Ka Ui Ta Tatou Aronga Tatau . . .

Teiea te Parataito e Taikuia ra e te Pipiria?

▪ Kua taputou a Iesu ki tetai tangata e mate atura tei akakite mataku kore i tona akarongo ki roto iaia e: “Ei Paradaiso taua katoa i teianei rai rā.” (Luka 23:43) Ka aere taua tangata ra kiea? Tei runga ainei te Parataito i te rangi, tei te enua nei, e mei tetai ngai tiakianga no te au tangata e tapapa atura i te akavaanga?

I noo ana to tatou nga tupuna ki roto i te Parataito. Te akakite maira te Pipiria kia tatou e: “Kua tanu oki te Atua ra ko Iehova i te kainga i te pae i te itinga o te rā i Edene ra; e kua tuku iora aia i te tangata i tana i anga ra ki reira. . . . E kua rave iora te Atua ra ko Iehova i te tangata; tuku iora iaia ki roto i taua kainga i Edene ra, ei tatanu, e ei tiaki.” (Genese 2:8, 15) Te uri angaia taua au tuatua ra ki roto i te reo Ereni, ko te kupu “kainga” kua uriia e pa·raʹdei·sos, i rauka mai ei te kupu Papaa e “paradise.”

Mei tetai nga tokorua e anoanoia ra kia akamaata atu i to ratou kainga no te mea te maata maira te tamariki, koia katoa to tatou nga metua mua tei tapapaia kia akaatea atu i te Parataito ki vao ake i te au kena o Etene, i te au pamiri tangata e maata maira. Akakite te Atua kia raua e: “E akaki i te enua nei, e e akavi.”​—Genese 1:28.

Te akakoroanga i reira o Tei Anga mai ia tatou koia oki, kia noo te tangata e kia anau i te tamariki i roto i te Parataito i runga nei te enua. Ka noo ratou e mutu kore ua atu ki roto i tetai kainga i te enua, kare e anoanoia te au ngai tanu mate. Ka riro te enua ei kainga tinamou no te au tangata ravarai. No reira rai te au tu natura o to tatou paraneta i riro ei, ei marekaanga no tatou! Kua angaia tatou kia noo ki runga i tetai enua manea.

Kua taui ainei te akakoroanga o te Atua? Kare. Te akapapu maira a Iehova ia tatou e: “Koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra.” (Isaia 55:11) Tere atu i te 3,000 mataiti i muri ake i te angaia anga te tangata, kua akakite te Pipiria no runga i “tei akaaite i te enua e nana i anga,” e “kare ra aia i anga ei mea puapinga kore ua; kua anga ra aia kia tangataia.” (Isaia 45:18) Kare te anoano o te Atua i taui. Ka riro rai te enua ei parataito.

Te mea umere, manganui te au irava Pipiria no te Parataito, e au akatakaanga ua te reira no te oraanga i runga i te enua. Ei akaraanga, ko tetai totou a Isaia te tuatua ra e: “E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira.” (Isaia 65:21) I patuia te au are kiea e i tanuia te au kainga vine kiea? I kaiia te ua kiea? Ki runga i te enua. Te akakite taka meitaki maira a Maseli 2:21 e: “Na te aronga tiratiratu oki e noo i te enua.”

Kua tuatua katoa a Iesu no runga i te parataito. Te tika, kua taputou katoa mai aia i tetai parataito i te rangi, inara e pupu tangata meangiti ua tei ikiia no te reira. (Luka 12:32) Muri ake i te matenga, ka akatu akaouia mai ratou mei te mate ki te Parataito i te rangi, e ka piri atu kia Karaiti i te tutara anga ki rungao i te Parataito i te enua nei. (Apokalupo 5:10; 14:1-3) Ka akapapu teia au tauturu tutara i te rangi e kia akatere meitakiia te Parataito i te enua nei, e kia akonoia te reira kia tau ki te au turanga o te Atua.

Kua kite a Iesu e ko te anoano teia o te Atua no te enua. Tei runga aia i te rangi e tona Metua i te angaia anga te kainga i Edene. Te oraanga a te tuatau ki mua i roto i te parataito i te enua nei, te maeu ua ra ki te au tangata ravarai e taangaanga ra i te akarongo i teia tuatau. (Ioane 3:16) No taua aronga ra, kua taputou a Iesu e: “Ei Paradaiso taua katoa i teianei rai rā.”​—Luka 23:43.

[Akameitakianga no te Tutu i te kapi 13]

© FORGET Patrick/​SAGAPHOTO.COM/Alamy