Taui te Pipiria i te Oraanga

EAA tei akakeu i tetai tangata Rastafari kia pakoti i tona au makave rouru e kia takore i tona tu akavaavaa i te iti tangata papaa? E eaa ra tei akariro i tetai mapu tane kino e koi ana i te moni na te aronga oko apinga akakona, kia taui i te tu o tona oraanga? Akamanako ana i te tuatua a teia au tangata.

“Kua Takore Katoa Au i Toku Tu Akavaavaa i te Tangata.”​—HAFENI NGHAMA

MATAITI: 34

ENUA ANAU: TAMAPIA

ORAANGA: TANGATA RASTAFARI

TOKU ORAANGA I MUA ANA: Kua anauia au i roto i tetai puakapa kimi ora i Tamapia. Kua akaruke toku mama ia Namipia i tetai tuatau tamaki, e kua piri atu ki te South West Africa People’s Organization (SWAPO). Te tamaki ra teia akaaerenga i te kavamani o Aperika Apatonga e tutara ra ki runga ake ia Namipia i taua taime ra.

Kua noo au ki roto i te au puakapa kimi ora tukeke i te 15 mataiti mua o toku oraanga. Te au tamariki i roto i te ngai nooanga o te SWAPO kua apiiia kia arataki i te akaaerenga te ka akamatara mai ia ratou. Kua tereni pakariia matou i roto i te angaanga poritiki e kua apiiia kia makitakita i te iti tangata papaa.

I te tae anga toku mataiti ki te 11, kua inangaro au kia riro mai ei Kerititiano i roto i tetai ekaretia i roto i te puakapa, e akonoanga, kapiti ua te Katorika Roma, te Lutheran, te Anglican, e tetai atu. Kua akaparuparuia au e te orometua taku i tuatua atu kia kore e rave i teia takainga. Mei reira mai, kare au e irinaki akaou ana e e atua tetai. Inara, i te tae anga toku mataiti ki te 15, kua taki atu toku inangaro i te akatangi imene reggae e toku anoano kia akakore atu i te au tu tau kore tei takinga kino i te au tangata Aperika kerekere kia piri atu ki te akaaerenga tangata Rastafari. Kua akatupu au i toku au makave rouru, kua kai te maruana, kua akakore i te kai i te kiko manu, e kua turu i te tu rangatira no te au tangata kerekere. Inara, kare au i taui ana i toku oraanga tau kore me kore i te akara i te au teata kino. E kua vai ua atu rai taku tuatua viivii.

KUA TAUI TE PIPIRIA I TOKU ORAANGA: I te mataiti 1995, e 20 oku mataiti, kua akamanako pakari au no runga i taku ka rave i roto i toku oraanga. Te apii ra au i te au puka tangata Rastafari pouroa taku i kite mai. Kua taiku mai tetai o taua au puka ra i te Pipiria, inara kare au i marama ana i te au akamaramaanga. No reira kua tatau au i te Pipiria.

I muri mai, kua oronga mai tetai oa tangata Rastafari i tetai puka apii Pipiria naku, tei neneiia e te Au Kite o Iehova. Kua apii au i teia puka e te Pipiria, ko au anake rai. I muri mai, kua aravei au i te Au Kite o Iehova e kua rave ua atu rai i taku apii Pipiria e ratou.

 Kua tauta pakari tikai au, i te akaruke i te kai avaava e te inu maata i te kava. (2 Korinetia 7:⁠1) Kua tama au i te tu o toku akaraanga, kua pakoti i toku au makave rouru, kua akamutu i te akara i te au teata ainga tau kore e te kino, e kua tauta i te tapupu i taku au tuatua viivii. (Ephesia 5:3, 4) I te openga, kua kore toku tu akavaavaa i te iti tangata papaa. (Angaanga 10:​34, 35) Te o maira ki roto i teia au tauianga te takore anga i te au akatangi imene e turu ra i te iriiri tangata, e kia akamutu i te piri atu ki toku au oa o mua ana, e akakeu ra iaku kia oki akaou ki toku tu oraanga i mua ana.

I muri ake i te rave anga i taua au tauianga ra, kua kimi au i tetai Are Uipaanga Patireia o te Au Kite o Iehova e kua pati kia piri atu ki te reira akonoanga. Kua raveia tetai apii Pipiria naku. I toku iki anga kia papetitoia ei Kite no Iehova, kare toku ngutuare tangata i rekareka ana. Kua akakite mai toku mama e e iki au i tetai ua atu akonoanga “Kerititiano” eiaa ra i te Au Kite o Iehova. Kua akaapa ua mai rai tetai o toku angakara, e mema maata no te kavamani, i taku ikianga kia piri atu ki te Au Kite.

Inara, kua riro te apiianga no runga i ta Iesu akono anga atu i te tangata e oti te taangaanga i tana akoanga, ei tauturu iaku i te akakoromaki i te patoianga e te aviri. Me akaaite au i te apiianga a te Au Kite ki ta te Pipiria e tuatua ra, papu iaku e kua kitea e au te akonoanga tika. Ei akaraanga, te aru ra ratou i te akauenga a te Pipiria kia tutu aere ki etai ke. (Mataio 28:19, 20; Angaanga 15:14) E kare ratou e piri atu ana ki roto i te angaanga poritiki.​—Salamo 146:3, 4; Ioane 15:17, 18.

KUA PUAPINGA AU: Kua riro te apii anga i te au turanga Pipiria ei tauturu iaku, i roto i te au mataara tau. Ei akaraanga, te akamutu anga taku kai maruana, kua tauturu iaku kia kore e kaimoumou e anere ua atu tara i te marama okotai. Kare au e manako anevaneva akaou ana, e kua meitaki mai au i te pae manako e te pae kopapa.

I teianei kua rauka iaku te aratakianga e te akakoroanga taku i nakunaku ua ana i roto i toku oraanga mei toku mapuanga mai. E tei puapinga roa atu, kua rauka iaku te manako e kua akavaitata atu au ki te Atua.​—Iakobo 4:⁠8.

“Rauka Iaku te Akakoromaki i te Riri.”​—MARTINO PEDRETTI

MATAITI: 43

ENUA ANAU: AUTIRERIA

ORAANGA: TANGATA OKOOKO APINGA AKAKONA

TOKU ORAANGA I MUA ANA: Iaku e tupu maira e neke aere ana toku ngutuare tangata. I noo ana au i roto i te au taoni rikiriki, i roto i tetai oire maata, e i tetai taime i ko i te ngai nooanga o te aporitini i vao mai i te oire. E mataora ana au i te akamaara i te au taime e noo ra matou ko toku au katini e te au angakara​—i te tautai, te pupui manu, te maani i te au boomerang, e te tarai i tetai au apinga.

E tangata moto toku papa e te tamariki ra rai au i akamata ai aia i te apii iaku i te ta. Kua riro mai au ei tangata kino tikai. I te  au mataiti e mapu tamariki ra au, e maata toku taime e pou ana i te inu kava i ko i te au are kava. E kimi ta ana au e toku au oa. E taangaanga ana matou i te matipi e te rakau pa poro ei ta atu i tetai pupu tangata e 20 me kore maata atu.

E rauka ana taku moni na te oko anga i te au apinga akakona e te au apinga keiaia mai e te aronga angaanga uapu. E koi aere ana rai au i te moni na te aronga oko apinga akakona mei ta ratou aronga kaiou, na te tamatakutaku anga i te tangata ki te pupui e te pitara. Toku akakoroanga, kia riro mai ei tangata tamate tangata. Taku tuatua koia oki, Tamate i tetai ke, me kore ko koe te ka tamateia.

KUA TAUI TE PIPIRIA I TOKU ORAANGA: I akarongo ana au no runga i te Au Kite o Iehova iaku e maata maira. Maara iaku, mei te 20 oku mataiti kua ui au ki toku mama me kua kite aia i te ngai o taua aronga ra. E rua ra i muri mai, kua topapa mai tetai Kite ko Dixon tona ingoa i toku ngutupa. I muri ake i ta maua pukapukaanga no tetai taime, kua pati mai aia iaku ki tetai uipaanga a te Au Kite o Iehova. Kua aere au ki taua uipaanga ra e te aere nei rai au ki taua au uipaanga ra no tetai 20 tuma mataiti i teianei. Te au uianga pouroa taku i ui, kua rauka i te Au Kite i te pau mai mei roto i te Pipiria.

Kua mataora au i te kite e te inangaro maira a Iehova i te aronga tataki tai, pera katoa te aronga akono kore i te Atua. (2 Petero 3:9) Kua kite mai au e e Metua aroa aia te ka akono mai iaku, noatu e kare atu e tangata ke e manako mai ana iaku. Kua pumaana katoa au i te kite e ka akakore mai aia i taku ara me taui au i toku au arataa. Kua riro te au irava Pipiria o Ephesia 4:​22-24 ei akakeuanga maata kiaku. Kua akamaroiroi taua tataanga ra iaku kia ‘kopae i te tangata taito’ e “kia akatangata ou oki ko tei angaia kia tau i te Atua ra.”

Kua pou rai iaku tetai taime i te taui i toku tu oraanga. Ka pou iaku te epetoma e kare au e kai i te apinga akakona, tera ra, i te openga o te epetoma me piri au ki toku au oa, ka kai akaou au no te pakari o te taomianga. Kite mai au e ka anoanoia au kia akaatea mei toku au taeake me ka inangaro au i te tama i toku oraanga, no reira kua neke atu au ki tetai tuanga ke o te enua. Kua pati mai tetai o toku au oa kia aru mai iaku i toku tere, e kua akatika au i te reira. To matou aere anga, kua akamata ratou i te kai maruana e kua oronga mai i tetai naku. Kua akakite atu au kia ratou e kua akaruke au i taua au peu ra, e kua aere ua atu au, ko au anake ua ki te kena o taua tuanga enua ra. Muri mai, kua kite mai au e i muri ua mai, kua taangaanga taku au oa i te pupui i te keia anga i tetai pangika.

KUA PUAPINGA AU: I toku akaruke anga i te piri atu ki taua au taeake ra, kua kite mai au i te tu ngoie i te rave i te au tauianga te ka anoanoia i roto i toku oraanga. I te mataiti 1989, kua riro mai au ei Kite papetitoia. I muri ake i toku papetitoia anga, kua piri pouroa mai toku tuaine, toku mama, e toku papa kiaku i te tavini anga ia Iehova.

I teianei e 17 oku mataiti i te akaipoipo anga, e e toru aku tamariki manea. Kua rauka iaku te akakoromaki i toku riri, noatu e te akaririia maira au. E kua kite mai au i te inangaro i te tangata no ‘te au pa enua ravarai, te au kopu ravarai, e te reo katoa oki.’ (Apokalupo 7:9) Manako au e kua tupu tikai te au tuatua a Iesu i roto i toku turanga. Kua akakite aia e: “I tāpu tika kotou i taku tuatua, e pipi tikai kotou naku i reira: Ka kite ïa kotou i te tuatua-mou, e na te tuatua-mou kotou e akarangatira.”​—Ioane 8:31, 32.

[Tataanga i te kapi 17]

Te o maira ki roto i te au tauianga te takore anga i te au akatangi imene e turu ra i te iriiri tangata

[Tataanga i te kapi 18]

E kimi ta ana au e toku au oa. E taangaanga ana matou i te matipi e te rakau pa poro ei ta atu i tetai pupu tangata e 20 me kore maata atu