E KITE ana koe i te tu ngata kia akarongo i tetai taime?​— * Kare i te mea poitirere me i akapera ana koe. E kite ana te katoatoa rava i te tu ngata kia akarongo i tetai au taime. Kua kite koe e kua inangaroia rai a Iesu kia apii i te tu akarongo?—

Kua kite koe e koai ta te tamariki pouroa ka inangaroia kia akarongo?​— Ae, ko to tatou metua tane e te metua vaine. “E akarongo atu i to kotou au metua i tei tau i te Atu ra,” i karanga ai te Pipiria. (Ephesia 6:1) Koai te metua tane o Iesu?— Ko te Atua ko Iehova, e e Metua katoa aia no tatou. (Mataio 6:9, 10) Inara me karanga koe e ko Iosepha te metua tane o Iesu e ko Maria tona metua vaine, ka tika katoa taau. Kua kite ainei koe e i akapeea raua i riro mai ei ei nga metua nona?—

Kua akakite te angera ko Gaberiela kia Maria e ka akapeea aia i te riro anga mai ei metua vaine noatu e kare aia i moe ake ki tetai tane. Teia akatonuianga kua akatupu a Iehova i te reira na te rave anga i tetai temeio umere tikai. Kua akamarama a Gaberiela kia Maria e: “Na te mana o Tei Teitei e tamaru i rungao ia koe; e tuatuaiaʼi oki tenana tamaiti tapu, i te Tamaiti na te Atua.”​—Luka 1:30-35.

Kua rave te Atua i te oraanga o tana Tamaiti i runga i te rangi e kua tuku atu i te reira ki roto ia Maria. I reira kua tupu taua oraanga ra i roto iaia mei te au pepe rai e tupu ana i roto i to ratou metua vaine. Mei te iva marama i muri mai, kua anauia a Iesu. I te au taime i aereia, kua akaipoipo a Iosepha ia Maria, e kua manako te maata anga o te tangata e ko Iosepha te metua anau o Iesu. Ko te tikaanga ra, e metua angai a Iosepha nona. No runga i teia, ka tau kia karangaia e, e rua o Iesu metua tane!

E 12 rai o Iesu mataiti, kua rave aia i tetai apinga tei akaari i tona inangaro maata no tona Metua i te rangi, ko Iehova. I taua taime ra, kua aere atu te ngutuare tangata o Iesu ki tetai tere mamao i Ierusalema no te Pasa, e peu matauia e ratou i te rave. I muri mai, ia ratou e oki ra ki te kainga i Nazareta, kua kite mai a Iosepha e Maria e kare ua a Iesu i rotopu ia ratou. Kare koe i umere ana e akapeea roa ai i ngaropoina ai aia ia ratou?—

Ina kia tae atu ki taua taime ra, e tamariki ke atu ta Iosepha raua ko Maria. (Mataio 13:55, 56) Penei katoa e e au kopu tangata ke mai to ratou e aru ra ia ratou, mei ia Iakobo e Iose pera katoa to raua metua tane, ko Zebedaio, e te metua vaine, ko Salome, penei e tuakana me kore e teina no Maria. Penei, no reira a Maria i manako ei e te aru maira a Iesu i tetai o te au kopu tangata i roto i te pupu.​—Mataio 27:56; Mareko 15:40; Ioane 19:25.

I te kite anga a Iosepha e Maria e kare ua a Iesu, kua oki viviki atu raua ki Ierusalema. Kua rapu raua i te kimi aere i ta raua tamaiti. I te toru o te ra, kua kitea e raua aia i roto i te iero. Kua karanga atu a Maria kiaia e: “Eaa koe i pera mai ei kia maua? i na, i kimi ua ana au ma toou metua tane ia koe ma te aue.” Inara kua pau mai a Iesu e: “Eaa korua i kimi ei iaku? kare korua i kite e, ei roto rai au i te are o taku Metua e tau ei?”​—Luka 2:45-50.

 I toou manako e kua tarevake a Iesu i te pau atu i tona metua vaine mei tera te tu?​— Ina e, kua kite nga metua e e inangaro ana aia i te akamori i ko i te are o te Atua. (Salamo 122:1) No reira, kare ainei e kua tika rai a Iesu kia akamanako e ko te iero o te Atua te ngai mua ka kimi raua iaia?— I muri mai, kua akamanako ua a Maria i ta Iesu i tuatua.

Eaa ra to Iesu tu kia Iosepha raua ko Maria?— Te karanga ra te Pipiria e: “E oki maira [a Iesu] e ko raua katoa ki Nazareta, akarongo atura ia raua.” (Luka 2:51, 52) Eaa ta tatou ka tamou mai mei te akaraanga o Iesu?— Ae, ka anoano katoaia tatou kia akarongo i to tatou au metua.

Tera ra oki, kare i ngoie ua ana ia Iesu kia akarongo​—i tona Metua i te rangi.

Te po i mua ake i tona matenga, kua pati a Iesu kia Iehova me ka tika Iaia kia taui i Tona manako no runga i Tana i inangaro iaia kia rave. (Luka 22:42) Inara kua akarongo a Iesu i te Atua noatu e kare te reira i te mea ngoie. Kua karanga te Pipiria e “i kite aia i te akamoraro i tona au mate.” (Ebera 5:8) Toou manako e ka rauka katoa ia tatou te tamou mai i tera apiianga?—