Iesu Karaiti​—Te Ririnui o Tana Karere

“Papu roa e ko te akapapuanga ngaueue kore roa atu no runga i te tangata kite pakari no Kaperenauma mai koia oki, te riro nei rai aia ei akakeuanga ririnui ki runga i tengakau e te manako o te tangata.” *​—AUTHOR GREGG EASTERBROOK.

E MANA to te tuatua. Ka rauka i te au tuatua tei iki meitakiia ei akakeu i te ngakau, akatupu i te manakonakoanga, e te akatuke i te oraanga. Kare rava e tangata tei ririnui roa atu tana tuatua i ta Iesu Karaiti. I muri mai kua tata tetai tangata tei akarongo ia Iesu i te oronga anga i te Tuatua rongonui i runga i te Maunga e: “E kia akaoti akerā Iesu i teianei tuatua anga, kua va ua te tangata i tana tuatua.”​—Mataio 7:28.

Tae mai ki teia ra, e manganui te au tuatua a Iesu tei matauia e te tangata i te ao katoa nei. Ka akamanako ana i etai au akaraanga o tetai au tuatua te ka riro ei mea puapinga maata tikai.

“Kare e tika kia akono atu i te Atua e te Mamona.”​—Mataio 6:24.

“E te au mea katoa ta kotou i anoano ia etai ke ra, na reira katoa kotou ia ratou.”—Mataio 7:12.

“E apai mari i ta Kaisara kia Kaisara; e ta te Atua ra, e apai ïa ki te Atua.”​—Mataio 22:21.

“E mea meitaki i te oronga atu i te rave mai.”​—Angaanga 20:35.

Inara e maata atu ta Iesu i rave i to te tuatua ua i te au tuatua rongonui. E mana to te karere tana i tutu aere no te mea kua akakite te reira i te tuatua mou no runga i te Atua, kua apii i te tangata e ka akapeea e kitea ai te aiteanga tikai o te oraanga, e kua tou atu ki te ravenga puapinga roa atu​—te Patireia o te Atua. Ia tatou e makitoro marie ra i teia karere i roto i te au kapi ka aru mai, ka kite tatou i te tumu e riro nei rai a Iesu ei akakeuanga ririnui ki runga i te mirioni ua atu “ngakau e te manako o te tangata.”

[Tataanga Rikiriki i Raro]