“Kare te au Kerititiano o mua ana i taangaanga ana i te au tiki i roto i ta ratou akamorianga . . . Te akatikaia anga te au tiki ki roto i te ekaretia i roto i te a e te rima anere mataiti, kua arikiia te reira i te manakoanga e, ka kite meitaki atu te au tangata kamakura i te au tika no runga i te Akonoanga Kerititiano mei ia ratou, eiaa mei te au akoanga me kore te au puka.”​— Cyclopedia of Biblical, Theological, and Ecclesiastical Literature, na McClintock e Strong, Voriumu 4, kapi 503 e te 504.

“Auraka rava koe e rapa i tetai itoro naau uaorai i roto i te tu no tetai mea i runga i te rangi me kore no tetai mea i raro i te enua nei me kore no tetai mea o te moana i raro ake i te enua ra. Auraka rava koe e tupou ki raro ia ratou e auraka oki e akamori atu ia ratou.” (Exodo 20:4, 5, The Holy Bible​—New International Version) Kua tata atu te apotetoro ko Ioane ki te au Kerititiano o te anere mataiti mua e: “E aku au tamariki ra, e matakite ia kotou i te au idolo ra.”​—1 Ioane 5:⁠21.

Ko te au tiki ainei, tetai ravenga no te akavaitata atu, e te akangateitei i ta te reira e akatutu ra, mei ta te au ekaretia e karanga ra? “I te akamataanga,” i karanga ai The Encyclopedia of Religion, “penei e ko te akakoroanga o te au tiki kua taangaangaia ana ei akatakaanga [apiianga] e te akamanea; ko ta ratou kotoeanga ra oki ia no te taangaanga i te tiki. Inara, kare i roaia ana kua taangaangaia ei au apinga no te akamorianga. E tika rai teia no runga i te au tutu tei riro ei apinga puapinga tikai no te Akonoanga Otototi Tumu i te Pae Itinga.” Inara, kua ui tika atu te peroveta ko Isaia e: “Koai ta kotou e akaaite ki te Atua? Eaa te tu ta kotou ka akatutu kiaia?”​—Isaia 40:18, The New Jerusalem Bible.

Akaaite atu i teia au irava Pipiria: Isaia 44:​13-19; Angaanga 10:​25, 26; 17:29; 2 Korinetia 5:7