Komunikeiti Anga ki te Ao Vaerua

KUA oronga te Atua Mana Katoatoa i tetai au apainga ki tetai atu au mea ora vaerua. Ei akaraanga, kua tuku aia i te tutaraanga no te enua ki roto i te rima o Iesu Karaiti, e kua akamana aia i te au angera tiratiratu kia tauturu i te akatere, i te akakite aere anga i te tuatua meitaki. (Apokalupo 14:6) E tuke ra oki te au pure. Kare ra aia i oronga ana i te angaanga no te akarongo mai i te au pure ki tetai ke. Ka pure tika atu tatou ki te Atua uaorai.

Ko Iehova “tei akarongo i te pure.” (Salamo 65:2) Koia te akarongo maira i ta tatou pure e koia te pau mai ana i te reira. No runga i te pure, kua tata te apotetoro ko Ioane ki te au oa tavini o Iehova e: “Kia pati ua atu tatou i te au mea ravarai i tau iaia ra, te akarongo maira [te Atua] ia tatou: E te kite nei tatou e te akarongo maira aia ia tatou i te au mea ta tatou i pati atu, kua kite tatou e e rauka ia tatou i ta tatou i pati atu iaia ra.”​—1 Ioane 5:14, 15

Kare te au angera tiratiratu e inangaro ia tatou kia komunikeiti me kore kia pure kia ratou. Kua marama e e taokotai ana ratou ki te akanoonooanga a te Atua no te pure, te ka o tika atu ratou i tetai au taime. Na teea mataara ra? I te pure anga te peroveta ko Daniela kia Iehova no te akapouanga o Ierusalema, kua  pau mai te Atua i te pure a Daniela na te tono mai anga i te angera ko Gaberiela ma tetai karere akamaroiroi.​—Daniela 9:3, 20-22.

Au Karere mei te Aronga i Mate?

Ka tau ainei kia timata tatou i te komunikeiti ki te aronga i mate? Maata te au tua e akakite mai ana no runga i te au pukapukaanga i rave ana te tangata ki te vaerua o te aronga i mate. Ei akaraanga, kua akakite mai tetai taunga ki tetai vaine i Airerani e, kua pukapuka ana aia kia Fred, te tane a taua vaine ra i te po i muao. E oti akera kua mate ke ana a Fred i tetai au epetoma i muao. Kua akakite mai taua taunga ra e eaa ta “Fred” i tuatua mai, e au mea anake ko tana vaine ua tei kite. Mea mama ua iaia kia manako e te ora nei rai a Fred i roto i te ao vaerua, e te tauta ra i te komunikeiti mai kiaia na roto i te taunga. Inara te patoi ra taua manako ra i ta te Pipiria e akakite taka meitaki maira no runga i te turanga o tei mate.​—Akara i te pia i raro ake.

Akapeea ra me akamarama i te au tua mei teia rai? Tetai apinga akavare e taangaanga ana te au temoni koia oki ko te akatutu mai i tei mate, ko Fred oki i reira teia i akatutuia mai. Te akakoroanga? Kia akauri ke i te tangata mei ta te Pipiria e apii ra, e kia akaparuparu i te akarongo e te irinakianga i roto ia Iehova. Kare e ekoko anga e te pikikaa nei a Satani e te au temoni i te tangata “ma te mana e te akairo, e te au ravenga pikikaa tu ke ra, E ma te tuatua-tika kore pikikaa katoa ra, i rotopu i te aronga e mate ra.”​—2 Tesalonia 2:9, 10

Kia papu e, te vai nei te au taunga e te aronga e piri ra kia ratou ko tei irinaki tikai e  te komunikeiti ra ratou ki te aronga i mate. Tika anga tikai, me te komunikeiti ra ratou ki tetai tangata, te komunikeiti ra ratou ki te au vaerua tei patoi ia Iehova. Pera katoa, te irinaki ra tetai pae e te akamori ra ratou i te Atua, kareka ra kua tarevake ratou. Kua akauruia te apotetoro kia akakite i teia akamatakite anga pakari e: “Ta te etene i akaatinga ra, i akaatinga ïa na te au demoni, kare na te Atua.”​—1 Korinetia 10:20, 21

Te kite anga e ka rauka ia tatou te pure ki Tei Teitei Rava, tei akaperepere e tei akono ia tatou, eaa ra tatou ka pure ei ki tetai ke? Ina e te oronga maira te Pipiria i teia akapapuanga e: “Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.”​—2 Paraleipomeno 16:9.

[Tataanga i te kapi 9]

Te kite anga e ka rauka ia tatou te pure ki Tei Teitei Rava, tei akaperepere e tei akono ia tatou, eaa ra tatou ka pure ei ki tetai ke?

[Pia/​Tutu i te kapi 8]

Tika e te Pikikaa

TIKA: E PERETANA TIKA TIKAI A SATANI

“Ko Satani oki tei akatutu angela katoa iaia uaorai no te mārama.”​—2 Korinetia 11:14.

“E akono meitaki, e matakite, te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.”​—1 Petero 5:8.

“Ko tei rave i te ara ra, no te diabolo ïa; i rave ana te diabolo i te ara mei muatangana mairai.”—1 Ioane 3:8.

“E tenana e kauraro atu kotou i te Atua. E patoi atu i te diabolo, e nana e rere ke atu.”​—Iakobo 4:7.

“Te Diabolo . . . E ta tangata aia mei ito mairai, kare aia i mou i te tuatua-mou, no te mea kare e tuatua-mou o roto iaia. Kia tuatua aia i te pikikaa ra, kua tuatua aia i tei tau iaia uaorai: e pikikaa aia, e e metua oki no te pikikaa.”​—Ioane 8:44.

PIKIKAA: I TE MATENGA KA ORA ATU RAI TE TANGATA I ROTO I TE AO VAERUA

“E kai koe i taau kai ma te pata i te ou ki runga i to rae, e oki ua atu koe ki raro i te one; no reira mai oki koe: e one-pueu oki koe, e ka riro akaou rai koe ei one-pueu.”—Genese 3:19.

“Kua kite oki te aronga e ora nei e ka mate ratou: kare ra a te aronga i mate ra e tuatua i kitea.”—Koheleta 9:5.

“Ko tei kitea e koe ta to rima e rave ra, ka rave ma to ririnui ra; kare oki e angaanga, kare e kimianga, kare oki e kite, kare oki e pakari, i roto i te vaarua taau e aere na.”—Koheleta 9:10.

“Te riro nei oki tona vaerua, te oki nei aia ki tona ra one; kore rava atura tana i akakoro i taua rā ra.”—Salamo 146:4.

TIKA: TE MANAKO MAIRA TE AU ANGERA TIRATIRATU IA TATOU

“Te patia nei te Angela a Iehova i te puakapa, e pini ua ake te aronga i mataku iaia, e kua akaora ia ratou.”​—Salamo 34:7; 91:11.

“Kare aina ratou [te au angera] ravarai i te tavini vaerua anake, i tonokia ei matuapuru i te aronga tuanga i te ora ra?”​—Ebera 1:14.

“Akara atura au i tetai angela i te rere anga na rotopu i te mareva nei, ma te evangelia mutu kore, e tutu ki te aronga e noo i te ao nei, ki te pa enua katoa, e te au kopu, e te au reo, e te au iti-tangata, i te na ko anga ma te reo maata, Ka mataku i te Atua, e akakakā iaia.”​—Apokalupo 14:6, 7.

PIKIKAA: AITEITE UA A IESU KI TE ATUA

“Teia ra toku inangaro, kia kite kotou e, ko te Mesia te upoko o te tangata ravarai nei; e to te vaine ra upoko, ko te tane ïa; e to te Mesia upoko, ko te Atua ïa.”​—1 Korinetia 11:3.

“E kia tuku tikaia te au mea ravarai ki raro ake iaia ra, ei reira e kitea puiaʼi e, i raro katoa ake te Tamaiti uaorai iaia, i tei tuku i te au mea katoa i raro ake iaia ra; kia riro ko te Atua i rungao i te au mea katoa i te au ngai ravarai.”​—1 Korinetia 15:28.

“Tika, tika tikai taku e karanga atu kia kotou, Kare e tika ta te Tamaiti kia rave aia anake uaorai, ko tana ra i kite i te Metua i te rave anga.”​—Ioane 5:19.