Ka Aere Pouroa Ainei te Au Tangata Meitaki ki te Rangi?

I MURI ake i to Iesu kaikai openga e tana au apotetoro i te aiai i mua ake i te tamateia anga aia, kua taputou a Iesu i te tutaki ia ratou ki tetai ngai i te rangi. Kua na ko aia e: “Manganui te nooanga tikai i te are o taku Metua ra: naringa kare ra, kua karanga atu au kia kotou. Te aere nei au e akamanea i tetai ngai no kotou.” (Ioane 14:⁠2) Eaa ra a Iesu ka oronga ai i tetai ngai no ratou i te rangi? Eaa ta ratou ka rave i reira?

Te akamanako ra a Iesu i tetai angaanga puapinga no tana au pipi. I taua aiai rai, kua karanga aia e: “Ko kotou ko te aronga e noo tamou i vaitata iaku i toku au timataanga nei: Mei toku metua i akono i tetai basileia noku ra, kua akono katoa au ia kotou.” (Luka 22:28, 29) Kua taputou te Atua kia Iesu e ka riro mai aia ei Ariki, te ka oronga mai i tei anoano maata ravaia e te tangata​—e kavamani meitaki. Ka akaora a Iesu i te tangata mei te mamae e ka takore i te aronga e pikikaa ra ia ratou. Noatu e e au tangata to Iesu e noo ra “e tae ua atu ki te openga o te enua,” tona terono tei runga i te rangi.​—Salamo 72:4, 8; Daniela 7:13, 14.

Inara, kare e ko Iesu anake ua te ka tutara. Mari ra, kua taputou aia ki tana au apotetoro i tetai ngai i te rangi. Ko ratou te aronga mua i ikiia kia ‘riro ia ratou te au i teianei ao.’​—Apokalupo 5:10.

Eia aronga ka aere ki te rangi? Mei tetai ua atu kavamani, e iti ua te au tutara i roto i te Patireia o te Atua i te rangi me akaaiteia ki te tangata pouroa te ka noo i raro ake i to te reira mana akaaere. Ki te aronga te ka tutara e ia, kua tuatua atu a Iesu e: “Auraka e mataku, e taku anana iti; e mea anoano na to kotou Metua, i te oronga mai i te basileia no kotou.” (Luka 12:32) Ko te numero o taua “anana iti” ra, i te openga e 144,000. (Apokalupo 14:1) E numero iti ua te reira me akaaiteia atu ki te au mirioni te ka rekareka i te oraanga mutu kore i te enua nei ei au tangata tiratiratu no te Patireia.​—Apokalupo 21:4.

No reira, kare te au tangata meitaki pouroa e aere ki te rangi. No runga i te ariki meitaki ko Davida, kua akakite taka meitaki mai te apotetoro ko Petero e: “Kare oki a Davida i tae ki runga i te rangi.” (Angaanga 2:34) E tangata meitaki a Ioane Papetito. Tera ra, kua akakite a Iesu e kare aia e akangateiteiia kia tutara ei ariki i runga i te rangi. “Ta te vaine i anau nei,” i akakite ei a Iesu, “kare atu ïa e maata atu ia Ioane bapetizo nei: ko te iti rava ra i te basileia o te ao ra, e maata atu ïa iaia.”​—Mataio 11:11.

Ka Rauka Ainei ia Koe te Tutaki a te Au Tangata Meitaki?

E rauka ai te tutaki no te oraanga e tuatau ua atu i te enua nei, eaa ta tetai tangata ka tau i te rave? Kua karanga a Iesu e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Ka akara ana e, na te aroa o te Atua no te ao nei, i akakeu iaia kia akatuera i te oraanga mutu kore no te katoatoa, no te aronga anake ua ra tei “akarongo iaia,” te ka rauka taua tutaki ra.

Te anoanoia ra te akarongo kia akatumuia ki runga i te kite tika tikai. (Ioane 17:⁠3) Ka rauka ia koe i te akaari e e tangata meitaki koe na te apii maata atu anga no runga i to Iehova akakoroanga no te tangata. E ariu atu ma te akarongo ki roto i taau i tamou mai. E kia papu e ko te tikaanga no te oraanga mutu kore, te tuera ua atura kia koe.

 [Pia i te kapi 7]

Eaa ta te Pipiria e Akakite Maira?

Uianga:

Eaa te ka tupu ki te au tangata meitaki me mate ratou?

Pauanga:

“Kare ra a te aronga i mate ra e tuatua i kitea.”​—KOHELETA 9:5.

Uianga:

Eaa te manakonakoanga o te au tangata meitaki no te tuatau ki mua?

Pauanga:

“Te vaitata mai nei oki te ora, e akarongo ei te aronga katoa i roto i te rua i tona [Iesu] reo, E kua aere mai ki vao.”​—IOANE 5:28, 29.

Uianga:

Ka noo te maataanga o te au tangata meitaki kiea?

Pauanga:

“Ka riro te enua no te aronga tuatua-tika, ka noo tamou rai ratou i reira.”​—SALAMO 37:29.