Kua Kite Ainei te Atua e ka Ara a Adamu Raua ko Eva?

MAATA te tangata e inangaro tikai ra kia kite i te pauanga ki teia uianga. Me tuatuaia mai te maroanga no runga i te tumu i akatika ua ai te Atua i te kino, riro viviki ua te ara a nga tangata mua i roto i te kainga i Edene ei uriurianga. Te manako e ‘kua kite te Atua i te au mea ravarai,’ penei ka karanga tetai aronga e kua kite ke ana te Atua i mua ake e ka akarongo kore a Adamu raua ko Eva iaia.

Me e tika tikai e kua kite ke ana te Atua e ka ara teia nga tokorua, eaa ra ta teia e akakite maira? Ka riro taua tu manako ra ei akatupu i te au manako tarevake no runga i te Atua. Ka akara anga i reira e e tu aroa kore tona, tu tau kore e te pikikaa. Penei ka karanga tetai aronga e e kino tikai aia i te tuku i nga tangata mua ki roto i tetai turanga tei kite takere aia e e kino. Ka akara anga i reira e nana, na te Atua i akatupu​—me kore i tauturu kia tupu—​te au tu kino tini ravarai tei tupu mai i roto i te tuatua enua. Ki tetai aronga, penei ka karanga ratou e e kamakura tikai Tei Anga mai.

Te tano ra ainei te Atua ko Iehova tei akatakaia mai roto i te au Tuatua Tapu, ki tera akatakaanga tarevake? Ei pau i te reira, ka makitoro marie ana tatou i ta te Pipiria e tuatua ra no runga i te au angaanga i angaia mai, e to Iehova uaorai tu.

“Te Meitaki Roa Ra”

No runga i te au mea ta te Atua i anga, tei kapiti mai i nga tangata mua i runga nei te enua, te na ko ra te papaanga o Genese e: “Akara akera te Atua i te au mea katoa tana i anga, e i na, te meitaki roa ra.” (Genese 1:31.) Angaia mai a Adamu raua ko Eva ma te tu apa kore, tau meitaki tikai no to raua au turanga i te enua nei. Kare e apinga i ngere i roto i te tu i angaia mai ei raua. I te mea e e “meitaki roa” to raua angaaia mai anga, papu tikai e ka rauka ia raua te tu meitaki tei umuumuia raua kia akatupu. I angaia raua i “te tu o te Atua.” (Genese 1:27) No reira tei roto raua i te turanga te ka rauka ia raua i te akaari i te au tu o te Atua mei te pakari, te aroa tiratiratu, te tuatua-tau, e te meitaki. Ka riro te akaataanga i taua au tu ra ei tauturu ia raua kia rave i te au ikianga tau te ka puapinga raua e te ka akarekareka i to raua Metua i te rangi.

Kua oronga a Iehova i te tikaanga no teia nga mea ora kite kia iki i ta raua i anoano. No reira kare raua i porokaramu ke ia ana kia akarekareka i te Atua—mei te matini rai. Akamanako meitaki ana i te reira. Ko teea tikai tei puapinga atu kia koe—te apinga aroa tei oronga manako kore uaia mai, me ko tei orongaia mai ma te ngakau tae tikai? Te taka ua ra te pauanga. Pera rai a Adamu raua ko Eva, naringa raua i iki puareinga ua kia akarongo i te Atua, ka riro to raua akarongo ei mea akaperepere maata rava nana. Ko te tareni kia rauka i te iki, ka tauturu te reira i nga tangata mua kia akarongo ia Iehova no to raua inangaro iaia.​—Deuteronomi 30:19, 20.

Tuatua-tika, Tuatua-Tau e te Meitaki

Te akaari maira te Pipiria i to Iehova au tu kia tatou. No te mea e ko tona au tu teia, kare rava aia e manako atu i te rave i tetai ua atu mea te ka riro ei ara nana. “Inangaro aia [Iehova] i te tuatua-tika e te tuatua-tau,” e karanga ra te Salamo 33:5. No reira a Iakobo 1:13 i akakite ei e: “Kare rava te Atua e vavare i te kino, kare rava oki aia e pikikaa i te tangata.” No tona tu tau e te aroa takinga meitaki, kua akamatakite atu te Atua ia Adamu e: “E kai ua koe i to te au rakau katoa o te kainga nei: Kareka i to te rakau e kite ei i te meitaki e te kino, auraka koe e kai i to reira; i te rā e kai ei koe i to reira, ka mate ïa koe.” (Genese 2:16, 17) Kua orongaia te  tikaanga no nga tokorua kia iki i rotopu i te ora mutu kore e te mate. Kare ainei i reira i te tu pikikaa no te Atua kia akamatakite ia raua eiaa e ara, me kua kite takere aia e eaa te kino ka tupu? I te mea e e Atua “inangaro aia i te tuatua-tika e te tuatua-tau,’ kare rava a Iehova e oronga i tetai ikianga me kua kite aia e kare tikai e anoanoia.

E maata katoa te au mea memeitaki a Iehova. (Salamo 31:19) I te akataka mai anga i to Iehova meitaki, kua tuatua a Iesu e: “Koai ïa i roto ia kotou i te tangata nei, e apai i te toka na tana tamaiti kia pati mai aia i te manga? E kia pati mai i te ika ka apai atu ainei i te ovi nana? E te tika na ia kotou, kino ua rai, kia oronga i te mea meitaki na ta kotou au tamariki, ka tangaʼi oki i to kotou Metua i te ao ra, i te oronga i te mea meitaki i te aronga i pati atu iaia ra?” (Mataio 7:9-11) E oronga ana te Atua “i te mea meitaki” na tana au mea ora i anga mai. Te akaari maira te tu i angaia ai te tangata, e i akapapaia ai te kainga Parataito no ratou, i to te Atua tu meitaki. Ka akapera ainei tetai Tutara Ngateitei meitaki i te oronga mai i tetai kainga manea, ina kua kite ke ana aia e ka apai ke ia te reira? Kare. No te mea e tu tuatua tika e te meitaki to Tei Anga mai ia tatou, kare nona te apa i meameaau ei te tangata.

“Pakari Anake”

Te akaari katoa maira te au Tuatua Tapu e ko Iehova tei “pakari anake.” (Roma 16:27) Maata ua atu te taime i kite ei te au angera a te Atua i te rangi, i te akatutuangaia mai teia tu pakari openga kore. Kua ‘maeva ua ratou i te rekareka’ i to Iehova anga mai anga i tana au mea i maani i te enua nei. (Iobu 38:4-7) Kare e ekoko kua umere teia au mea ora vaerua i te akara anga i te au mea tei tupu i roto i te kainga i Edene. I mua i te au angera, e tumuanga tau ainei to teia Atua kite pakari tei anga mai i tetai ao e te angaanga tini ravarai i te enua nei, kia anga mai i te tangata ina kua kite aia e kare e puapingaia? Te taka meitaki ua ra e kare takiri i te mea tau kia parani i tetai tumatetenga mei tera te tu.

Tera ra, penei ka patoi mai tetai tangata e, ‘Akapeea ake tetai Atua koia anake tei pakari roa atu i kore ei i kite?’ Tika rai e no to Iehova pakari maata, tei roto aia i te turanga te ka rauka iaia kia kite “i te openga mei te muatangana mairai.” (Isaia 46:9, 10) Inara kare e anoanoia kia taangaanga aia i teia turanga, mei tona mana maata rai kare aia e anoanoia kia taangaanga ua rai i te reira. E iki meitaki ana ra a Iehova i te taime tau no te taangaanga i tana i kite ke ana. Ka taangaanga aia i te reira me e tumuanga tau tetai, e me kua tau te au turanga no te reira.

Te kite e eaa te taime tau no te kore e taangaanga i taau i kite ke ana, ka tau kia akatutuia na roto i te angaanga tekinoroti i teia tuatau. Ka rauka i tetai tangata e akara teata tarekareka ra tei rekoti takereia, kia akara i te tuanga openga o te teata kia kite e koai tei re e tei kore. Inara kare aia e anoanoia kia akamata na te reira mataara. Naai aia e akaapa mai me ka iki aia kia akara i te katoaanga o taua tarekreka ra mei mua ki te openga? Mei te reira rai te tu, kua iki Tei Anga mai eiaa kia kite e eaa te ka tupu ki tetai au mea i te openga. Kua iki aia kia tiaki, e i te au mea e tupu ra, kua akara aia kia kite e akapeea tana tamariki i te enua nei te akaaere anga ia ratou uaorai.

Mei tei taikuia i mua ake, no tona pakari kare a Iehova i anga i te nga tangata mua ei matini tei porokaramuia kia aru e tai ua kaveinga. Mari ra, kua oronga aroa ua aia i te tikaanga kia iki i ta raua i anoano. Na te ikianga i te arataa tau, ka rauka ia raua i te akaari mai i te aroa, te tu akameitaki e te akarongo, i te akatupu anga i te rekareka kia raua uaorai e ki to raua Metua i te rangi ko Iehova.​—Maseli 27:11; Isaia 48:18.

Te akaari maira te au Tuatua Tapu e e maata te au atianga kare te Atua i taangaanga ana i tana i kite ke ana. Ei akaraanga, i te vaitata roa anga a Aberahama i te akaatinga i tana tamaiti,  rauka ia Iehova kia karanga e: “Kua kite oki au i teianei e, e mataku toou i te Atua, ko koe kare i karapii i to tamaiti, i to tamaiti okotai roa ra, iaku.” (Genese 22:12) I tetai tua, e au atianga katoa tetai tei riro te tu kino o tetai au tangata ei “akaongoongo” i te Atua. Ka kite ainei aia i taua tu mamae ra mei te mea e kua roa aia i te kite anga e eaa ta ratou ka rave?​—Salamo 78:40, 41; 1 Ariki 11:9, 10.

No reira, e mea tau rai kia karanga e kare te Atua koia anake tei pakari roa atu, i taangaanga ana i tana i kite ke ana, kia rauka iaia te kite na mua ake e ka ara to tatou nga metua mua. Kare aia i te kamakura i te akamata i tetai angaanga tuke ua ake rai tei kite takere aia na mua ake e ka tupu.

“Ko te Atua oki te Aroa”

Na Satani te enemi o te Atua i akamata i te meameaau i roto i Edene tei akatupu mai i te au openga kino, kapiti mai te ara e te mate. No reira e “ta tangata” a Satani. Papu katoa e “e pikikaa aia, e e metua oki no te pikikaa.” (Ioane 8:44) No tona uaorai akakoroanga kino, titau aia i te akaapa e e akakoroanga kino to Tei Anga mai ia tatou. Inangaro aia i te akairi i te apa no te ara a te tangata ki runga ia Iehova.

Ko te tu aroa te tumu ririnui roa atu i iki ei a Iehova eiaa kia kite na mua ake e ka ara a Adamu raua ko Eva. Ko te aroa to te Atua tu maata rava atu. Te na ko ra a 1 Ioane 4:8 e “ko te Atua oki te aroa.” E tu papu tikai te aroa, kare e ekoko. Ka akara te reira i te meitaki i roto i etai ke. Ae, no te aroa, kua inangaro te Atua ko Iehova i te mea meitaki rava atu no nga tangata mua.

Noatu e tikaanga to te tamariki a te Atua i te enua nei kia rave i tetai ikianga tarevake, kare to tatou Atua aroa i taitaia ana e ka tupu te kino me kore i tarotokaka ana i tana au mea ora apa kore i anga. Kua oronga mai aia i te au mea ravarai tei anoanoia no raua. Kua tau rai te Atua kia tapapa atu, eiaa i te meameaau, mari ra i te akarongo tiratiratu. Kua kite aia e ka rauka ia Adamu raua ko Eva kia vai tiratiratu ua mei tei akapapuia mai i muri nei e te au tangata apa ua mei ia Aberahama, Iobu, Daniela e te manganui ua atu.

“E tika i te tangata nei; e tika ra te au mea katoa i te Atua,” i akakite ei a Iesu. (Mataio 19:26) E manako pumaana tikai te reira. Te akapapu maira te aroa o Iehova, pera tona tu tuatua tau, te pakari e te mana, e kare e roa atu ka takore pouroa aia i te kino o te ara e te mate.​—Apokalupo 21:3-5.

Taka meitaki e kare a Iehova i kite ke ana e ka ara nga tangata mua. Noatu tona mamae i te akarongo kore o te tangata e te kino tei tupu, kua kite aia e kare teia turanga no te tuatau poto ua e arai i te akatupuanga o tona akakoroanga mutu kore no te enua e te tangata. Kore ei e kimi maata atu e ka akapeea koe e puapingaia ai mei taua akakoroanga ra, e tona akatupuanga kaka? *

[Tataanga Rikiriki i Raro]

[Tataanga i te kapi 14]

Kare a Iehova i anga i te nga tangata mua ei matini tei porokaramuia kia aru e tai ua kaveinga

[Tataanga i te kapi 15]

Kua kite te Atua e ka rauka ia Adamu raua ko Eva kia vai tiratiratu ua