ia tatou i te ingoa o to tatou Atua, o Iehova.” I na, no tei kore a Ieremia i akariro i te mataku ei kotoeanga kia akamutu, kua paruru a Iehova iaia. Ka akara ana tatou i teianei e eaa tei tupu kia Uria, tetai peroveta ke mai o Iehova, tei tuke takiri tana i rave.

Te karanga ra te Pipiria e ko ‘Uria, kua totou iora aia ia Ierusalema mei te au tuatua katoa a Ieremia ra.’ Inara i te riri anga te Ariki ko Iehoiakima ia Uria, kua kite koe e eaa ta Uria i rave?​— Kua mataku aia, e kua akamutu i te rave i te anoano o te Atua, e kua oro ki Aiphiti. I reira kua tono te ariki i tetai au tangata kia kimi iaia i reira, e kia akaoki mai iaia. I te akaoki mai anga ratou iaia, kua kite koe e eaa ta taua ariki kino ra i rave?​— Kua tamate aia ia Uria ki tana koke!​—Ieremia 26:​8-​24.

Eaa ra koe ka karanga ai e kua paruru a Iehova ia Ieremia e kare i paruru ana ia Uria?​— E tika e kua mataku rai a Ieremia mei ia Uria, inara kare a Ieremia i akamutu ana i te tavini ia Iehova e kare aia i oro ana. Kare aia i akamutu ana. Eaa ra i toou manako te apiianga ka rauka mai ia tatou mei te akaraanga o Ieremia?​— I tetai au taime penei ka kite tatou i te tu ngata i te rave i ta te Atua e akakite maira, noatu ra, kia irinaki ua rai tatou iaia e kia akarongo kiaia.