Edene​—Ko te Kainga Mua Ainei ia o te Tangata?

AKAMANAKO ua ana ra e tei roto koe i tetai kainga. Kare e tamanamanata, kare e maniania mei te oraanga turituri i roto i te oire i tetai tua mai te aua. E aka kainga maatamaata teia e kare e apinga e tamanamanata maira i tona turanga au. Tei meitaki atu kare koe e apiapi ana, kare rava koe e maki ana, e kare e mamae. Mataora ua koe i te akara e te akamanako i taau e kite ra.

Reka ua koe i te akara i te au kara manea tukeke o te tiare, te kanapanapa o te aravai, e te kara matie tuketuke o te rau rakau e te ngangaere i roto i te ra e te ngai maru. Te kite ra koe i te anu anu o te matangi i runga i te pakari oou, e te ongi ra i te au tu aunga kakara e aangi maira. Te rongo ra koe i te parara o te rau rakau, te vai e tae maira i runga i te au mato, e te tangitangi o te manu rere e te manumanu. Ia koe e akamanako ra i taua au tu ra, kare ainei koe e inangaro ana i te noo i roto i te ngai mei tera rai?

Irinaki te tangata takapini i teianei ao e, i akamata mai te tangata i roto i tetai ngai mei tera rai. No te au anere mataiti, kua apiiia ana te akonoanga ngati Iuda, Kerititome, e te Itirama no runga i te kainga i Edene te ngai i tuku ei te Atua ia Adamu raua ko Eva kia noo. Akakite te Pipiria e, e oraanga au ua to raua e te mataora. Au ua raua kia raua rai, ki te au manu, e ki te Atua, ko tei oronga aroa ua mai i te manakonakoanga o te ora mutukore no raua i roto i taua ngai manea ra.​—Genese 2:15-24.

Tuke katoa te au irinakianga o te au tangata Initu no runga i tetai parataito i te tuatau taito. Irinaki te au tangata Buda e ka mama mai te au arataki maata o te akonoanga me kore te au Buda, a taua au tuatau mekameka ra me riro te ao nei mei te parataito te tu. Maata te au akonoanga o Aperika e apii ra i te au tua tei aiteite rai ki te tua o Adamu raua ko Eva.

No reira kua totoa ua te manako no tetai parataito i mua ana i roto i te au akonoanga e te au peu tini a te tangata. Akakite tetai tangata tata puka e: “Maata te taiate tangata tei irinaki i tetai parataito muatangana i te vai anga o te turanga apa kore, rangatira, ponuiaau, mataora e te maata o te mou, kare e taomianga kare e apiapi e kare e manamanata. . . . Akatupu teia irinakianga i te  manakonakoanga pakari o te katoatoa no te parataito tei ngaro e tei kore roa i ngaropoina, e te anoano maata kia akaoki akaouia mai te reira.”

Ka tano ainei e okotai rai ngai i tupu mai ei teia au tua e te au peu tini? Ka tau ainei rai e kua mou ke ana te “manakonakoanga o te katoatoa” ki roto i tetai mea tika tikai? I vai ana rai tetai kainga i Edene i muatangaana, e me e nga tangata tika tikai ainei a Adamu raua ko Eva?

Aviri te aronga ekoko i taua manako ra. I roto i teia uki kite taieni, maata te manako ra e e tuatua tupuna ua te reira e te au tua maani ua. Te mea umere ra, kare ko te aronga ekoko ua te kare e irinaki ana. Maata te au arataki akonoanga kare e irinaki ana i te tua o te kainga i Edene. Karanga ratou e kare takiri e ngai mei te reira rai. E tua akaaite anga ua tera i na ratou ei, e tua maani ua, e tua tamanako ua, e te parapore.

E tika rai e e au parapore to roto i te Pipiria. Kua tuatua ana a Iesu uaorai i etai o te au parapore rongonui roa atu. Inara, kare te Pipiria e oronga maira i te papaanga o Edene ei parapore, mari ra ei tuatua enua iro koreia e te tika. Tera ra mei te mea e kare rava i tupu ana te au mea tei akatakaia mai, akapeea i reira e rauka ai i te irinaki i te toenga o te Pipiria? Ka makitoro marie ana tatou e eaa tetai aronga i ekoko ei i te tuatua o te kainga i Edene, e te akara e me kua tau rai to ratou manako. I reira ka akamanako ei tatou e eaa i puapinga ai teia papaanga kia tatou tataki tai.