Mei Teaa Rai te Rangi?

E MANAKO ana tetai aronga e kare e rauka i te kite no runga i te rangi no te mea kare rava e tangata i eke mai ana mei reira mai i te akakite kia tatou no runga i te reira. Penei kua ngaropoina ia ratou e kua akakite a Iesu e: “I eke mai nei oki au mei te rangi mai.” (Ioane 6:38) Ki tetai au arataki akonoanga, kua akakite katoa aia e: “No raro nei kotou; no runga au.” (Ioane 8:23) Eaa ta Iesu i tuatua no runga i te rangi?

Kua akapapu a Iesu e ko te rangi te ngai e noo ra a Iehova. Kua kapiki aia i te Atua e ko “taku Metua i te ao [“rangi,” NW] ra.” (Mataio 12:50) Inara, kua taangaanga a Iesu i te tuatua “rangi” i roto i tetai au tu ke mai. Ei akaraanga, kua tuatua aia i te reva o te enua ei “rangi” i te tuatua anga aia e: “E manganui te vaine takaua i Iseraela i te tuatau ia Elia, ka momaniaʼi te rangi ra, e toru akera mataiti e ono oki marama.” (Luka 4:25) Noatu rai, e mamao roa atu te ngai e noo ra a Iehova i vao ake i te mareva. Te karanga ra te Pipiria e: “Nana na tei noo ki rungao i te tua o te enua nei.”​—Isaia 40:22.

Te noo ra ainei te “Metua i te rangi” i rotopu i te au etu? I roto i te au Tuatua Tapu te kapiki katoaia ra te ao e pini ua ake e ko te “rangi.” Ei akaraanga, kua tata tetai tata taramo e: “Kia akara au i to au rangi i te angaanga a to maikao-rima na; te marama e te au etu taau i anga ra; Eaa te tangata nei, i manako mai ei koe iaia?”​—Salamo 8:3, 4.

Kare, kare te Atua ko Iehova e anoanoia kia noo ki roto i te ao e pini ua ake tana i anga, mei tetai tangata kamuta kare aia e anoanoia kia noo ki roto i te kaparata, tana i maani. No reira, i te akatapu anga te Ariki ko Solomona i te iero i Ierusalema kia Iehova, kua tuatua aia e: “Ka noo tika mairai ainei te Atua ki runga i te enua nei? i na, te rangi nei, e te rangi o te au rangi ra, kare rai koe e o; ka tangaʼi oki i teianei are i akatuia e au nei?” (1 Ariki 8:27) Me kare a Iehova e noo ana i runga i te rangi, eaa te rangi tana e noo ra?

Noatu e kua apii ana te tangata no runga i te au rangi e ta ratou au teretikopu ririnui, e kua teretere ana tetai pae ki roto i te mareva, ta te Pipiria e akakite ra, te tika ua ra e: “Kare ua e tangata i kite i te Atua.” (Ioane 1:18) Kua akamarama mai a Iesu i te tumu i te akakite anga aia e: “E Vaerua te Atua.”​—Ioane 4:24.

E tu teitei roa atu te oraanga vaerua i to te oraanga tangata nei. Kare te vaerua i angaia ki te au mea kopapa, mei te kiko e te toto, te ka kitea e te mata e ka amiriia e te tangata. No reira, i te akakite anga a Iesu e i noo ana aia ki te pae i tona Metua i te “rangi,” te aiteanga, tona oraanga i mua ana e oraanga kaka atu i tetai oraanga kopapa ua nei. (Ioane 17:5; Philipi 3:​20, 21) Teia ngai i noo ei a Iesu ei vaerua ma tona Metua, ko ta te Pipiria e kapiki ra e ko te “rangi.” Mei teaa rai te reira? Eaa te mea e tupu ana i reira?

 E Ngai Angaanga Mataora

Te akataka maira te Pipiria i te rangi, ei ngai maata tikai te angaanga. Te taiku maira te reira i te au anere mirioni vaerua ora akarongo mou e noo ra i reira. (Daniela 7:9, 10) Teia au vaerua ora tataki tai no ratou rai to ratou uaorai tu. Akapeea tatou i kite ei te reira? I roto i te au mea pouroa tei angaia, kare rava e aiteite ana tetai nga apinga, no reira papu ia tatou e i runga i te rangi e aka tuke katoa rai to reira. Te mea umere, e angaanga rotai ana teia au vaerua ora pouroa, i te riro anga ei akaraanga meitaki no te enua i teia tuatau, te ngai kare te tangata e taokotai meitaki ana.

Ka akara ana i akapeea te Pipiria i te akataka anga i te angaanga i runga i te rangi. “E akameitaki ia Iehova, e te au angela nana e, ko tei maata i te ririnui, e kua akono i tana akauenga, i te akarongo anga i tona reo kia tuatua. E akameitaki ia Iehova e tona katoa ra au nuku; te au tavini nona ra, ko tei rave i tana i inangaro ra.” (Salamo 103:20, 21) No reira e maata te angaanga e raveia ra i runga i te rangi. Papu ia tatou e e angaanga merengo tikai te reira.

E roa te tuatua enua no te angaanga mataora a te au angera mei te tuatau i mua roa ake i te angaia anga te enua. Kia tau ki te au Tuatua Tapu, i te akatumu anga a Iehova i te enua, i “imene katoatoaʼi” te au tamariki a te Atua, e ‘kua maeva ua i te rekareka.’ (Iobu 38:4, 7) Kua oronga katoaia te tikaanga ki tetai tamaiti a te Atua i te rangi kia angaanga i te pae i te Atua i te anga mai anga i te au mea pouroa. (Kolosa 1:15-17) Penei ka riro teia akatakaanga mareka no te angaanga mataora i te rangi ei akamanakoanga no kotou i te au uianga no runga i te rangi e no te tangata ravarai.

Akakoroia Ainei te Tangata kia Aere ki te Rangi?

I te mea e kua tavini te au angera i te Atua i te rangi i mua ake i te akatumuia anga te enua, tikaanga i reira kare te tangata e te vaine mua i angaia kia akaki i te au rangi ki te tangata. Mari ra, kua na ko atu te Atua ki taua nga tangata mua ra e: “Kia anau korua, e kia maata roa, e e akaki i te enua nei.” (Genese 1:28; Angaanga 17:26) Ko Adamu te mea mua o tetai tu ou no te oraanga i te enua nei, i te kite i te Atua e te tavini akarongo mou iaia. Ka riro mai aia ei metua no tetai katiri tangata, to ratou kainga ko te enua nei. “Te au rangi ra, na Iehova ïa au rangi; kareka te enua nei, kua oronga mai aia na te tamariki a te tangata nei.”​—Salamo 115:16.

Kare i te mea matau no te tangata kia inangaro i te mate; kare te mate i te mea natura ua no te tangata nei. Kua taiku atu te Atua i te mate kia Adamu ei utunga ua ra no te akarongo kore. Naringa a Adamu i akarongo, kare rava aia e mate.​—Genese 2:17; Roma 5:12.

Kare i te mea poitirere i reira e, kare rava te Atua i tuatua ana kia Adamu no runga i te aere anga ki te rangi. No reira, kare te enua i te ngai timataanga i te tangata kia kite e me kua tau ratou no te oraanga i te rangi. Kua angaia te tangata kia noo i te enua e tuatau ua atu, e ka akatupuia rai taua akakoroanga a te Atua. Te taputou maira te Pipiria e “ka riro te enua no te aronga tuatua-tika, ka noo tamou rai ratou i reira.” (Salamo 37:29) Te taka ua ra e, kare te tangata i akakoroia kia aere ki te rangi i te akamataanga. Eaa i reira te tumu i taputou ei a Iesu i te oraanga i te rangi ki tana au apotetoro? Ko te aiteanga ainei a Iesu e ka aere pouroa ainei te au tangata meitaki ki te rangi?