Ta Iesu i Apii no Runga Iaia Uaorai

“Kare rava a Iesu e ekoko ana e koai aia, noea mai aia, te tumu i aere mai ei aia ki to tatou nei ao, e ta te tuatau ki mua ka apai mai nona.”​—AUTHOR HERBERT LOCKYER.

I MUA ake ka ariki ei tatou e ka irinaki ei i te au mea ta Iesu i apii, ka anoanoia tatou kia kite no runga iaia. Koai tikai a Iesu? Noea mai aia? Eaa tona akakoroanga no te oraanga? I roto i te au Evangeria​—ia Mataio, Mareko, Luka, e Ioane—​ka kite tatou i te au pauanga mei ia Iesu uaorai.

Kua noo ana aia i mua ake ka anau mai ei ki te enua nei Kua akakite ana a Iesu e: “Kare a Aberahama i anau ra, Te noo nei au.” (Ioane 8:58) Kua noo ana a Aberahama mei tetai 2,000 mataiti i mua ake ka anau mai ei a Iesu. E oti akera, kua noo ana a Iesu i mua ake ka noo ei taua pateriareka akarongo mou ra ki te enua nei. I noo ra a Iesu kiea? “I eke mai nei oki au mei te rangi mai,” i akamarama mai ei aia.​—Ioane 6:38.

Te Tamaiti a te Atua E manganui ua atu te au tamariki angera a Iehova. Ko Iesu ra, e tu aite kore tikai tona. Kua tuatua aia no runga iaia uaorai e ko “te Tamaiti anau tai a te Atua.” (Ioane 3:18) Te aiteanga o taua tuatua koia oki ko Iesu anake ta te Atua i anga tika mai. Ko te Tamaiti anau tai ta te Atua i taangaanga i te anga mai anga i te au mea tini ravarai.​—Kolosa 1:16.

“Te Tamaiti a te tangata” E maata atu ta Iesu taangaanga anga i teia tuatua kiaia uaorai i tetai ua atu. (Mataio 8:20) Kua akaari mai aia i reira e kare aia i te angera tei akatu a tangata mai e kare katoa aia i te tutu o te Atua. Mari ra, e tangata tikai aia. Na roto i tona vaerua tapu, kua tuku mai te Atua i te oraanga o tana Tamaiti mei te rangi mai ki te enua nei, ki roto i te vairanga tamariki o te tamaine paretenia ko Maria, e kua nui akera aia. Tei tupu, kua anauia mai a Iesu ei tangata apa kore e te ara kore.​—Mataio 1:18; Luka 1:35; Ioane 8:46.

Te Mesia taputouia “Kua kite au e, te aere maira te Mesia,” i karanga ai te vaine Samaria kia Iesu. Kua pau atu aia e: “Ko au ïa e karanga atu kia koe na.” (Ioane 4:25, 26) Te kupu “Mesia,” mei te kupu “Karaiti,” te aiteanga “Tei Akatainuia.” Kua akatainuia a Iesu me kore kua ikiia e te Atua, kia rave i tetai tuanga angaanga takake rava i roto i te akatupuanga o ta te Atua au taputou.

Tona tumu maata i aere mai ei Kua karanga ana a Iesu e: ‘E tutu aere rai au i te evangelia o te basileia o te Atua; i tonokia mai ei oki au.’ (Luka 4:43) Noatu e maata tana au angaanga meitaki i rave no te aronga i ngere, ko te tutu anga i te Patireia o te Atua te angaanga maata i roto i tona oraanga. Tana i apii no runga i taua Patireia ra ka uriuriia a muri ake.

Te taka ua ra e, kare a Iesu i te tangata noa ua nei. * Mei ta tatou ka kite, kua riro tona oraanga i te rangi ei akaoonu atu i te puapinga o te au tuatua tana i akakite i te enua nei. Kare ainei tatou i reira e poitirere e kua tutu aia i te karere te ka akatuke i te oraanga o te mirioni ua atu takapini i teia nei ao?

[Tataanga Rikiriki i Raro]