AKAKITEIA atu ana tetai mea muna kia koe?— * Ka inangaro au i te akakite atu i tetai kia koe. I roto i te Pipiria te kapikiia ra e ko “te tuatua ngaro i uunaia i te au uki katoatoa mei ito mai.” (Roma 16:25) Te akamataanga, ko te Atua anake ua tei kite i “te tuatua ngaro.” Ka akara ana tatou e akapeea te Atua i te akapapu anga e kia kite te tangata e manganui i teia mea muna.

Te mea mua, kua kite ainei koe i te aiteanga o te kupu “tapu?”— Te aiteanga o teia kupu e ma, me kore e mea takake roa. No reira ko te mea muna kua kapikiia e ko te tuatua ngaro no te mea no ko mai i te Atua, ko tei tapu. Koai i toou manako te inangaro ra kia kite i teia mea muna takake roa?— Ko te au angera. Te karanga ra te Pipiria e: “Ko te au mea ta te au angela e arōrō mai e akara.” Ae, inangaro ratou kia marama i teia mea muna tapu.​—1 Petero 1:12.

To Iesu aerenga mai ki te enua, kua tuatua aia no runga i te tuatua ngaro e kua akamarama mai i te reira. Akakite aia ki tana au pipi e: “Kua orongaia mai te kite ia kotou i te tuatua ngaro o te basileia o te Atua ra.” (Mareko 4:11) Te kite ra koe e no runga te tuatua ngaro tapu i teaa?— No runga te reira i te Patireia o te Atua, ta Iesu i apii mai ia tatou kia pure!​—Mataio 6:9, 10

Teianei ka akara tatou e akapeea te Patireia o te Atua i riro ei ei mea muna “mei ito mai” e tae rava ki to Iesu aerenga mai ki te enua e kua akamarama i te reira. Muri ake i te aati anga a Adamu raua ko Eva i te ture a te Atua e kua tukuia ki vao ake i te aua o Edene, kua kite mai te au tavini o te Atua e ka akariro rai te Atua i te enua katoa ei parataito. (Genese 1:26-28; 2:8, 9; Isaia 45:18) Kua tata ratou no runga i te tu mataora o te tangata i runga i te enua, raro ake i te Patireia o te Atua.​—Salamo 37:11, 29; Isaia 11:6-9; 25:8; 33:24; 65:21-24.

Akamanako ana i teianei, no runga i te Tutara o te Patireia o te Atua. Kua kite koe e koai ta te Atua i iki ei Tutara?— Ko Tana Tamaiti, te “Ariki o te Au,” ko Iesu Karaiti. Te tutara anga ariki “ei runga i tona ra pakuivi,” i karanga ai te Pipiria. (Isaia 9:5, 6) Ka anoanoia koe e au kia apii i “te kite pu tikai kia āriki i te tuatua ngaro a te Atua Metua e ta te Mesia ra oki.” (Kolosa 2:2) Ka anoanoia tatou kia kite e kua rave te Atua i te oraanga o te angera mua (Tamaiti vaerua) tana i anga, e kua tuku i taua oraanga ra ki roto ia Maria. Taua Tamaiti ra, e angera ririnui, kua riro mai e ko ta te Atua i tono mai ki te enua ei atinga, kia rauka ia tatou te ora mutu kore.​—Mataio 20:28; Ioane 3:16; 17:3.

Maata atu ra oki ta tatou ka anoanoia kia kite no runga i teia mea muna, i ta te  Atua i iki ia Iesu ei Tutara no Tona Patireia. Tetai tuanga o te tuatua ngaro, koia oki te vai atura etai ke te ka kapiti atu kia Iesu tei akaoraia, ki runga i te rangi, e au tane e te au vaine. Ka tutara ratou ma Iesu i runga i te rangi!​—Ephesia 1:8-12.

Ka akara tatou i te au ingoa o tetai o taua aronga ra te ka tutara e Iesu i runga i te rangi. Kua akakite a Iesu ki tana au apotetoro akarongo mou e ka aere aia e akapapa i tetai ngai no ratou. (Ioane 14:2, 3) Na te akaraanga i te au irava e aru maira, ka kite koe i tetai au ingoa o tetai au tane e te vaine te ka tutara ma Iesu i roto i te Patireia o tona Metua.​—Mataio 10:2-4; Mareko 15:39-41; Ioane 19:25.

No tetai tuatau roa, kare i kitea e eia au tangata ka tutara i runga i te rangi ma Iesu ei tuanga no tona Patireia. I teianei ra kua kite tatou i te numero. Kua kite ainei koe i te reira?— Te karanga ra te Pipiria e e 144,000. E tuanga katoa teia no te tuatua ngaro.​—Apokalupo 14:1, 4.

Te akatika ra ainei koe e ko teia “tuatua ngaro o te basileia o te Atua,” te mea muna umere roa atu ta tetai tangata ka kite mai?— Me koia ia, ka tauta tatou kia apii i te ka rauka ia tatou no runga i te reira, kia rauka ia tatou te akamarama atu i teia au apinga ki te au tangata e manganui, te ka rauka ia tatou.