Tuatua Anga i te Reo Ke​—No ko Ainei i te Atua?

“KARE roa au e marama ana,” i karanga ai a Devon. “I te epetoma tataki tai i ko i taku pure, i te akara anga e maata ua atu te aronga tei ia ratou te vaerua tapu e tuatua temeio ra i te au reo ke ke. Tetai pae ia ratou te noo ra i te oraanga tau kore. Te reira taime, te tauta ra au kia rotai toku oraanga ki te turanga o te Pipiria. Tera ra, noatu te maata i taku pure no te reira, kare rava e rauka ana iaku teia apinga aroa o te vaerua. Eaa ra i akapera ai?”

E aere katoa ana a Gabriel ki tetai pure, te akaraanga e tei te tangata te vaerua tapu e e tuatua ana i te reo ke. “Taku e manamanata ana,” i akamarama ai aia, “koia oki, iaku e pure ra e tamanamanataia ana au e teia au tuatua kare au e marama ana, e kare katoa rai ratou. Kare roa e tangata e puapingaia ana e taua tuatua ra. Kare ainei e tau tetai apinga aroa no te vaerua o te Atua kia riro ei au akakoroanga puapinga?”

Ta Devon raua ko Gabriel i kite, te akatupu te reira i tetai uianga umere koia oki, No ko tikai ainei i te Atua te tuatua i te reo ke e raveia ra i roto i te au are pure i teia tuatau? Te pau i teia uianga, ka tauturuia kia akara matatio i te apinga aroa no te au reo ke i rotopu i te au Kerititiano i te anere mataiti mua.

‘Tuatua Iora Ratou i te Tuatua Ke’

I roto i te Pipiria, ka tatau tatou no runga i tetai au tane e te au vaine tei orongaia te mana kia tuatua i te au reo ke kare roa ratou i apii ana. Kua tupu teia no te taime mua i te ra o te Penetekote 33 T.N., i tetai au epetoma i muri ake i te matenga o Iesu Karaiti. I taua ra ra i Ierusalema, mei tetai 120 pipi a Iesu ‘kua ki ratou ravarai i te vaerua tapu, e kua tuatua iora i te tuatua ke.’ Tetai au manuiri mei te au enua mamao kua “va ua iora, no te mea i akarongo atura taua au tangata katoa ra, i ta ratou uaorai tuatua tikai i te tuatua angaia mai.”​—Angaanga 1:15; 2:1-6.

Te taiku maira te Pipiria i tetai au pipi a Iesu o mua ana, tei rauka ia ratou teia tareni umere. Ei akaraanga, kua akamanaia e te vaerua tapu te apotetoro ko Paulo kia tuatua temeio i te au reo ke ke e manganui. (Angaanga 19:6; 1 Korinetia 12:10, 28; 14:18) Inara, e tau ei e e akakoroanga meitaki to tetai ua atu apinga aroa a te vaerua tapu o te Atua. No reira eaa te akakoroanga i tuatuaia ai te au reo ke i te tuatau Pipiria?

E Akairo no te Turuturuanga a te Atua

I te tata anga ki te au Kerititiano i roto i te oire o Korinetia, tetai pae ia ratou e tuatua ana i te au reo ke, kua akamarama mai a Paulo e “e akairo te tuatua ke ke . . . no te aronga akarongo kore.” (1 Korinetia 14:22) No reira, kapiti mai ki te au tareni temeio ke atu, ko te mana no te  tuatua i te au reo ke, e akakiteanga ki te aronga e akara maira e kua arikiia e kua turuturuia te putuputuanga Kerititiano ou e te Atua. Kua riro te au apinga aroa temeio mei te akairo mataara rai te tou atura i te aronga kimi i te tuatua mou ki te ngai ka kitea te au tangata ikiia e te Atua.

Te mea puapinga ra, kare te Pipiria i taiku mai ana e kua tuatua temeio ana a Iesu me kore tetai atu au peroveta i mua ake i te tuatau Kerititiano, i roto i te au reo ke kare ratou i apii ana. Ko te apinga aroa i te tuatua reo ke tei orongaia ki te au pipi a Iesu, e akakoroanga maata atu to te reira.

E Mataara i te Akatotoa i te Tuatua Meitaki

I te akamata anga i tana angaanga orometua, kua akaue atu a Iesu i tana au pipi kia tutu aere i te tuatua meitaki o te Patireia o te Atua ki te ngati Iuda anake ua. (Mataio 10:6; 15:24) Tei tupu, kare rava te au pipi i aere ana ki vao mai i te au ngai e nooia ra e te ngati Iuda. Inara, kare e roa atu ka taui te reira.

Muri poto ua ake i tona matenga i te mataiti 33 T.N., kua akaue a Iesu tei akaoraia mai, i tana au pipi “e akariro i to te pa enua katoa ei pipi.” Kua akakite katoa aia ki tana au pipi e ka riro ratou ei au kite nona “e tae ua atu ki te openga o te enua.” (Mataio 28:19; Angaanga 1:8) Te akatotoa anga i te tuatua meitaki kia taea taua turanga ra, ka umuumuia kia taangaanga i te au reo ke ke e manganui i te pae mai i te reo Epera.

Tera ra, maata taua au pipi mua ra e aronga ‘apii koreia e te kite kore.’ (Angaanga 4:13) Akapeea i reira ratou i te tutu anga ki te au enua mamao te tuatua ra i te au reo ke ke kare roa ratou i akarongo ana, e kare katoa ratou i apiiia ana? Kua akamanaia tetai pae o taua aronga maroiroi e tutu aere ra, ki te tareni temeio kia tutu aere ma te tukatau i roto i te au reo kare roa ratou i apiiia ana kia tuatua.

No reira e rua akakoroanga puapinga o te apinga aroa i te tuatua i te reo ke. Mea mua, te oronga maira te reira i tetai akairo ei akapapu i te turuturuanga a te Atua. Te rua, e mataara meitaki te reira i te tauturu i te au Kerititiano i te anere mataiti mua, i te akatupu i ta ratou angaanga kia tutu aere ki te au tangata reo ke ke. Te akatupu ainei te tuatua anga i te reo ke i roto i te au are pure e manganui i teia tuatau, i taua au akakoroanga ra?

Tuatua Anga i te Reo Ke i Teia Tuatau​—E Akairo Ainei no te Turuturuanga Atua?

Ka tuku ra koe i tetai akairo te ka puapingaia te au tangata e manganui i roto i toou oire, kiea? Ki roto ainei i tetai are meangiti ua? Kare! Te akakite maira te tataanga o te ra Penetekote kia tatou e e “tangata ravarai” te kite maira i te akairo e orongaia ra e te au pipi te tuatua temeio ra i te reo ke. Tei tupu, kua “kapiti katoaia maira kia ratou e toru katoa paa tausani” ki te putuputuanga Kerititiano i taua ra ra! (Angaanga 2:5, 6, 41) Me karanga te au tangata i teia tuatau e te tuatua ra ratou i te reo ke, inara te rave ra i te reira i roto i tetai are pure, akapeea te reira peu i te riro anga ei akairo ki te katoatoa ki te au tangata ravarai o te aronga kare e irinaki ana?

Te taiku ra te Tuatua a te Atua i te moeaana e “te au angaanga a te kopapa,” e te patoi ra i te angaanga a te vaerua tapu, i te karanga anga e “ko te aronga e rave i te reira au peu, kare ratou e noo i te basileia o te Atua.” (Galatia 5:17-21) Me te kite atura koe i tetai aronga tu tau kore e tuatua ra i te reo ke, penei ka tau rai koe kia manako e, ‘Kare ainei te reira i te tu rotai kore​—e te pikikaa katoa—​kia orongaia te vaerua tapu o te Atua ki tetai au tangata e rave tamou ra i te au tu, e akaapa maira ta te Atua uaorai Tuatua?’ Te aite atura te reira ki te tuku anga i tetai akairo ki runga i te mataara te arataki ra i te au mea akaoro na te mataara tarevake.

Tuatua Anga i te Reo Ke i Teia Tuatau—E Mataara Ainei no te Akatotoa i te Tuatua Meitaki?

Akapeea i reira te akakoroanga ke atu o te apinga aroa o te tuatua ke i te anere mataiti mua? Te riro ainei te tuatua anga o te reo ke e raveia ra i roto i te au are pure ei mataara no te tutu atu i te tuatua meitaki ki te au tangata reo ke ke? Akamaara ana e ko te aronga matakitaki i Ierusalema i te ra o te Penetekote i te 33 T.N., no  te au enua mai e manganui, e kua marama meitaki ratou i te au reo e tuatua temeioia ra e te au pipi. Te tuke, te aronga e tuatua ra i te reo ke i teia tuatau, te mutamuta ua ra i te au tuatua kare te tangata e marama mai ana.

Taka meitaki, e ko te tuatua anga i te reo ke i teia tuatau e tuke takiri ki te apinga aroa a te vaerua tapu tei orongaia ki te au pipi a Iesu i mua ana. Te tika, kare e rekoti irinakiia no tetai ua atu tangata tei rauka taua mana temeio ra, mei te pou anga te au apotetoro i te mate. Kare teia i te mea poitirere ki te aronga tatau Pipiria. No runga i te au apinga aroa temeio, kapiti mai te tuatua i te reo ke, kua totou te apotetoro akauruia ko Paulo e: “E kore ïa.” (1 Korinetia 13:8) Akapeea i reira tetai ua atu i te kite anga e tei ia ai te vaerua tapu i teia tuatau?

Koai te Akaari ra e Tei ia Ratou te Vaerua Tapu?

Kite meitaki a Iesu e ka ope te apinga aroa o te tuatua ke i muri ua ake i te akamataia anga te putuputuanga Kerititiano. Mua poto ua ake i tona matenga, kua taiku a Iesu i tetai akairo, me kore tu, te ka akataka i tana au pipi mou. “Ko te mea teia e kite ei te tangata katoa e e pipi kotou naku,” i tuatua ai aia, “kia aroa kotou ia kotou uaorai.” (Ioane 13:35) Me akara koe i roto i taua irava rai, kua totou mai te Tuatua a te Atua e i te openga ka kore taua au apinga aroa temeio ra, kua karanga te reira e: “Kare ua te aroa e kore.”​—1 Korinetia 13:8.

Kua taikuia mai te aroa ei mea mua i te au tuanga e iva o te “ua,” me kore te au tu o te vaerua tapu o te Atua. (Galatia 5:22, 23, NW) No reira ko te aronga tikai tei ia ratou te vaerua o te Atua​—e pera katoa ta te Atua turuturuanga—​ka akaari i te aroa tika tikai no tetai e tetai. Te tuanga toru no te ua o te vaerua koia oki e au. Ko te aronga i reira tei ia ratou te vaerua tapu i teia tuatau, ka akatupu ratou i te au, aruaru i te patoi pakari atu i te tu akavaavaa, iriiri tangata, e te ta ua.

Tetai katoa, akamaara i te tuatua totou a Iesu tei rekotiia i roto ia Angaanga 1:8. Kua totou aia e ka akamanaia tana au pipi kia riro ei au kite nona “ki te openga o te enua.” Kua akakite katoa mai a Iesu e ka rave uaia atu rai teia angaanga “e tae ua atu ki te openga o teianei ao.” (Mataio 28:20) No reira ka rave uaia atu rai teia angaanga tutu aere i te pa enua ei akairo no te akataka anga i te aronga tikai tei akamanaia e te vaerua tapu.

Eaa toou manako? Eaa te pupu tangata taau i kite e te akaari maira e tei ia ratou te vaerua tapu i teia tuatau? Koai ma te akaari maira i te ua o te vaerua, mei te aroa e te au, noatu e takinga kinoia ra ratou e te au kavamani no te mea kua patoi ratou i te aere atu ki te tamaki i te ao katoa e pini ua ake? (Isaia 2:4) Koai ma te aruaru ra i te kopae i te au angaanga a te kopapa, mei te moeaana, e te akaatea katoa anga i te aronga e rave tamou ra i taua tu ra i rotopu ia ratou? (1 Korinetia 5:11-13) Koai ma te aronga e tutu aere ra i te tuatua meitaki o te Patireia o te Atua i roto i te ao katoa e ko te manakonakoanga anake ua ia no te tangata?—Mataio 24:14.

Te aronga tei nenei i teia tianara, kare ratou e emiemi ana i te karanga e te o atura te Au Kite o Iehova ki teia akatakaanga a te Pipiria no te au tangata tei ia ratou te vaerua tapu. Eaa koe kore ei e piri atu kia ratou, kia rave i tetai ikianga naau uaorai e me tei ia ratou rai te turuturuanga a te Atua?