Tumu i Puapinga ai a Edene kia Koe

TETAI patoianga umere roa atu a te aronga kite no runga i te papaanga o Edene koia oki kare te toenga o te Pipiria e turu ana i te reira. Ei akaraanga, tata te Poropeta o te Au Apii Akonoanga a Paul Morris e: “Kare e au taikuanga akaou i muri mai no te tua o te kainga i Edene.” Penei ka arikiia tona manako e te “aronga kite” tukeke, kareka ra te patoi tika ra te reira i te au tika.

E maata ta te Pipiria au taikuanga i te kainga i Edene, ia Adamu, ia Eva, e te ovi. * Inara kare te apa o etai ua aronga kite e aite atu ki tetai mea maata rava atu, mea ririnui rava atu e totoa ua nei. Na te akaapa anga i te rekoti o Genese no te kainga i Edene, te takino ra te au arataki akonoanga i te tu tiratiratu o te Pipiria. Akapeea ra?

Ka anoanoia kia marama i tei tupu i Edene, i reira e marama ai i te toenga o te Pipiria. Ei akaraanga, kua tataia te Tuatua a te Atua ei tauturu ia tatou i te kimi i te au pauanga ki te au uianga puapinga rava atu ta te tangata e aro atu nei. Te au pauanga a te Pipiria i taua au uianga ra, maata anga i te taime no runga te reira i te au mea tei tupu i roto i te kainga i Edene. Akamanako ana i tetai au akaraanga.

● Eaa ra tatou i ruaine ei e ka mate ei? Ka noo a Adamu raua ko Eva e tuatau ua atu me kauraro raua kia Iehova. Tera ua me meameaau raua ka mate ia raua. I te ra i meameaau ei raua, kua akamata rai raua i te mate. (Genese 2:16, 17; 3:19) Kua ngaro to raua tu apa kore, e ko te ara e te tu apa ua ta raua ka akairi atu ki runga i to raua uanga. No reira te akamarama maira te Pipiria e: “No te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.”​—Roma 5:12.

● No teaa ra te Atua i akatika ua ai i te kino? Roto i te kainga i Edene kua kapiki a Satani i te Atua e e pikikaa i te tapu i te meitaki mei tana au mea i anga. (Genese 3:3-5) I reira kua  akaekoko aia i te tu tika o ta Iehova tutaraanga. Kua iki a Adamu raua ko Eva i te aru ia Satani; no reira kua patoi rai raua i to Iehova turanga ngateitei ei tutara, kua maro e ka rauka ua i te tangata kia iki nona uaorai e eaa te mea meitaki e eaa te mea kino. No te apa kore o tona tu tika e te pakari, kua kite a Iehova e okotai rai mataara i te ariu meitaki atu ki taua akaaoanga ra koia oki—kia oronga i tetai tuatau no te tangata kia tutara ia ratou uaorai. Ko te kino tei tupu mai, i tetai tua, no ta Satani akakeuanga e kua akaari marie ua mai te reira i tetai tuatua tika puapinga tikai: Kare e rauka i te tangata i te akaaere iaia uaorai ma te kore e tauturu a te Atua.​—Ieremia 10:23.

● Eaa to te Atua akakoroanga no te enua? I roto i te kainga i Edene, kua akanoo a Iehova i te turanga manea no te enua. Kua akaue aia ia Adamu raua ko Eva kia akaki i te enua ki to raua uanga e kia “akavi” i te reira, kia rauka i te akatupu i taua turanga manea rai e te rotai ki te ao katoa. (Genese 1:28) No reira ko to te Atua akakoroanga no te enua, kia riro te reira ei parataito e kia nooia e te au tangata apa kore, te uanga taokotaiia o Adamu raua ko Eva. Te maataanga o te Pipiria no runga te reira i te au ravenga a te Atua no te akatupu anga i taua akakoroanga ra.

● Eaa a Iesu Karaiti i aere mai ei ki te enua nei? Kua apai mai te meameaau i roto i te kainga i Edene i te utunga o te mate ki runga ia Adamu raua ko Eva e ta raua uanga, kareka ra kua oronga mai te Atua i te manakonakoanga. Kua tono mai aia i tana Tamaiti ki te enua nei ei oronga mai i ta te Pipiria e karanga ra e e oko. (Mataio 20:28) Eaa ra te aiteanga o te reira? Ko Iesu oki “te Adamu openga”; kua rauka iaia te rave i tei kore i rauka ia Adamu i te rave. Kua akono marie a Iesu i tona oraanga apa kore na te vai akarongo mou anga kia Iehova. E kua oronga i tona oraanga ei atinga oko, kia rauka te akakoreanga ara no te aronga tiratiratu pouroa e kia rauka te oraanga mei ta Adamu e Eva i kite ana i Edene i mua ake ka ara ai. (1 Korinetia 15:22, 45; Ioane 3:16) Ina kua akapapu a Iesu e kia tupu to Iehova akakoroanga i te akariro i teia enua ei parataito mei ia Edene te tu. *

Taka ua te akakoroanga o te Atua, kare i te manako papu kore. E tika tikai te reira. Mei te kainga rai i Edene e ngai tika tikai i te enua nei, e au manu e te au tangata tika tikai to reira, no reira e taputou papu tikai ta te Atua no te tuatau ki mua, kare e roa atu ka tupu. Ko toou manakonakoanga ainei ia e te turanga tikai no te tuatau ki mua? Tei runga ua te maataanga ia koe. Inangaro te Atua i taua tuatau ra no te manganui, pera katoa te aronga kare i manuia i to ratou oraanga.​—1 Timoteo 2:3, 4.

Te vaitata anga Iesu i te mate, kua tuatua atu aia ki tetai tangata manuia kore i tona oraanga. E tangata aati ture; tei ariki e kua tano rai kia tamateia aia. Inara kua uri aia kia Iesu no te akapumaana, e te manakonakoanga. Eaa ta Iesu tuatua? “Ei Paradaiso taua katoa i teianei rai ra.” (Luka 23:43) Me e inangaro to Iesu kia kite i taua tangata ra i reira—akatuakaouia mai e kua akameitakiia kia noo e mutukore ua atu i te parataito mei ia Edene te tu—kare ainei aia e inangaro kia rauka rai ia koe taua akameitakianga ra? Ae! Pera rai tona Metua! Me te inangaro ra koe i taua manakonakoanga ra, tauta pakari i taau ka rauka kia kite i te Atua, tei anga i te kainga i Edene.

[Au Tataanga Rikiriki i Raro]

 [Pia/​Tutu i te kapi 10]

TE TOTOU TEI TAROTAI I TE PIPIRIA

“Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.”​—Genese 3:15.

Te totou mua tera a te Pipiria, tei tuatuaia i roto i te kainga i Edene. Koai ma te aronga tokoa i roto: ko te vaine, tona uanga, te ovi, e tona uanga? Akapeea te “ke” tei totouia i te tupu anga mai?

TE OVI

Satani te Tiaporo.​—Apokalupo 12:9.

TE VAINE

To Iehova akaaerenga no te au mea ora i te rangi. (Galatia 4:26, 27) Tuatua a Isaia no runga i “te vaine,” te totou anga e ka anau mai aia i tetai iti tangata pae vaerua.​—Isaia 54:1; 66:8.

TE UANGA A TE OVI

Te aronga tei iki kia rave i te anoano o Satani.​—Ioane 8:44.

TE UANGA O TE VAINE

Mea maata ko Iesu Karaiti, no roto mai aia i te tuanga o to Iehova akaaerenga i te rangi. Kapiti katoaia mai te au taeake pae vaerua o Karaiti ki roto i te “uanga” te ka tutara kapiti e ia i te rangi. Taua au Kerititiano akatainuia, ko ratou te iti tangata pae vaerua, “te Iseraela o te Atua.”​—Galatia 3:16, 29; 6:16; Genese 22:18.

AKAPARUPARUANGA I TE POOAVAE

E kino pakari tikai tei raveia ki te Mesia kare ra i te kino tinamou. Kua rauka ia Satani i te tamate ia Iesu i te enua nei. Kua akatuakaouia mai ra a Iesu.

AKAPARUPARUANGA I TE MIMITI

Ka mate a Satani i teia. Ka tamate takiriia a Satani e Iesu. I mua ake te reira, ka takore a Iesu i te au mea ta Satani i akamata i Edene.​—1 Ioane 3:8; Apokalupo 20:10.

No tetai akatakaanga poto ua i te tumu manako maata o te Pipiria, akara i te poroutia The Bible​—What Is Its Message? neneiia e te Au Kite o Iehova.

[Tutu i te kapi 11]

Kite a Adamu raua ko Eva i te au turanga kino no te ara