Te 127 Karatuatianga Gileada

Au Mitinari tei Tukuia “e Tae ua Atu ki te Openga o te Enua”

KUA akaue a Iesu i tana au pipi kia riro ei au kite nona “e tae ua atu ki te openga o te enua.” (Angaanga 1:⁠8) E akauenga puapinga tikai teia ki te Au Kite o Iehova.

Te tika, i te au mataiti tere atu i te 65 i topa, kua riro te au mitinari tereniia i ko i te Watchtower Bible School of Gilead ei tauturu i te akamata i te angaanga tutu aere i roto i te au enua tere atu i te 200. I te Maanakai, ra 12 o Tepetema, mataiti 2009, kua riro mai e 56 au taeake e te au tuaine tukatau meitaki i te angaanga tutu aere, ei au karatuati mei te terenianga no tetai rima marama i ko i te apii mitinari i Patterson, i New York, i Marike.

Te Mana o te Akamanakoanga

Kua tuatua a Stephen Lett, e mema no te Pupu Akaaere o te Au Kite o Iehova e e tiamana no te porokaramu karatuatianga ki te pupu no runga i te tumu tuatua maata e “Taangaanga Meitaki i Taau Akamanakoanga.” Kua akamatakite aia na mua i te au karatuati, auraka kia taangaanga i ta ratou au akamanakoanga i roto i tetai au mataara e a. Te au mea mua e toru e: (1) Auraka e manako e ka rauka i te au apinga materia i te oronga mai i te paruruanga tinamou; (2) kopae i te manako atu i te au angaanga ainga tau kore; e te (3) auraka e maata te apiapi, i te manako anga e ka kino atu apopo. (Maseli 18:11; Mataio 5:28; 6:34) No runga i te toru o te mea, kua akakite te vaa tuatua e te kapiti maira tetai tangata apiapi maata i te manamanata o nanai ki runga i to teia ra au manamanata, e te itae atura i te apai mai i to apopo au manamanata kia kapitiia ki to teia ra. “E teiaa tikai te reira apainga,” i tuatua ai te Taeake ko Lett. Eaa i reira te a o te mataara? Kua akamatakiteia te pupu e auraka e akamanako e e meitaki atu to ratou oraanga i mua ake ka tukuia ai ratou ki ta ratou au tukuanga angaanga mitinari. Me rave ratou i te reira, ka ngere ratou i te mataora te ka rauka mai i roto i to ratou au ngai ou.

Kua akamaroiroi i reira te Taeake ko Lett i te pupu kia taangaanga i ta ratou au akamanakoanga i roto i tetai au mataara papu tikai e a. Kua akakite aia e: (1) Kia kite vave ua i te au turanga i mua, te ka riro ei takino i te pae vaerua me kore i te pae kopapa, e e kopae i te tumatetenga; (2) akatutuia i roto i toou manako te au ngai taau e tatau ra i roto i te Pipiria, e e akamanako ia koe ei tuanga i roto i taua tupuanga ra; (3) akamanako e ko tetai ua atu taau ka tuatua atu i roto i taau tukuanga angaanga ou, ka riro mai ei tangata akamori ia Iehova; e te (4) e akaari i te tu akaaroa, ia koe e akamanako atura ia koe uaorai i roto i te ngai o te au tangata taau e tutu aere atura.​—Maseli 22:⁠3.

Te Puapinga i te Tereni i Etai Ke

Ko David Splane, e mema no te Pupu Akaaere kua tuatua no runga i te tumu tuatua maata e “Ko Taau ïa e Tuku ki te Aronga Tuatua-Mou,” akatumuia ki runga ia 2 Timoteo 2:2. I te akoanga te apotetoro ko Paulo ia Timoteo kia tereni i te au tangata akarongo mou, ko te akakoroanga o Paulo no Timoteo, kare ei apii anake ua i teia au tangata i te au tuatua mou, mari ra ei akamaroiroi katoa ia ratou kia tereni i etai ke. Kua akakite te vaa tuatua ki te pupu e te anoano maataia ra te au tane kia rave i te aratakianga i te au angaanga Kerititiano. Aea e akapeea teia aronga i te tereniia anga? Kua akamaroiroi te Taeake ko Splane i te pupu kia akamata i te tereni i teia au tangata mei te taime mua mai i te akamataanga te au mitinari i te apii i te Pipiria kia ratou.

Akapeea, e taka meitaki ei te terenianga a te au mitinari i te aronga apiipii Pipiria kia riro mai ei au akaraanga akarongo mou ki etai ke? Kua akataka mai te vaa tuatua i tetai au mataara. Ka anoanoia te au mitinari kia tereni ia ratou kia akapapa meitaki no ta ratou uaorai au apii Pipiria. I reira, i te aronga apiipii e akamata ra i te aere ki te au uipaanga a te putuputuanga, ka anoanoia ratou kia apii e akapeea i te akapapa i ta ratou  uaorai au apii akatumuia ki runga i te Pipiria, te ka uriuriia i ko i te au uipaanga. “Me kare tetai tangata e kite i te apii i te Pipiria, koia anake ua,” i akakite ei te vaa tuatua, “kare rava e rauka iaia te apii i etai ke.” Kua akakite katoa te Taeake ko Splane e, ka rauka i te au mitinari i te tauturu i te aronga ou kia tae vave, kia oronga i te moni ei turu i te angaanga tutu aere, e kia kauraro i te aronga e arataki ra i te reira taime. Kua karanga aia e ko te mataara meitaki roa atu i te apii i taua au apiianga ra, koia oki kia akanoo i tetai akaraanga meitaki.

E Tikaanga Ngateitei te Riro Anga ei Kite

Kua tuatua a Guy Pierce, e mema katoa no te Pupu Akaaere no runga i te tumu manako maata tei akatumuia ki runga i te au tuatua a Iesu, tei rekotiia i roto ia Angaanga 1:8 e, “Ei Kite oki Kotou Noku.” Kua akamaara aia ki te pupu e i roto i te anere mataiti mua T.N., kua ngere te iti tangata Iseraela i te tikaanga ei au kite no Iehova. Kua orongaia taua tikaanga ra ki tetai iti tangata tei ua mai i te au ua Patireia. (Mataio 21:43) Kua akapapu mai te putuputuanga o te au Kerititiano akatainuia e, ko ratou taua iti tangata ra. Kua taiku mai te vaa tuatua i te apotetoro ko Petero, tei karanga e ko te “iti-tangata tapu” o te au Kerititiano akatainuia ra, ka “akakite ua” i te meitaki o Iehova. (1 Petero 2:​6-9) No reira, kare a Iesu i tuatua e ka riro te au Kerititiano ei au kite ua nona e kare ratou e riro ei au kite no Iehova. I na e, kua kapikiia a Iesu e ko “te kite tuatua-mou.” (Apokalupo 1:5; 3:14) Koia te Kite mua tikai o Iehova e te akaraanga ta tatou ka aru.​—1 Petero 2:⁠21.

I teia tuatau, kua akakite te vaa tuatua ki te pupu e, ko te au tuatua a Iesu i roto ia Angaanga 1:8, e aiteanga puapinga maata atu to te reira. Eaa te tumu? Tetai tupuanga puapinga tikai i roto i te totou, mei tei rekotiia i roto ia Apokalupo 11:15, kua akatupuia! Kua tutara te Patireia Mesia o te Atua. I teianei, i roto i tetai tu tika tikai, te akatupuia ra te angaanga akakitekite aere “e tae ua atu ki te openga o te enua.” (Angaanga 1:⁠8) Kua akakite te Taeake ko Pierce e ka riro te au mitinari ei kite no runga ia Iehova e tona Patireia, kare e no ratou uaorai me kore no to ratou oraanga i mua ana, ta ratou peu e to ratou enua. Kua akamaroiroi aia i te pupu kia apii “i te maataanga o te tangata te ka rauka ia ratou i te tuatau e toe nei.”

Etai Atu Au Manako Maata o te Porokaramu

Ko Alex Reinmueller, e tauturu no te Kumiti Neneianga, kua tuatua no runga i te tumu manako “Ka Oronga Mai a Iehova i te Tu Mataku Kore kia Koe.” Kua tuatua aia e, me irinaki te au mitinari ki runga i te mana o Iehova, ka tauturu Aia ia ratou kia kite i to ratou tu maroiroi, kia ariki i to ratou tu paruparu, kia aro atu i to ratou tu mataku e kia oronga ki te Atua i to ratou tu meitaki roa atu.

Ko Sam Roberson raua ko William Samuelson, e nga puapii i roto i te Tipatimani o te Apii Teokaratiki, kua tuatua katoa ki te aronga apiipii. Kua tuatua te Taeake ko Roberson no runga i te tumu manako “Te Vaitata Katoao Au Ia Koe,” akatumuia ki runga ia Isaia 41:10. Kua akakite aia e ka mataora maata te au mitinari. Ka manamanata katoa ra ratou. Ka autu ratou me aru ratou i te Ariki ko Davida, tei pure atu ki tona Metua aroa. (Salamo 34:​4, 6, 17, 19) Kua akamaata te akoanga a te Taeake ko Samuelson ki runga i te anoano kia akatupu i te tu karape o te manako. Ko te au mitinari e rave ra i te reira, te rauka ra ia ratou te akakoromaki i te au tuatua kino e kare ratou e viviki ana i te riri.​—Maseli 2:​10, 11.

Ko Jim Mantz, e tauturu i roto i te Kumiti Tataanga, kua uiui atu ki tetai mema o te Kumiti Manga mei te Repapuriki o Tiotia, tetai atu mema mei Onotura, e tetai mema o te Kumiti Enua mei te Repapuriki o Tatikitani. Kua oronga teia au taeake kite karape ki te au mitinari i te akoanga e akapeea i te akaoaoa atu i te aronga tu makitakita ‘kia mate te kino i te meitaki.’ (Roma 12:21) Ko Mark Noumair, tetai puapii o te pupu, kua rave i tetai uriurianga oraora no runga i te au tupuanga o te angaanga tutu aere tei mataora te aronga apiipii i te rave, i te tuatau terenianga i Gileada. I roto i taua tuanga puapinga ra koia oki ko te tumu manako maoraora “Ae, Akapeea Au i te Tauturu Anga ia Koe?”

Kua akaoti te tiamana i te porokaramu na te taikuanga i te au tuatua o te imene ou e “See Yourself When All Is New.” Kua aere atu te aronga tei tae mai e 6,509 ma te manako maroiroi tikai kia riro ei kite no Iehova e tana Tamaiti “e tae ua atu ki te openga o te enua.”

 [Tutu/​Mapu i te kapi 31]

TE AU TU O TE PUPU

8 enua tei komonoia

56 aronga apiipii

28 tokorua akaipoipo

33.6 mataiti avereti

18.3 mataiti avereti mei te papetitoanga

13.6 mataiti avereti i te angaanga orometua tamou

[Mapu]

(No runga i teia, akara i te puka)

Tukuia te pupu ki te au enua e 22 tei akaariia i raro ake

AU TUKUANGA ANGAANGA MITINARI

TIAMAIKA

NIKARAKUA

KOTA RIKA

PANAMA

PERU

TIRE

AITI

KURATAO

KAIANA

KOTIVUA

PORIVIA

PARAKUAI

TEREPIA

ARAPANIA

KONGOKO, TEMO. REPA. O

MOROTOVA

UKANATA

PURUNITI

TANATANIA

MOTAMAPIKI

NEPARA

KAMUPOTIA

[Tutu i te kapi 31]

Pupu Karatuati 127 o te Apii Pipiria Punanga Tiaki o Gileada

I te papaanga i raro ake, kua tanumeroia te au pa mei mua ki muri, e kua papaia te au ingoa mei te kaui ki te katau i te pa takitai.

(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.

(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.

(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.

(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.

(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.

(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.

(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.