KARE e tangata i teia tuatau i kite i tona ingoa. Kua kite uaia aia i teianei i te ingoa o tona metua tane, ko Iepheta. Ka akara tatou i te Pipiria kia kite no runga ia raua. Ka kite tatou e kua inangaroia te tamaine a Iepheta e te Atua e e tona au oa.

Ka rauka ia tatou i te tatau no runga ia Iepheta e tana tamaine i roto i te Pipiria, i te pene 11 o Te Au Akava. I te mea e e tavini tiratiratu a Iepheta no te Atua, kare e ekoko e e uriuri putuputu ua ana aia i te au Tuatua Tapu ki tana tamaine.

I noo ana a Iepheta i mua ake ka pati ei te iti tangata o te Atua, ko te ngati Iseraela, i tetai ariki tangata kia tutara ki rungao ia ratou. E tumutoa a Iepheta, e tangata kite i te tamaki. No reira to Iseraela i pati ei iaia kia arataki ia ratou i te tamaki atu i te ngati Amona, e iti tangata teia i te pae mai e tamaki ua ana i te ngati Iseraela.

Kua inangaro a Iepheta i te tauturu a te Atua kia akavi i te ngati Amona, no reira kua papau aia i tetai taputou. Kua karanga a Iepheta e me akatika mai a Iehova kia autu aia, ka oronga aia kia Iehova i te tangata mua te ka aere mai mei roto i tona are me oki aia ki te kainga. Ka tavini te reira tangata i te Atua no te toenga o tona oraanga i ko i te tapenakara o te Atua​—te ngai e akamori ana te tangata i te Atua i te reira tuatau. Kua kite koe e koai tei aere mai ki vao na mua?— *

 Ae, ko te tamaine a Iepheta! Taitaia tikai a Iepheta. Okotai rai oki ana tamaine. Inara kua papau aia i tetai taputou kia Iehova e ka akono rai aia i te reira. Taua taime rai, kua tuatua mai tana tamaine e: “E taku metua, kua tuatua toou vaa kia Iehova ra, e akapera mai koe kiaku mei ta to vaa i tuatua ra.” I reira kua pati aia kia tuku ua ana iaia e rua marama kia aere ki runga i te au maunga i te aue. Eaa ra aia i taitaia ei? No te mea na te akono anga i te tia a tona metua tane, kua akangere aia i tona tikaanga kia akaipoipo e kia anau tamariki. Noatu ra, kare aia i manako ana i tona uaorai au anoano e ko te mea puapinga roa atu ia. Kua inangaro aia i te akarongo i tona metua tane e kia vai tiratiratu kia Iehova. Toou manako e kua akarekareka aia ia Iehova e tona metua tane?—

I reira, kua tuku a Iepheta i tana tamaine no tetai rua marama kia aru i tona au taeake tamaine. Tona oki mai anga, kua akatupu tona metua tane i tana tia na te tuku anga iaia ki ko i te tapenakara o te Atua i Silo no te toenga o tona oraanga. I te au mataiti ravarai, e aere ana te au mapu vaine o Iseraela ki Silo i te akamaroiroi i te tamaine a Iepheta.

Kua kite koe i tetai au tamariki e akarongo ana i to ratou metua e te inangaro ia Iehova?— E mea meitaki kia kite matau i taua au tamariki ra e kia riro ei au oa no ratou. Me aru koe i te tamaine a Iepheta, me akarongo e me vai tiratiratu, ka rauka ia koe te au oa meitaki. Ka akarekareka koe i toou nga metua, e ka inangaro katoa a Iehova ia koe.