Ka Rauka Ainei i Tei Mate te Tauturu i te Aronga Ora?

KO TAMBA, e mapu tane i te tua Opunga o Aperika, te vaitata ra i te rave i tetai tarere i te apii. * Kua maro tona mama iaia kia kimi i te tauturu a te kopu tangata tei mate kia puapingaia aia. I Palermo, i Sicily, e tutaka ana te aronga turoto i te au tanumanga i raro enua, te ngai e anere ua atu kopapa mate akono meitakiia e akarakaraia ana. Te irinaki ra tetai pae e ko teia au kopapa mate tavairakauia, te oronga ra i te paruruanga a te Atua ki te aronga e ora nei. I te au mataiti tataki tai, e aere ana te tangata ki Lily Dale, e taoni i te pae opunga o New York State, i Marike, tei matauia i te kite no te maata i te aronga purepure e noo ra ki reira. E turoto mai ana te tangata ma te manakonakoanga e ka rauka ia ratou te tuatua ki to ratou kopu tangata me kore au oa tei mate, kia rauka te tauturu mei ia ratou.

Takapini i te ao, te vai nei rai te irinakianga e ka rauka i tei mate te tauturu i te aronga e ora nei. Eaa toou manako? Penei kua apiiia ana koe ki taua irinakianga ra me kore e pirianga vaitata toou ki tetai aronga e turuturu ra i te reira manako. E mea natura ua kia nakunaku atu i to tatou aronga akaperepere tei mate. Kua taputou ra te aronga purepure e ka rauka ia ratou te akatupu i te reira. Kua taikuia te tuatua a tetai vaine purepure i roto i te makatini Time i te karanga anga e “e papa ua ana rai” to te po “me kapikiia mai kia tauturu.” E tika ainei tera? Ka rauka tikai ainei i tei mate te tauturu i te aronga e ora nei? Penei ka poitirere koe i te pauanga taka meitaki a te Pipiria.

Te Ora ra Ainei Tei Mate i Tetai Ngai?

Te akamarama maira te Pipiria na roto i te au tuatua mama ua i te marama te turanga o tei mate. Akara ana e eaa ta Koheleta 9:5 e akakite maira: “Kua kite oki te aronga e ora nei e ka mate ratou: kare ra a te aronga i mate ra e tuatua i kitea.” Ka tau ainei e e manako to tei mate? Te pau maira te irava 6 e: “To ratou aroa, e to ratou riri, e to ratou vareae, kua kore anake ïa; kare oki a ratou e tuanga e tuatau ua atu i te au mea katoa i raveia i raro ake i te rā nei.” Akara katoa e te akakite ra te irava 10 o taua pene rai e “kare oki e angaanga, kare e kimianga, kare oki e kite, kare oki e pakari, i roto i te vaarua taau e aere na.” Te mea umere ra, te akaari maira a Angaanga 2:31 e kua aere a Iesu Karaiti ki taua ngai rai no tetai taime, i muri ake i tona matenga.

E manganui te aronga tei tauturuia e Iesu iaia e ora ra, inara kua kite aia e ka mate aia. Te tapapa atura ainei aia e ka rauka rai iaia te tauturu i te tangata iaia i roto i te vaarua tanumanga? Kare. Kua akaaite aia i tona uaorai mate e vaitata maira ki te po, kare e angaanga e rauka i te rave. (Ioane 9:⁠4) Kua kite a Iesu e me mate te tangata, kare e rauka ia ratou te tauturu i etai ke.

Kua taangaanga katoa a Iesu i tetai akaaiteanga ei akataka i taua manako ra no runga i te mate. I te mate anga tona oa a Lazaro, kua akaaite a Iesu i te mate mei te moe rai. (Ioane 11:​11-13) Kare tatou e tapapa atu i te tangata e moe ra kia tauturu mai ia tatou, me kare ainei? Kare a te tangata moe apinga e kite maira, kare katoa e rauka i te tauturu i tetai ke.

E Tuanga Ainei to te Tangata Mate ka Ora Atu?

E manganui te tangata tei apiiia e ko te meta, e tuanga kitea koreia te reira te ka ora atu me mate te tangata. Te apii maira te Pipiria i tetai apinga ke takiri. Te akataka maira te puka mua o te Pipiria, ko Genese, i te meta kia tatou. Te akakite maira a Genese 2:7 e i te angaia anga te tangata mua, kua “riro akera te tangata ei tangata ora.”  Te tangata katoa, e meta; e te au manu e meta. (Genese 1:20-25) No reira rai e, me mate tetai tangata me kore tetai manu, kua mate katoa ia te meta. Te akapapu maira te Pipiria i teia.​—Ezekiela 18:4.

Inara, penei ka ui tetai aronga e, ‘Akapeea i reira te au tua e manganui o te aronga e tuatua ana ki tei mate, te akarongo anga i to ratou reo, me kore te kite anga tikai ia ratou?’ E au tua matau teia i roto i te au tuanga e manganui o teianei ao. Te oronga ra taua au tua ra i te manakonakoanga no te aronga tei mate to ratou kopu tangata me kore au oa, i te akakeu anga i te manganui ia ratou kia kimi i tetai tangata purepure e karanga ra e ka rauka iaia te tuatua atu ki tei mate.

E tika ainei taua au tua ra? Me koia ia, kare ainei teia e patoi i te akakiteanga i runga akenei tei akatumuia ki roto i te Pipiria? Kua akataka mai te Karaiti ko Iesu i te Tuatua a te Atua e ko te tuatua mou. (Ioane 17:17) Kare te tuatua mou e patoi ana iaia uaorai. Te tika, e aratakianga taka meitaki ta te Pipiria, e ka akapeea tatou me akamanako atu i te au tuatua e, ka rauka i tei mate te tauturu i te aronga e ora nei. Te akakite maira te Pipiria kia tatou no runga i tetai tangata tei tauta kia rauka te tauturu mei tei mate. Ka riro te tatau meitaki anga i teia tataanga ei akaari mai i te tuatua mou.

Tetai Ariki tei Pati Tauturu ki tei Mate

Te ngai koia oki, ko te ngai tamakianga i te pae tokerau o Iseraela. Kua akaaoia mai te Ariki ko Saula e tona nuku, e te vaeau matakuia o te Philiseti. I te kite anga atu a Saula i te ngai puakapa o te Philiseti, “kua kurukuru rava atura tona ate.” Tae mai ki teia taime o tona arikianga, kua akaruke a Saula i te akamorianga mou. Tei tupu, kare a Iehova i pau mai ana i tana au patianga no te tauturu. Ka kimi i reira a Saula i te tauturu kiea? Kua mate oki te peroveta o te Atua ko Samuela.​—1 Samuela 28:3, 5, 6.

Kua kimi a Saula i te aratakianga mei tetai vaine purepure i Enidora. Kua pati akatenga aia ki te vaine purepure kia ‘apai mai ia Samuela’ mei te mate. Kua akatu mai te vaine purepure i tetai turuma. Kua akakite teia “Samuela” kia Saula e ka autu te Philiseti e ka mate a Saula e tana tamariki i roto i te tamaki. (1 Samuela 28:7-19) Ko Samuela tikai ainei te reira tei oki mai mei te mate?

E akamanako ana i te reira. Te akakite maira te Pipiria e me mate te tangata ka ‘oki aia ki tona ra one e kore rava atura tana i akakoro.’ (Salamo 146:4) Kua kite a Saula raua ko Samuela e kua tureia e te Atua te tuatua ki te aronga purepure. Ina oki e, i mua atu ana na Saula tikai i akaue kia takoreia te au angaanga purepure i roto i te enua!​—Levitiku 19:31.

E akamanako ana i teia mea. Naringa a Samuela akarongo mou e ora ra rai ei vaerua, ka aati ainei aia i te ture a te Atua e ka angaanga kapiti ki te vaine purepure kia rauka i te aravei atu ia Saula? Kare a Iehova i inangaro ana i te tuatua kia Saula. Ka rauka ainei i reira i tetai tangata purepure, kia maro i te Atua Mana Katoatoa kia tuatua mai kia Saula na roto ia Samuela tei mate? Kare. Te taka meitaki ua ra, kare teia “Samuela” e ko te peroveta akarongo mou a te Atua i roto i tetai ua atu tu. E vaerua te reira, kare ra e ko Samuela​—e temoni kino, tei akatutu pikikaa mai ia Samuela tei mate.

Ko te au temoni, e au angera tei meameaau i te mana akaaere o te Atua i roto i te tuatua enua mua o te tangata. (Genese 6:​1-4; Iuda 6) Ka rauka i teia au temoni i te akara i te au tangata ia  ratou e ora ra; kua kite ratou e akapeea ana teia aronga me tuatua, me akara e me angaanga. Te inangaro ua ra ratou i te akatupu ua atu i te manako e kare e tika ana ta te Pipiria e tuatua ra. No reira rai te Pipiria i akamatakite mai ei e auraka e tuatua atu ki taua au vaerua kino ra! (Deuteronomi 18:10-12) Te ririnui nei rai te au vaerua kino i teia tuatau.

I teianei penei te kite nei tatou e eaa te manganui i karanga ai e te “akarongo” ra me kore te “kite” ra ratou i te aronga akaperepereia tei mate. Noatu e e akaraanga meitaki to taua au turuma ra i tetai taime, te titau nei teia au vaerua kino i te akavare i te au tangata. * (Ephesia 6:12) Pera katoa, e akamanako ana i teia: E Atua aroa a Iehova e te akaperepere maira ia tatou. Naringa e te ora ra tei mate i tetai ngai, e ka rauka i te tauturu i to ratou au oa e te ngutuare tangata, ka arai ainei Tei Anga aroa mai ia tatou i te tuatua atu kia ratou, e ka karanga e e mea “viivii” te reira? Papu roa e kare! (1 Petero 5:7) E tumu irinakiia ainei tetai e vaira i te tauturu?

Tauturu Tikai no te Aronga Ora e Tei Mate

Kua marama tatou mei te au akakiteanga i mua ake nei e kare e rauka i tei mate i te tauturu i te aronga e ora ra. Tei maata roa atu, e kino atu te au tautaanga i te kimi i te tauturu a tei mate, i to te tu puapinga kore; e kino maata tikai to te reira, no te mea te aati ra i te ture a te Atua e te tuku ra ia tatou ki raro ake i te akakeu anga kino a te temoni.

Te arataki ra te Pipiria ia tatou ki te Tumu meitaki rava atu i te tauturu​—Tei Anga mai ia tatou, ko Iehova. Ka rauka iaia te akaora mai ia tatou mei te mate. (Salamo 33:19, 20) I teia tuatau, te papa ua nei aia i te tauturu ia tatou. Te oronga maira aia i te manakonakoanga tika tikai, kare i te manakonakoanga pikikaa mei ta te aronga purepure rai.

Ko Tamba, tei taikuia i te akamataanga, kua kite mai tikai i te tuke i rotopu i te au manakonakoanga pikikaa e orongaia maira e te aronga purepure, e te tuatua mou ta Iehova e oronga maira kia tatou. Kua karanga te aronga purepure e me kare aia e akaatinga ki tona ai metua tei mate, kare aia e puapinga i tana tarere i te apii. Kua akamata a Tamba i te apii i te Pipiria e te Au Kite o Iehova. Kua kite mai aia i te turanga tikai o tei mate e koai te tumu kino i muri ake i taua aronga e pikikaa ra e ko ratou te ai tupuna tei mate. Noatu te maroanga maata a tona mama kia kimi i te tauturu mei tetai tangata purepure, kua patoi a Tamba, i te akakite anga kiaia e, “Me kare rauka iaku, ka aruaru maata atu au a teia mataiti ki mua.”

Eaa tei tupu? Koia te numero tai i roto i te tarere! Kua umere tona mama, kua kore tona irinaki i te aronga purepure, e kare rava i taiku akaou ana i te au akaatinga anga mei te reira rai. Kua apii a Tamba e te akamatakite maira a Iehova ia tatou kia kopae i te ‘kimi atu i te ora ki tei mate.’ (Isaia 8:19) Na te apii Pipiria i rauka ai ia Tamba te irinaki e me inangaro aia i te ture a te Atua, ka puapingaia aia.​—Salamo 1:1-3.

Akapeea i reira, te aronga akaperepereia tei mate? E manakonakoanga ainei tetai no ratou? Kapiti mai i te tauturuanga ia tatou e ora nei, kua taputou mai a Iehova e ka tauturu katoa aia i te aronga i roto i te vaarua mate. Akara ana i te akakiteanga a te peroveta ko Isaia i te pene 26, irava 19 e: “Toou ra aronga mate, e ora ïa. . . . e ara, e imene, e tei noo ki te one-pueu!” Ka ora akaou te aronga mate.

E akamanako ana i tera! Pirioni ua atu e moe ra i roto i te vaarua mate, ka akaora akaouia mai! Te tika, te akaari maira te Pipiria e te “anoano maata” ua ra a Iehova i te oronga i te ora ki tei mate. (Iobu 14:14, 15, NW) E ngata ainei te irinaki e ka tupu taua au taputou ra? Kua papu meitaki ia Iesu Karaiti teia manakonakoanga, i akataka mai ei aia e te ora ra te aronga tei mate i roto i te mata o Iehova.​—Luka 20:37, 38.

Ka inangaro ainei koe i teia manakonakoanga? * E apii ua atu rai kia kite koe i te kite tika tikai mei te Pipiria. Ia koe e apii ra, ka papu ia koe e ka rauka ia Iehova i te tauturu i te aronga ora e tei mate e e ‘tuatua-mou e te pikikaa kore’ tana au taputou​—Apokalupo 21:4, 5.

[Au Tataanga Rikiriki i Raro]

[Tataanga i te kapi 19]

E mea natura ua kia nakunaku atu i to tatou aronga akaperepere tei mate

[Tutu i te kapi 20]

Kua oki mai ainei te peroveta ko Samuela mei te mate e kua tuatua ki te Ariki ko Saula?