E Au Mea Ora Tetai i Vao i Ko​—Koai ma Ra?

I Europa, kua tomo tetai vaine pakari ki roto i te are pure e te ei kirikiri rangi i roto i tona rima, kua tuturi marie ki mua i te tiki o Maria. I Aperika, kua riringi tetai pamiri i te kava (gin) ki te pae i te menema o tetai kopu tangata akaperepereia. I te au tuanga enua o Marike, kua akakore tetai mapu i tana kai i te manakonako anga e kia rauka i te komunikeiti atu ki tona angera paruru. I Asia, te tungitungi apinga pepa karakara ra tetai orometua ei atinga ki tetai tupuna vaerua.

EAA te mea aiteite i teia au tangata? Irinaki pouroa ratou e e au mea ora kite tetai i roto i te ao vaerua, e ka rauka i te komunikeiti atu, e e ririnui ta ratou akakeuanga ki runga i te oraanga tangata. Tika, e kare teia irinakianga i te mea ou e kare i te mea umere. Te mea umere ra koia oki e maata ua atu te au manako tuketuke e koai ma te noo ra i roto i te ao vaerua.

Okotai a te Mutiremi Atua e akamori ana ko—Allah. * Karanga te tangata i roto ia Kerititome e e Toru Tai te Atua, te Atua Metua, te Atua Tamaiti, e te Atua Vaerua Tapu. Irinaki te Initu e, tauatini ua atu te au atua tane e te au atua vaine e vai nei. Tetai atu au tangata karanga ratou e te noo nei te au vaerua i roto i tetai au manu, tumu rakau, mato, e te ara vai. E tetai kua akakeuia tetai aronga e te au puka, teata, e te au porokaramu tivi no runga i te au angera e te au temoni, tupapaku, te au vaerua viivii, te au atua tane e te au atua vaine.

Manganui ua atu te au manako tukeke e te rotai kore no te au atua e te au itoro, manganui katoa te au irinakianga tukeke e te rotai kore no te mataara e komunikeiti ana kia ratou. Te taka ua ra e kare te au mataara pouroa o te komunikeiti anga e tano. Akamanako ana na teia mataara: Mua ake ka ringi ei tatou, ka inangaro tatou kia kite e koai ta tatou ka ringi, e ka inangaro tatou kia papu e e tangata ora tikai teia e ka pau mai aia ia tatou. Kare e puapinga kia timata i te komunikeiti atu ki tetai tangata tamanako ua. E kino roa atu ra te komunikeiti atu ki tetai tangata akatutu pikikaa ua mai iaia.

Koai tikai i reira te noo ra i roto i te ao vaerua? Ka rauka i te Pipiria i te pau i teia uianga e ka rauka katoa i te akamarama mai e koai ta tatou ka komunikeiti atu, e eaa ta tatou ka tapapa atu. E tatau atu rai. Penei ka umere koe i ta te Pipiria e akakite maira.

[Tataanga Rikiriki i Raro]