Tetai puka apii ko te, World Religions in Denmark, tei neneiia i te mataiti 2007, kua akataka mai te reira i te Au Kite o Iehova ei pupu Kerititiano meangiti ua tei aru meitaki i te apiianga a te Pipiria. Te tikaanga ra, ko te Au Kite o Iehova te toru o te pupu akonoanga Kerititiano maata roa atu i Tenemaka.

Inara, kua akaapa pakari te epitikopo o te Akonoanga Enua o Tenemaka i te vaine tata no tei kapiti atu i te Au Kite ki roto i te puka. Eaa te tumu? “Kare ake rai au i aravei ake i tetai tangata apii no runga i te au akonoanga, tei manako e e au Kerititiano te [Au Kite o Iehova],” i akakite ei te epitikopo. “Patoi tikai ratou i te Toru Tai, te tuanga puapinga rava atu o te akonoanga Kerititiano.”

Kua akakite te vaine tata o taua puka ra, e poropeta i roto i te apii no runga i te akonoanga, ko Annika Hvithamar e, me uiia ki te tangata e eaa ratou i manako ei e e au Kerititiano ratou, kare roa ratou e pau mai ana e, no te mea kua irinaki ratou e e Toru Tai te Atua. Tetai, te akakite ra tetai tuanga i roto i te puka i raro i te tumu tuatua “E Kerititiano Ainei Koe?” e: “Ko te irinakianga o te Toru Tai tetai o te au manamanata ngata roa atu o te apiianga a te au akonoanga Kerititiano.” Kua kapiti mai te reira e: “I te au taime katoatoa, e ngata ua ana rai i te akamarama ki te aronga kare i aere ana ki te apii akonoanga e okotai rai Atua, kare e toru.”

Taka meitaki e te mama ua ta te Pipiria e apii ra no runga i te Atua e Iesu. Kare i te mea ngata i te marama. Kare te tuatua “Toru Tai” e kare katoa taua manako ra e kiteaia i roto i te Tuatua a te Atua. Te akakite taka ua maira te Pipiria e ko Iesu Karaiti te Tamaiti anau tai a te Atua. (Kolosa 1:15) Te kapiki katoa ra te reira ia Iesu e ko te “Arai i rotopu i te Atua e te tangata.” (1 Timoteo 2:⁠5) No runga i te Metua, te karanga ra te Pipiria e: “Ko Iehova toou ingoa, e ko koe anake Tei Teitei i te enua katoa nei.”​—Salamo 83:⁠18.

Irinaki te Au Kite o Iehova e e mea puapinga tikai te akarongo i roto ia Iesu. (Ioane 3:16) Ko te tumu teia i ariki pakari ei ratou i te akauenga a Iesu e: “Kua oti oki i te tataia, ‘Ko toou Atua ra ko Iehova taau e akamori, e koia anake rai taau e akarongo.’ ” (Mataio 4:10) E tano ei e, ka tau tetai tangata e tauta ra i te akono i te au akauenga a Iesu, kia kapikiia e e Kerititiano.