TE PEKAPEKA e te nga metua ongai penei e riro ana ei mea takatakata, inara kare te reira i te mea kataia i roto i te oraanga. “No te au mataiti i aereia, e tamanamanata ua ana rai toku mama ongai i to maua akaipoipo,” i karanga ai a Reena, e vaine i Initia. “Te maata anga o te taime, e kave ana au i toku riri ki runga i taku tane no te mea kare e rauka iaku te akapera i tona mama. Mei te mea rai e, ka iki ua rai aia kia riro mai ei tane meitaki me kore ei tamaiti meitaki.”

Eaa ra tetai au metua ongai e tamanamanata ai i te oraanga akaipoipo o ta ratou tamariki? Kua akakite mai a Jenny, tei taikuia i te akamataanga, i tetai tumu. “Penei e ngata ia ratou i te akara atu i tetai mapu ou ua e te kamakura i te riro anga ei akono i ta ratou tamaiti me kore tamaine,” i karanga ei aia. Te akataka maira a Dilip, te tane a Reena, i tetai tumu ke atu. “Te nga metua tei akaatinga e tei utuutu i ta raua tamaiti, penei te manako ra e te kopaeia ra raua,” i karanga ai aia. “Penei te manamanata katoa ra rai raua e te ngere ra ta raua tamaiti me kore tamaine i te pakari no te akapuapinga i te oraanga akaipoipo.”

Kia tau ra oki, i tetai taime e patiia ana te manako o nga metua ongai. Ei akaraanga, akamanako ana ia Michael e Leanne, e nga tokorua akaipoipo i Autireria. “No roto mai a Leanne i tetai ngutuare tangata piri vaitata tikai, e uriuri atea ua ana te katoatoa i te au mea ravarai,” i karanga ai a Michael. “No reira, i muri ake i to maua akaipoipo anga e ui ua ana rai aia ki tona papa no tetai au ikianga te ka tau tikai na maua roa ai e rave i te reira. E maata te kite o tona papa, inara e kinokino ana au e ka aere aia ki ko i tona papa, e kare kiaku!”

 Taka meitaki ua e, e riro ana te au manamanata ki te au metua ongai ei akatupu i te tu ngata i roto i te akaipoipo. Mei te reira ainei toou turanga? Mei teaa ra toou pirianga ki te nga metua o toou tokorua, e mei teaa ra te pirianga o toou tokorua ki toou nga metua? E akamanako ana e rua nga akaaoanga ka tupu mai e eaa taau ka rave no runga i te reira.

I te akaraanga e piri tamou tikai ana toou tokorua ki tona nga metua. “Kua manako taku vaine e me kare maua e noo vaitata ki te pae i tona nga metua, kare aia e inangaro ana ia raua,” i karanga ai tetai tane i Paniora, ko Luis te ingoa. “I tetai tua ra,” i tuatua ai aia, “i te anauanga ta maua tamaiti, vaitata rai e i te au ra ravarai e atoro mai ana toku nga metua, e kua riro te reira ei tamanamanata tikai i taku vaine. E maata te pekapeka ta teia i akatupu i rotopu ia maua.”

Au manamanata:

I te akatakaanga i te akanoo anga o te akaipoipo, te karanga ra te Pipiria e me tae taua taime ra “e akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai.” (Genese 2:24) Ko te riro anga ei “kopapa okotai” e maata atu te o maira i te noo kapiti ua. Ko te aiteanga tikai, koia oki ka riro mai te tane e te vaine ei ngutuare tangata ou​—te ka na mua ake i to raua nga ngutuare tangata o mua ana. (1 Korinetia 11:3) E tika rai, ka inangaroia te tane e te vaine kia akangateitei i to raua nga metua, e i te maataanga o te taime te o maira te akamanako anga atu ia raua. (Ephesia 6:⁠2) Peea me kua riro te tu i akono ei toou tokorua i taua apainga ra ei akatupu i te manako e kua kopae me kore kua patoi aia ia koe?

Taau ka rave:

Akara i te turanga ma te tau tikai. E piri tikai ainei toou tokorua ki tona nga metua, me kore penei e kare rai toou pirianga ki toou nga metua e aite ana ki te reira? Me koia ia, eaa ra ta te tu oraanga o toou ngutuare tangata i akatupu ki runga i toou manako no teia turanga? Te o maira ainei te manako vareae kia koe?​—Maseli 14:30; 1 Korinetia 13:4; Galatia 5:26.

Ka anoanoia te akara matatio anga tika tikai ia koe uaorai i te pau i taua au uianga ra. Inara e puapinga tikai kia rave koe i te reira. I te mea oki e, me te riro ra te au manamanata ki te nga metua ongai ei tumu no te akatupu i te ke i rotopu ia koe e toou tokorua, e manamanata akaipoipo tikai i reira toou​—kare i te manamanata ki te nga metua ongai.

E maata te au manamanata akaipoipo e tupu ana no te mea kare te manako o nga tokorua e aiteite ana no runga i tetai au mea. Ka rauka ainei ia koe i te akamanako atu i te turanga o toou tokorua no runga i teia au mea? (Philipi 2:4; 4:5) Ko te reira ta tetai tane i Meiko ko Adrián i rave. “Kua utuutuia taku vaine i roto i tetai ngutuare tangata kare e meitaki roa ana te turanga,” i karanga ai aia, “no reira kare au e piri vaitata roa atu ana ki toku nga metua ongai. I te openga kare au e piri akaou atu ana kia raua​—no tetai au mataiti. Kua akatupu teia i te pekapeka i roto i to maua akaipoipo no te mea te inangaro ra rai taku vaine kia piri atu ki tona ngutuare tangata, ki tona mama tikai.”

I te taime i aereia, kua rave a Adrián i tetai turanga tau no runga i taua mea ra. “Noatu e kua kite au e ka kinokino te manako ngakau o taku vaine me atoro putuputu atu i tona nga metua, ka tupu katoa te manamanata me kare roa aia e atoro atu ia raua,” i karanga ai aia. “Kua tauta tikai au, i tei rauka iaku, kia rauka akaou e kia akonoia te pirianga meitaki ki toku nga metua ongai.” *

E tamanamanata ua ana rai toou nga metua ongai i toou akaipoipo, i te ako ua mai rai noatu kare e inangaroia ana. “Kua noo maua i te au mataiti mua e itu o to maua akaipoipoanga i ko i te ngutuare tangata o taku  tane,” i karanga ai tetai vaine no Katakatani, ko Nelya te ingoa. “Kua tupu ua te pekapeka no runga i ta maua utuutu anga i te tamariki, pera katoa te au manamanata no runga i taku tunu kai e te tama anga. Kua tuatua atu au ki taku tane e ki toku mama ongai no runga i te reira, inara kua akamaata roa atu teia i te pekapeka!”

Au manamanata:

Me akaipoipo koe, kare koe i raro akaou i te mana o toou nga metua. Mari ra, te akakite ra te Pipiria e “ko te Mesia te upoko o te tangata ravarai nei; e to te vaine ra upoko, ko te tane ïa”​—koia oki, ko tana tane. (1 Korinetia 11:3) Noatu ra, mei tei taikuia i mua ake, ka inangaroia te tane e te vaine kia akangateitei i to raua au metua. Te tika, te akakite maira a Maseli 23:22 kia tatou e: “E akarongo mai i to metua tane i anau ei koe ra, e auraka e akavaavaa i to metua vaine me ruaine aia ra.” Inara, akapeea i reira me kare toou nga metua​—me kore te nga metua o toou tokorua​—e ariki i te tika e ko te tane te upoko o te ngutuare tangata e ka tauta rai i te maro atu i to ratou manako?

Taau ka rave:

Na roto i te tu akaaroa, tauta kia kite i te tumu o te manamanata. “I roto i tetai au tu ka inangaroia nga metua kia kite e e puapinga rai raua i roto i te oraanga o ta raua tamariki,” i karanga ai a Ryan, tei taikuia i te akamataanga. Penei kare taua tamanamanataanga ra i te mea akakoro, e penei ka rauka ua i te akono atu na te taangaanga anga i te ako a te Pipiria e kia “tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra.” (Kolosa 3:13) Inara, akapeea me kua riro te tamanamanata a toou metua ongai ei mea ngata, e te akatupu ra i te pekapeka i rotopu ia koe e toou tokorua?

Tetai au tokorua akaipoipo kua rauka ia ratou i te akanoo i tetai au kotinga ma to ratou au metua. Kare te aiteanga o teia e ka akakite koe i tetai au akakotinga anga i roto i tetai tu manako kore. * Te maata anga o te taime, ka inangaro uaia kia taka meitaki taau au ravenga e ko toou tokorua te mea mua i roto i toou oraanga. Ei akaraanga, ko tetai tane i Tiapani ko Masayuki te ingoa kua karanga e: “Noatu e ka akakite mai nga metua i to raua manako, auraka e ariki viviki i te reira. Akamaara e te akamata nei koe i tetai ngutuare tangata ou. No reira te mea mua, e kimi i te manako o toou tokorua no runga i taua akoanga ra.”

E maata te au pekapeka ki te au metua ongai te ka rauka i te akaiti mai na te kite anga i to raua akakoroanga, e na te patoi anga kia kore teia au manamanata e akatupu i te ke i rotopu ia koe e toou tokorua. I roto i teia tu, kua akakite mai a Jenny e: “I tetai taime e riro ana te au uriurianga i rotopu i taku tane e au no runga i to maua nga metua ei au mea manako ngakau, e te kitea uaia ra e ka akatupu te reira i te mamae na te tuatua anga i te au apa o te au metua i nga tua roa ai e rua. I te openga ra, kua kite mai maua e ka inangaroia maua kia akamutu i te akariro i te tu apa ua o to maua au metua ongai ei tamamae anga, mari ra kia akono atu i te manamanata. Tei tupu mai, e pirianga vaitata tikai to maua ei nga tangata akaipoipo.”