Akaari i te Tu Akono no te Au Metua Takaua

TOKOITI ua te au tangata e manono maataia maira to ratou taime e te maroiroi i to te au metua takaua. Manganui ua atu te au akaaoanga ta ratou e aro atu ana. Te akono ra ratou i te au apainga e manganui no te utuutu i te pamiri. Kapiti atu ki te angaanga moni, te okooko, te tunu kai, te tamaanga, te utuutu i te tamariki. Te anoano katoaia ra ratou kia akono i te oraanga kopapa, te tamataora, e te turuturu i te manako ngakau o te tamariki e me ka rauka, kia kimi i tetai taime puapinga no ratou uaorai.

Noatu te riro ra te au pamiri metua takaua ei tuanga maata e ei mea matauia i roto i te taiate i teia tuatau, e mama ua te akangaropoina atu ia ratou. Mei ta tetai metua vaine i akakite tika mai e, “Te riro ua mai anga au ei metua takaua, i manako putuputu atu ei au ia ratou.” Eaa taau ka rave i te akono atu anga i te au metua takaua? Ka tau ainei koe kia manako atu ia ratou? Ka akara atu tatou e toru tumu no te manako atu i ta ratou e inangaro maira.

Au Tumu no te Akaari i te Tu Akono

Manganui te au metua takaua e inangaro ra i te tauturu. Tetai takaua e 41 mataiti, e rua ana tamariki, kua akakite aia e, “Tetai au taime kare au e papu ana e eaa taku ka rave, e e teimaa ana au no te maata o taku apainga.” Te turanga takaua, te akaruke angaia, me kore tetai atu au turanga ngata, kua riro ei akaaite i te manako o te au metua takaua mei to tetai metua vaine rai. Kua karanga aia e, “Te pati akatenga nei matou i te tauturu, e te inangaro maataia nei te reira!”

Ka tauturu te reira i toou uaorai mataora. Tauturu ana koe i tetai tangata i te apai i tetai apainga teimaa, kare e maranga i tetai tangata okotai? Me koia ia, kare e ekoko kua merengo koe i te kite anga e kua tauturu koe i tetai ke i roto i te mataara tau. Mei te reira rai, e apai ana te au metua takaua i tetai apainga pakari no tetai tangata okotai ua. Me ariu atu koe ki ta ratou e anoano maira na te tauturu anga ia ratou, ka marama koe i te tuatua mou tei akakiteia i roto ia Salamo 41:1: “E ao to tei akono mai i te tangata putaua ra.”

E mea mareka ki te Atua. Te karanga ra a Iakobo 1:27 e: “Ko te akono mou i te Atua e te kino kore i mua i te aroaro o te Atua, o to tatou Metua ra, ko teia ïa: Ko te takinga-meitaki i te matiroeroe e te au vaine takaua i to ratou mate anga.” Te kapiti maira teia i te akono anga i te au metua takaua. * Te akakite maira a Ebera 3:16 e: “Kareka te takinga-meitaki e te oronga,  eiaa rava ïa e akatopaia: te pereperekavana ra oki te Atua i te reira atinga.”

Te akamanako anga i teia au tumu e toru no te akono atu anga i te au metua takaua, ka akara atu tatou i teianei e eaa taau ka rave i te tauturu e akapeea e papu ei ia koe e te oronga ra koe i te tauturu tau.

Kia Kite i to Ratou Anoano

Penei i te akaraanga te mea mama i te rave, e ui atu ki te metua takaua e, “Akapeea au me tauturu ia koe?” Te tika ra, kare roa e tangata e akakite mai ana i tana tikai e anoano ra. Mei tei taikuia i muao, te akakite maira a Salamo 41:1 i te manako kia “akono” atu. Te akamarama maira tetai tataanga e ko te aiteanga o te tuatua Epera tei taangaangaia ko “te akanoo anga i tetai au aerenga manako ngata te ka akatupu i tetai ikianga tau.”

No reira, te mataara meitaki roa atu i te tauturu koia oki ka inangaroia koe kia akamanako pakari i te au akaaoanga ta te au metua takaua e aro atura. Akara meitaki, eiaa e akara viviki ua i tetai turanga. Ui kia koe uaorai e, ‘Naringa ko au tera, eaa taku tauturu ka inangaro?’ Tika rai, manganui te au metua takaua ka akakite atu kia koe, noatu me ka tauta koe, kare roa koe e marama pu tikai i te turanga o te metua takaua, kia riro rava koe uaorai mei te reira rai. Noatu ra, na te akaari anga i toou tu tangi tikai no to ratou au turanga ka tauturu ia koe kia “akono” atu i te au metua takaua.

Aru i te Akaraanga Apa Kore o te Atua

Me manakoia te akono anga i te au metua takaua, kare rava e tangata i rave ana i teia ma te aroa e te tau meitaki tikai mei ta te Atua rai ko Iehova. Manganui te au irava tei akakite mai i te tu akono ta te Atua ko Iehova i akaari ki te au takaua, te au tamariki matiroeroe e pera katoa te au metua takaua. Na te akara matatio anga i te mataara i akono ei te Atua i te au anoano o taua aronga akaaka ra, ka rauka ia tatou te oronga i te tauturu puapinga e te tau tikai. E a au tumu tika ka akamanakoia.

Akarongo mari atu

I roto i te Ture tana i oronga ki to Iseraela i taito, kua akakite a Iehova e ‘ka akarongo tikai aia i te kapiki’ a te matiroeroe. (Exodo 22:22, 23) Akapeea e rauka ai ia koe te aru i teia akaraanga meitaki? E kite putuputu ana te au metua takaua i te tu maromaroa tikai, no te kare e aronga mamaata i te pukapuka atu. “Me moe te tamariki, i tetai taime kare e rauka iaku te akakoromaki i te aue,” i karanga ai tetai metua takaua. “Ngata tikai te akakoromaki i tetai taime.” Me ka tau, ka rauka ainei ia koe te ‘akarongo atu i te kapiki’ a tetai metua takaua penei te anoano ra i te tuatua mai i tona manako ngakau? Na te akarongo atu anga me te tau ra te au turanga, ka tauturu maataia tetai kia akono i te au akaaoanga o te metua takaua.

Oronga i te au tuatua akamaroiroi

Kua akauruia e Iehova te tataanga o te au imene tapu, me kore te au taramo, ta te au Iseraela ka imene i te au tuatau akamorianga. Akamanako ana i te akamaroiroi ta te au takaua e te au tamariki matiroeroe o Iseraela i rauka i te imene anga i te au tuatua akauruia e te Atua, i te akamaara kia ratou e ko Iehova te “Metua” e te “Akava” no ratou e nana e oronga mai i te tauturu. (Salamo 68:5; 146:9) Ka rauka katoa ia tatou te oronga i te au tuatua akamaroiroi te kare e ngaropoina i tetai metua takaua no te au mataiti ka aereia. Noatu e kua pou tetai 20 mataiti, te maara ra rai ia Ruth, e metua takaua tetai atianga te akakite atu anga tetai metua tane pakari kiaia e: “Meitaki tikai taau e rave ra i te utuutu i taau nga tamariki tamaroa. Kia pera ua atu rai.” Akakite a Ruth e: “Riro tikai taua au tuatua nana ra ei akamaroiroi iaku.” Tika rava e, “mei te vairakau rai te tuatua meitaki” e ka akamaroiroi i tetai metua takaua i roto i tetai tu kare roa tatou e kite. (Maseli 15:4, Contemporary English Version) Ka rauka ainei ia koe i te akamanako i tetai au tuatua akameitaki taka tikai e te ngakau tae, kia oronga atu ki tetai metua takaua?

 Tauturu i te pae materia me ka anoanoia

Te Ture a Iehova ki to Iseraela i taito te kapiti maira i te au akanoonooanga no te au takaua e te matiroeroe, kia rauka te kai na roto i te tu ngateitei. Na roto i taua au orongaanga ra, ka rava te kai a te au matiroeroe “kia kai ratou e kia merengo.” (Deuteronomi 24:19-21; 26:12, 13) Ka rauka katoa ia tatou te oronga i te au tauturu materia i roto i te tu meitaki e te ngateitei ki tetai metua takaua tei ngere. Ka rauka ainei ia koe i te akaruke i tetai kai me kore kou kai ki to ratou kainga? E kakau ainei toou te ka anoanoia no tetai metua takaua me kore tamariki kia aao? Me kore, ka rauka ainei ia koe te oronga atu i tetai moni tauturu kia rauka i te metua takaua i te oko i tetai au apinga te anoanoia ra e te pamiri?

Kapiti atu kia ratou

Kua akaue a Iehova kia kapitiia mai te au takaua e te tamariki matiroeroe ki te au oroa mataiti a te iti tangata, kia mataora ratou i te piri atu anga ki te au taeake Iseraela. Te tika, kua akakiteia kia ratou e: “E rekareka koe.” (Deuteronomi 16:10-15) Mei te reira rai i teia tuatau, te akoia ra te au Kerititiano kia ‘oronga kotou ia kotou rai,’ i te akatupu anga i te au atianga no te pirianga mataora. (1 Petero 4:9) No reira eaa koe ka kore ei e pati i tetai pamiri metua takaua ki toou kainga no tetai kaikaianga? Kare e anoanoia kia maata roa. Iaia i ko i te kainga o tetai au oa, kua karanga a Iesu e “okotai rava ra mea e meitaki ei.”​—Luka 10:42.

Ka Arikiia Taau Akono Atu Anga

Kua karanga a Kathleen, e metua takaua tei utuutu e toru tamariki e, kare rava e ngaropoina iaia teia tuatua meitaki, “Auraka e tapapa atu i tetai apinga; ariki i te au mea ravarai.” Mei ia Kathleen rai, manganui te au metua takaua e ariki ra i ta ratou apainga i te utuutu i ta ratou tamariki. No reira, kare ratou e irinaki ana i etai ke kia rave i te angaanga te anoanoia ra ratou uaorai kia rave. Tera ra, kare e ekoko e te ariki ra ratou i tetai ua atu tauturu ka rauka mai ia ratou. Ka rauka ia koe te tauturu i to ratou au turanga e kia mataora koe i te akono atu anga i te au metua takaua, i te irinaki anga e na te Atua ko Iehova “e tutaki ia koe no taau i rave.”—Maseli 19:17, New Century Version.

[Tataanga Rikiriki i Raro]

[Tutu i te kapi 12]

Eaa te taime openga i pati ei koe i tetai pamiri metua takaua ki te kainga no tetai kaikaianga? Kore koe e pati akaou atu ia ratou?