Au Orama o te Ao Vaerua

NOATU te roa me akara koe ki runga i te rangi kare koe e kite i tetai tangata vaerua. Akarongo, kare ra oki aau mea e rongo. E oti akera papu ia koe e te vai nei te au vaerua. Teia au mea ora vaerua, e maata to ratou kite e te ririnui, e au ingoa e e au tu takake to ratou. Tetai pae e meitaki ratou no tatou, tetai pae ra te inangaro ra i te takino ia tatou. Te inangaro pouroa ra kia kite ia tatou.

E Vaerua te Atua mou uaorai. (Ioane 4:24) E ingoa umere tikai tona tei akatakake iaia mei te au atua pikikaa. Tona ingoa ko Iehova. (Salamo 83:18) Tata te tata taramo e: “E maata oki a Iehova, e kia maata tona akapaapaa angaia; kia matakuia oki aia, auraka te au atua katoa. Te au atua ravarai o te au etene ra, e itoro ïa: ko Iehova ra tei anga i te au rangi ra.Te kakā e te akangateitei tei mua i tona mata; te ririnui, e te manea, tei tona ïa ngai-tapu.”​—Salamo 96:4-6.

Au Orama o te Atua Mou

“Kare ua e tangata i kite i te Atua,” e akakite maira te Pipiria kia tatou. (Ioane 1:18) Tona tu akaraanga e tona mekameka kare e rauka ia tatou kia kite, mei te au kara rai kare tetai tei anau matapoia mai e kite. Inara mei tetai puapii meitaki rai e akamarama mai ana i tetai au mea ngata ki te tamariki apii na roto i te au tuatua ka marama ratou, pera rai te Atua na roto i tana Tuatua te Pipiria me akataka mai i te au mea kare tatou e kite ana, na roto i te au apinga ka kite tatou. Na roto i te au orama akauruia tei orongaia ki te aronga akarongo i taito, te tauturu maira a Iehova ia tatou kia kite i te au paepae o te rangi e kia marama i to tatou pirianga ki te aronga e noo ra i reira.

Ei akaraanga, tetai orama tei orongaia ki te peroveta ko Ezekiela, te akapiri ra te reira i te kaka o Iehova ki te ai, te marama, te toka iatepe e te anuanua. Tetai orama ke mai, kua kite te apotetoro a Ioane ia Iehova i runga i tona terono e kua akakite aia e ko te Atua “mei te toka iasepe ra e te sarido ra, te tu: e i takakoia taua terono ra i te anuanua, mei te emeradino ra te tu.” Te akakite maira taua au tu akatakaanga kia tatou i te tu mekameka, tu tau e te ponuiaau i mua i te aroaro o Iehova.​—Apokalupo 4:2, 3; Ezekiela 1:26-28.

E orama katoa ta te peroveta ko Daniela no Iehova, kua kite aia “e kua ngauru oki te tausani anga i te manotini [o te au angera] i te tu anga ki mua [ia Iehova].” (Daniela 7:10) Kare e kore e e mea umere tikai taua tu ra! Kia kite i tetai angera i roto i te orama, e mea vavaria tikai, inara ka akamanako ua ana i te manotini ua atu o te au angera!

Taikuia mai te au angera vaitata rai e 400 taime i roto i te Pipiria, te kapiti maira te reira i te au terapi e te au kerupi. Nga kupu Ereni e te Epera tei uriia ei “angera” i roto i te Pipiria, to  raua aiteanga e “karere.” No reira ka rauka i te au angera i te komunikeiti ki tetai e tetai, e kua komunikeiti mai ana ratou ki te tangata i te tuatau i topa. Kare te au angera i te tangata i mua ana tei noo ana i te enua nei. Kua anga ke ana a Iehova i teia au mea ora vaerua i mua roa ake i te anga mai anga i te tangata.​—Iobu 38:4-7.

Roto i te orama a Daniela kua akaputuputu mai te au angera kia akara i tetai tupuanga umere tikai. I reira kua kite atura a Daniela i “tetai mei te Tamaiti a te tangata ra” e akavaitata maira ki te terono o Iehova kia orongaia “te mana, e te kakā, e te basileia nona, kia tavini atu te au tangata katoa, te pa enua, e te au reo, kiaia.” (Daniela 7:13, 14) Te “tamaiti a te tangata” ko Iesu Karaiti tei akatuia, e taoonga puapinga tona i roto i te ao vaerua, e, kua orongaia kiaia te mana tutara ki rungao i te enua katoa. Kare e roa atu ka mono tana tutaraanga i te au kavamani tangata katoatoa e ka akaope i te maki, te mii, te tinai mate, te veve, e pera katoa te mate.​—Daniela 2:44.

Riro te akaterono anga o Iesu ei akatupu i te mataora maata ki te au angera tiratiratu, tei inangaro kia puapingaia te tangata nei. Te mea taitaia ra, kare te au mea ora vaerua pouroa e manako akapera ana.

Au Enemi o te Atua e te Tangata

Mei te akamataanga mai tikai te tuatua enua o te tangata, tetai o te au angera tei akakeuia e te anoano maata kia akamoriia, kua patoi aia ia Iehova e kua akariro iaia uaorai ko Satani, te aiteanga “Tei Patoi.” Kare atu mari ua ko Satani te vaerua kino rava atu, tei patoi takiri ia Iehova, te vaerua aroa akaperepere roa atu. Kua piri atu tetai au angera ki tana meameaauanga. Kapiki te Pipiria ia ratou e ko te au temoni. Mei ia Satani rai, kua akariro te au temoni ia ratou  ei au enemi no te tangata. Maata ua atu te kino i te enua nei, te tu tika kore, te maki, te veve, e te tamaki, tei tupu mai no ta ratou akakeuanga.

Noatu kare te manganui o te au akonoanga o Kerititome e tuatua akaou ana no runga ia Satani, te oronga maira te puka o Iobu i te marama no runga i te tu e te akakoroanga o teia angera meameaau. Te karanga ra te reira e: “E tae akera ki tetai rā, kia aere mai te au tamariki a te Atua e akakite ia ratou uaorai kia Iehova, kua aere katoa mairā Satani i rotopu ia ratou.” Roto i te uriurianga tei aru mai, kua akaapa a Satani e te tavini ua ra a Iobu i te Atua no tana ka rauka mai. I te titau anga i te akapapu e kua tika tana akaapa anga, kua akatupu a Satani i te tumatetenga maata ki runga ia Iobu i te ta anga i tana au manu e tana au tamariki pouroa e tai ngauru. Muri ake i te reira, kua akatupu aia i te ee akakai ki runga i te kopapa katoa o Iobu. Kua poka ra ta Satani au ravenga i te akapapu i tana akaapaanga.​—Iobu 1:6-19; 2:7.

E au tumuanga tau ta Iehova i akakoromaki ei ia Satani no te tuatau roa, inara kare aia e akapera ua atu rai. Kare e roa atu ka takoreia te Tiaporo. Kua rave ke ia ana tetai au takainga i te akamataanga e kua akataka meitakiia mai te reira i roto i te puka o Apokalupo, i te akaari mai i tetai tupuanga puapinga ke mai i roto i te ao vaerua kia kite tatou. Ka tatau tatou e: “E e tamaki tei runga i te rangi: ko Mikaela [Iesu Karaiti tei akatuia mai] e tana au angela, tamaki atura i te taae [Satani]; e kua tamaki maira te taae e tana au angela, Kare ra i riro te re ia ratou; e kare rava atura o ratou e nooanga i runga i te rangi. Uriia atura oki te taae maata ki vao, ko taua ovi taito ra ïa, ko tei karangaia i te diabolo ra, e ko Satani oki, ko tei pikikaa i to te ao katoatoa nei, i uriia aia ki vao ki runga i te enua nei, e tana au angela katoa, kua uri katoaia ki vao.”​—Apokalupo 12:7-9.

Akara ana ia Satani tei karangaia e te ‘pikikaa ra i to te ao katoatoa nei.’ Pikikaa aia i te tangata na te akatotoa anga i te au apiianga pikikaa a te akonoanga ei akauri ke i te tangata mei ia Iehova e tana Tuatua. Tetai o taua tu pikikaa ra koia oki, me mate te tangata, ka ora atu te katoatoa ki roto i te ao vaerua. Tukeke te tu o teia irinakianga. Ei akaraanga, i Aperika e Asia manganui tei irinaki e i te matenga ka ora atu te tangata ki tetai ao vaerua e noo ra to ratou au tupuna. Akatumu katoaia te apiianga purukatorio e te ate ki runga i te irinakianga e ka ora ua atu rai te tangata i muri ake i te matenga.

Muri Ake i te Matenga​—Oraanga i te Rangi?

Peea ra te irinakianga o te mirioni ua atu i te ao katoa, e ka aere te au tangata meitaki pouroa ki te rangi? Tika rai e ka aere tetai au tangata meitaki ki reira, kareka ra e iti ua to ratou numero me akaaiteia ki te pirioni ua atu tei mate. Te akaari maira te Pipiria e e 144,000 tangata te ka “okoia no roto i teianei ao” e te ka tavini ei “kau taunga” e te ‘ui ariki i rungao i teianei ao.’ (Apokalupo 5:9, 10; 14:1, 3) Ko ratou e te Tamaiti a te tangata ko Iesu Karaiti, to roto i te kavamani o te rangi, te Patireia o te Atua. Ka akaope taua kavamani ra ia Satani e tana au temoni e ka akariro i te enua ei parataito. Maataanga o te aronga i mate ka akaora akaouia a te tuatau ki mua ma te manakonakoanga no te oraanga mutu kore i roto i taua Parataito i te enua nei.​—Luka 23:43.

Te au manako maata, manganui te ka noo i roto i te ao vaerua. Tei rotopu ia ratou Tei Teitei roa atu koia te Atua ko Iehova, Tei Anga mai i te au oraanga katoa. Manotini ua atu te au angera e tavini tiratiratu ra iaia. Tetai au angera tei aratakiia e Satani, patoi ratou ia Iehova e te pikikaa ra i te tangata. Tetai, e iti ua te numero o te tangata tei “okoia” me kore tei ikiia mei te enua kia rave i tetai au apainga puapinga i te rangi. Ma te akamaara anga i teia, ka akamanako ana tatou e koai ta tatou ka komunikeiti atu i roto i te ao vaerua, e ka akapeea tatou me komunikeiti atu kia ratou.