Ta Tatou i Apii Mai mei ia Iesu

No Runga i te Akamorianga Mou

Te ariki ra ainei te Atua i te au akamorianga ravarai?

▪ Kua tangi tikai a Iesu i te tangata tei akavareia e te akonoanga pikikaa. Kua akamatakite mai aia i te “peroveta pikikaa, ko tei aere mai . . . ma te kakau mamoe ra, kareka i roto, e luko taae ïa.” (Mataio 7:15) Kua kite koe e, e taangaanga ana tetai aronga i te akonoanga kia rave i te au mea kino?

I roto i ta Iesu pure ki te Atua kua karanga aia e: “Ko te tuatua aau na te tuatua-mou.” (Ioane 17:17) Kare te Atua e ariki ana i te akamorianga tei patoi i te tuatua mou a te Pipiria. No reira, ki tetai aronga akamori pikikaa, kua taangaanga a Iesu i te tuatua a te Atua tei akakite mai e: “E akamorianga puapinga kore ra ta ratou iaku, ka apii ei i tei tukuia mai e te tangata anake ra.”​—Mataio 15:9.

E akonoanga tika ainei tetai?

▪ I te aravei anga a Iesu i tetai vaine i Samaria tei akavareia e te akonoanga pikikaa, kua karanga atu aia kiaia e: “Kare kotou i kite i ta kotou e akamori nei . . . E akamori ei i te Metua te aronga akamori tika ra, ma te vaerua e te tuatua-mou: ko te tu ïa o te tangata akamori ta te Metua e anoano ra.” (Ioane 4:22, 23) Taka meitaki e, ka kiteaia te akamorianga mou.

Kua akakite a Iesu e: “Kare aku peu rave ua; ko ta taku Metua ra i apii mai iaku ra, ko taku ïa e tuatua nei.” Ina kua kite a Iesu e ko te akonoanga tana e apii ra, ko te akonoanga mou ua rai ia. (Ioane 8:28) No reira kua tuatua aia e: “Ko au te mataara, e te tuatua-mou e te ora; kare ua e tangata e tae ki te Metua ra, mari ra ei iaku.” (Ioane 14:⁠6) No te mea te rotai nei te aronga akamori mou i roto i ta ratou akamorianga i te Metua, ka inangaroia rai ratou kia rotai i roto i te akonoanga mou.

 Peea koe e kite ei i te aronga akamori mou?

▪ E aru ana te Kerititiano ia Iesu Karaiti. Akamanako ana e a mataara te ka riro te aru anga i te akaraanga a Iesu ei akataka meitaki mai i tana au pipi.

1. I roto i tana pure kia Iehova kua karanga a Iesu Karaiti e: ‘Kua akakite atu oki au kia ratou i toou ingoa.’ (Ioane 17:26) Te rave nei rai te au Kerititiano mou i te reira.

2. Kua tutu aere a Iesu no runga i te Patireia o Iehova e kua tono i tana au pipi mei tera are ki tera are kia rave i te reira. Kua karanga aia e: “E te oire e te vila ta kotou e tomo, e ui atu i to reira tangata e tau.” Muri mai, kua akakite aia ki tana au pipi e: “E teianei, ka aere kotou, e akariro i to te pa enua katoa ei pipi.” (Mataio 10:7, 11; 28:19) Ka rauka ngoie ua ia koe i te kite i te au Kerititiano mou i teia tuatau no te mea te rave nei rai ratou i taua angaanga ra.

3. Kua patoi a Iesu i te piri ki roto i te angaanga poritiki. No reira kua tuatua aia no tana au pipi e: “Kare ratou no teianei ao, mei iaku nei rai oki kare i to teianei ao.” (Ioane 17:14) Mea tau kia kitea meitakiia e kare te aronga akamori mou e piri ana ki te angaanga poritiki.

4. E aroa akaatinga tikai to Iesu no etai ke. Kua tuatua aia e: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:35) E akono ana te au Kerititiano mou i tetai e tetai e kare ratou e o atu ana ki roto i te au tamaki.

Akapeea koe e puapingaia ai e te akamorianga mou?

▪ Te rave matau anga i te akamorianga mou, ka anoanoia koe kia kite meitaki ia Iehova na mua. Ka riro te kite i te Atua ei tauturu ia koe kia aru i te mataara meitaki roa atu o te oraanga, e ka akaki i toou ngakau ki te aroa no te Atua. Kua taputou mai a Iehova i te oraanga mutu kore no te aronga e inangaro ra iaia. No reira a Iesu i tuatua ai e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”​—Ioane 17:⁠3.

No tetai akakiteanga maata atu, akara i te pene 15 o teia puka, Eaa Tikai ta te Pipiria e Apii Maira?, neneiia e te Au Kite o Iehova.

[Tutu i te kapi 24]

“Kia matakite ra i te peroveta pikikaa, ko tei aere mai ia kotou ma te kakau mamoe ra, kareka i roto, e luko taae ïa.”​—Mataio 7:15