Ka Ui Ta Tatou Aronga Tatau . . .

Na te Atua Ainei i anga mai te Diabolo?

▪ I te mea te karanga ra te Pipiria e na te Atua i “anga i te apinga tini ravarai,” kua manako tetai aronga e na te Atua rai i anga mai te Diabolo. (Ephesia 3:9; Apokalupo 4:11) Te akaari taka ua maira te Pipiria e kare.

Ko te angera ta Iehova i anga kua riro mai ko te Diabolo. No reira ka anoanoia te vaianga o teia patoi maata o te Atua, kia tau ki ta te au Tuatua Tapu e akakite maira no runga ia Iehova, ko Tei Anga mai. No runga iaia, kua karangaia e: “Tika rava tana angaanga ra; ko tei tau katoa tona au aerenga; e Atua tuatua-mou, e te kino kore ra, e tuatua-tika tana, e te tiratiratu!” (Deuteronomi 32:3-5) Te akaari maira tera tuatua kia tatou e, e tu apa kore to Satani e te tuatua tika i mua ana, koia tetai o te au tamariki angera a te Atua. Roto ia Ioane 8:44, kua akakite a Iesu e “kare aia [te Diabolo] i mou i te tuatua-mou,” te akaari mai anga e e peretana tuatua mou e te apa kore a Satani i mua ana.

Inara, mei te toenga rai o ta Iehova au mea ora kite i anga, e tikaanga to te angera tei riro mai ko Satani kia iki i rotopu i te mea tika e te mea tarevake. Na te iki anga i te arataa e patoi ra i te Atua e te akanauru anga i nga tangata mua kia piri kiaia, kua akariro aia iaia uaorai ko Satani, te aiteanga “Tei Patoi.”​—Genese 3:1-5.

Kua akariro katoa taua vaerua ora iaia uaorai ko te Diabolo, te aiteanga “Tei Akakino.” Ko Satani te vaerua tei akatutu pikikaa ua mai e ko te ovi te tuatua ra, e tei akavare ia Eva na roto i te pikikaa kia akarongo kore i te ture tei akakite tikaia mai e Tei Anga mai. No reira a Iesu i kapiki ei ia Satani e ko te “metua o te pikikaa.”​—Ioane 8:44.

Akapeea ra tetai mea ora vaerua​—kare takiri e tu paruparu i roto iaia, e kare katoa e au akakeuanga kino takapini iaia—​i akapera ai? Te taka ua ra e kua noinoi aia i te akamorianga tei tau anake ua no te Atua, e kua kite aia e e atianga meitaki teia i te akaariu mai i te tangata ki tana tutaraanga eiaa ta Iehova. Na te akamanako ua anga no runga i teia tutaraanga e kare i akakore atu i te reira, kua akatika aia kia vai ua atu teia manako, e i te openga kua akatupu rai aia i te reira. Kua akatakaia mai teia i roto i te puka o Iakobo e: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara.”​—Iakobo 1:14, 15; 1 Timoteo 3:6.

Ei akatutu: Akamanako ana i tetai tangata akono rekoti moni, tei tarurike i te au rekoti kia rauka iaia i te keia mei tona kamupani. Penei ka akakore viviki ua aia i taua manako kino ra. Me ka akamanako ua ra aia i teia, ka maata atu tona inangaro i taua manako ra, e ka akatupu rai aia i te reira. Me akapera aia, kua akariro rai aia iaia uaorai ei keia. Me pikikaa aia i tana apa i rave, ka riro katoa mai aia ei pikikaa. I akapera rai te angera ta te Atua i anga i te akatupu anga i te anoano tarevake kia taangaanga i tona tikaanga kia iki, e kia piri ki te pikikaa e te meameaau i tona Metua, akariro atura iaia uaorai ko Satani te Diabolo.

Te mea meitaki rai, kare e roa atu ana ka takore te Atua ia Satani te Diabolo. (Roma 16:20) Te apiiia nei ra te aronga akamori o te Atua ko Iehova no runga i ta Satani au ravenga e te paruruia nei mei tana au ravenga pakari. (2 Korinetia 2:11; Ephesia 6:11) No reira “e patoi atu i te diabolo, e nana e rere ke atu” mei ia kotou.​—Iakobo 4:7.

[Tataanga i te kapi 12]

Na te iki anga i te arataa e patoi ra i te Atua, kua akariro tetai angera apa kore iaia uaorai ko Satani