“E Akara Ïa i te Ngakau”
E Akavaitata Atu ki te Atua
“E Akara Ïa i te Ngakau”
TE TU o te akaraanga i vao ake, i tetai taime e pikikaa ua rai. Kare tikai te tu o te tangata i vao ake e akaari mai e mei teaa tona tu i roto, i te oonuanga o tona ngakau. E akara ua ana te tangata i te tu o vao ake. Te mea meitaki ra, e akara oonu atu ana te Atua ko Iehova ki roto. Te akaari taka meitakiia maira teia e te tuatua tei rekotiia i roto ia 1 Samuela 16:1-12.
Akamanako ana i tei tupu mei tei akatakaia mai i roto i te papaanga ka aru mai. Te aere ra a Iehova ka akatainu i tetai ariki ou ki rungao i te iti tangata o Iseraela. Kua karanga atura te Atua ki te peroveta ko Samuela: “E tono atu au ia koe kia Iese i Betelehema ra; kua rauka oki tetai ariki naku i roto i te au tamariki nana ra.” (Irava 1) Kare a Iehova i akakite mai i te ingoa kua karanga ua ra aia e, ko te tangata tei ikiia no roto mai i te tamariki a Iese. Ia Samuela e aere ra ki Betelehema, penei te manako ua ra aia e, ‘Ka akapeea ra au e kite ei e ko teea i te tamariki a Iese ta Iehova i iki?’
Te tae atu anga ki Betelehema, kua akanoonoo a Samuela kia piri mai a Iese e tana au tamariki ki tetai kaikaianga atinga. I te tomo mai anga a Eliaba, te tama mua, i reira rai kua poitirere a Samuela i tona tu taurekareka. Kua manako a Samuela e kua tau meitaki a Eliaba ei ariki e kua na ko akera kiaia uaorai e: “Ko ta Iehova tikai teia i akatainu ra, tei mua i tona aroaro.”—Irava 6.
Kareka ra a Iehova, e tuke rai tana akara anga. Kua karanga atura aia kia Samuela e: “Auraka e akara i tona mata, e tona tu i te teitei; no te mea kua kopaeia aia e au.” (Irava 7) Kare a Iehova e poitirere ana i to Eliaba tu teitei e te manea. Te kite ra te mata o Iehova i te au mea ravarai no runga i tetai tangata e te akara ra ki te ngai ka kiteaia te tu taurekareka mou tikai.
Kua akamarama atura a Iehova kia Samuela e: “Kare oki ta Iehova akara anga e tau ki ta te tangata; e akara oki te tangata ki te tu i vao ake, karekā Iehova e akara ïa i te ngakau.” (Irava 7) Ae, ko te ngakau—te tangata i roto, te puna o te manako, te au tu, e te au manako ngakau—tei puapinga roa atu kia Iehova. Kua kopae “tei timata i te ngakau” ia Eliaba—e pera katoa te au tamariki toko ono a Iese tei aere mai ki mua ia Samuela.—Maseli 17:3.
E tai a Iese tamaiti toe, ko Davida, te tamaiti openga, “te tiaki ra i te au mamoe.” (Irava 11) No reira kua tikiia atu a Davida mei te au koro kia aere mai ki mua ia Samuela. I reira kua akakite a Iehova kia Samuela: “Ka tu, ka akatainu iaia; koia oki tena.” (Irava 12) E tika oki e, “e tangata muramura [a Davida], e te mata meitaki e te tu meitaki kia akara atu.” Inara ko tona ngakau te mea tei akariro iaia ei tangata tau tikai i roto i te mata o te Atua.—1 Samuela 13:14.
I roto i teia ao tei akariro e ko te tu taurekareka o vao ake te mea puapinga roa atu, ka pumaana tatou i te kite e kare te Atua ko Iehova e akakeuia ana e te tu o te akaraanga o vao ake. Kare i te mea puapinga kiaia toou teitei me kore me te manako maira etai ke e e taurekareka koe me kore e manea. Ko toou tu i roto, toou ngakau, tei puapinga atu kia Iehova. Te riro ra aina te kite anga i te reira, ei akakeu ia koe kia akatupu i te au tu te ka akariro ia koe ei mea taurekareka i roto i te mata o te Atua?
